Salamo

TE ATI IUDA E TE MAU ETENE I TE AˈORAAHIA IA HAAMAITAI RATOU I TE ATUA.

E Salamo.

98 E Himene ia Iehova i te himene apî: e mau mea taa ê hoi tei ravehia e ana: no to ˈna iho rima atau, e to ˈna rima moˈa, i riro mai ai te re ia ˈna. 2 Ua faaite maira Iehova i te ora na ˈna; i mua i te mata o te mau etene atoa ra te faaiteraahia te parau-tia na ˈna ra. 3 To ˈna aroha e ta ˈna parau mau ua manaˈohia e ana i te utuafare o Iseraela: ua ite te mau hopea atoa o te fenua i te ora a to tatou Atua.

4 Ia pinai te haamaitai ia Iehova e ati noa ˈˈe te fenua; ia puroro te reo oaoa, ia umere ma te haamaitai i te himene. 5 A himene ia Iehova ma te kinura; ma te kinura e te reo haamaitai atoa ra: 6 ma te mau pu, e te oto o te supheri, te harururaa i te haamaitai i te arii ra, ia Iehova. 7 Ia haruru te tai e to ˈna îraa, te ao atoa e to ˈna ra mau taata. 8 Ia paipai te mau pape i to ratou rima; e ia umere tahi te mau mouˈa atoa, 9 i te aro o Iehova, te haere maira hoi oia e haava i te fenua. E haava oia i to te ao ma te parau-tia, e te mau taata ma te piˈo ore.