Salamo

O TE ATUA TE ARII I ZIONA.

99 O Iehova te arii, ia rurutaina te mau taata! te parahi ra oia i nia i te kerubi, ia arorirori te fenua! 2 Te rahi nei Iehova i Ziona! e teitei rahi to ˈna i te taata atoa ra. 3 Ia haamaitai ratou i to iˈoa rahi e te mǎtaˈu, e iˈoa moˈa hoi te reira. 4 Te hinaaro ra te arii mana i te parau-tia; te parau au e te piˈo ore tei faatupuhia e oe ra, e te parau-tia ta oe i rave i ǒ Iakoba ra.

5 E faateitei na i to tatou Atua ra, ia Iehova, e ei to ˈna ra taahiraa avae haamori ai; te moˈa ra hoi oia. 6 O Mose raua o Aarona, na tahuˈa no ˈna ra, e o Samuela, o tei tiaoro i to ˈna ra iˈoa, ia ratou ra i tiaoro ia Iehova ra, ua parau maira oia ia ratou; 7 i te pou ata ra ta ˈna parauraa mai ia ratou; e ua haapao ratou i ta ˈna i faaite mai, e te parau ta ˈna i horoa mai ia ratou. 8 Na oe, e to matou Atua, e Iehova, i parau mai ia ratou; e Atua faaore hara oe ia ratou, a aˈo noa ˈi oe ia ratou i ta ratou ra parau ino.

9 A faateitei na i to tatou Atua ra, ia Iehova, e ei to ˈna ra mouˈa moˈa haamori ai: te moˈa ra hoi to tatou Atua o Iehova.