Isaia

TO IEHOVA TAHOORAA I TO BABULONIA.

47 A pou, a parahi i raro i te repo, e te tamahine paretenia o Babulonia; e parahi i raro i te repo, eiaha ei terono, e te tamahine o te Kaladaio: eita ˈtura oe e parauhia te nunu e te amu maa maitatai ra. 2 A rave i te taviri, e taviri i te sitona: a iriti i te vehî o to io rouru na, e pepe na i to ahu i nia; e vaiiho noa i o pue avae; e na raro noa i te pape i te haere. 3 Heheuhia oe ia vai tahaa noa; e itea to oe haama: o vau iho te tahoo atu ia oe, e ore au e faaherehere i te taata ra.

4 Area to tatou ora, o Iehova sabaota ra, o Tei Moˈa i Iseraela nei, to ˈna iˈoa. 5 Parahi ma te mamû, e haere i roto i te pouri, e te tamahine o te Kaladaio; e ore hoi oe e parau-faahou-hia e, O te arii vahine o te mau basileia ra. 6 I riri au i to ˈu ra mau taata; e ua haaviivii atura vau i ta ˈu ra tufaa; ua tuu atura vau ia ratou i to rima; e aore roa i arohahia mai e oe; ua faateiaha roa oe i to zugo i nia i te ruhiruhia ra.

7 E ua na ô aˈera oe, E vai arii vahine noa vau nei e a muri noa ˈtu: aore oe i manaˈo maitai i teie nei mau parau; aore oe i manaˈo i te hopea ra. 8 E faaroo mai na râ i teie, e tera ra vahine faaarearea, o tei parahi au noa ra; o tei parau i roto i to aau na e, O vau nei, e aitâ ˈtu maori râ o vau; e ore au e parahi vahine ivi noa; e ore au e ite i te tamarii i te moe-ê-raa. 9 E roohia mai râ oe i teie nei pue mea e piti, mai te amoraa mata nei, i te mahana hoê nei, te mau tamarii i te moe-ê-raa, e te parahi vahine ivi noa; e roohia-hua-hia mai oe e te reira, no te rahi o to mau peu tahutahu e te rahiraa o to mau pifao.

10 Ua tiaturi ra oe i ta oe parau ino, e ua na ô hoi oe, Aore au i itea mai: ua piˈo ê oe i to oe ra paari e to oe ra ite; i parau ai oe i roto i to aau na, O vau nei ïa, e aitâ ˈtu, o vau anaˈe nei â.

11 E tena na, e roohia mai oe e te ino, e e ore hoi oe e ite i te peeraa ˈtu; e roohia mai hoi oe e te ati; eita e tia ia oe ia tatara; e roohia noa mai hoi oe e te pau ra, e ore râ oe e ite. 12 A tamau na i to mau pifao; e te faarahi-atoa-raa o to mau peu tahutahu, ta oe i ohipa noa na mai to apîraa mai â, peneiaˈe o te faufaahia ta oe; peneiaˈe o te etaeta oe i te reira. 13 Ua rohirohi oe i te rahiraa o ta oe parau: a tia maira ratou i tena na, a faaora ia oe; o tei hiˈo i te mau raˈi ra, tei tiatonu i te mau fetia ra; o tei faaite atea mai i te parau, i te mau marama apî nei, i te mau mea e roohia mai ai oe ra. 14 Inaha! e riro ratou mai te aihere ra; e ama pau roa ratou i te auahi; e ore ratou e ora ia ratou iho i te uˈana o taua auahi ra ia ura ra; aore e roaroa e aita ˈtura e arahu iti ei haamahanahana, aore roa e maa auahi iti i toe, ia parahi i pihaiiho. 15 O te huru ïa o teie nei feia ia oe, i ta oe i rave atoa i te ohipa na; i ta oe i amui noa i te hooraa ra, mai to apîraa mai â. Ua ori haere noa anaˈe ratou i to ratou ihora mau vahi; aore roa te hoê o ratou e tia ˈi ia faaora ia oe.