Salamo
TE MANAˈO RA TE EKALESIA I TO TE ATUA RA MAITAI.
Na te Menasehe. Na te tamarii a Kora Masekila.
44 E te Atua! ua ite to matou tariˈa, ua faaitehia mai matou e to matou mau metua, ta oe i rave i to ratou ra pue mahana, i te mau mahana tahito ra. 2 Na to rima i tiahi ê i te mau etene, e ua tanu mai oe ia ratou ei mono; ua tuu oe i te pohe i to Kanaana, e ua faarue hoi oe ia ratou. 3 Aore hoi i noaa te fenua i ta ratou ra ˈoˈe, aore hoi ratou i ora i to ratou iho rima, o to oe râ rima atau, o to rima e te maramarama o to mata, i te mea ua au roa oe ia ratou.
4 E te Atua, o tau arii oe, e faaue i te ora no Iakoba: 5 o oe ra e hopara ˈtu ai matou i to matou mau enemi, e e taataahi matou i tei mârô mai i to oe ra iˈoa: 6 e ore hoi au e tiaturi i ta ˈu iho fana, e ore hoi au e ora i ta ˈu iho ˈoˈe. 7 O oe mau â te faaora ia matou i to matou mau enemi, e o te faahaama ˈtu i te feia i riri mai ia matou nei. 8 Tei te Atua to matou nei faaahaaharaa e po noa ˈtu te mahana; e to oe te iˈoa ta matou e haamaitai e a muri noa ˈtu. Sela.
9 Ua haapae râ oe ia matou, e ua faahaama mai oe ia matou; e aita nei oe i te haere-atoa-raa i to matou mau nuu. 10 Te faafati nei oe ia matou i te aro o to matou mau enemi; e te pau nei matou i te feia i riri mai ia matou nei. 11 Ua tuu oe ia matou mai te mamoe ra ei maa, e ua haapurara ia matou i roto i te mau etene. 12 Te hoo nei oe i to oe ra taata i te taoˈa ore; e aore hoi e rahi ta oe ra taoˈa i te hoo ia ratou. 13 Ua faariro oe ia matou ei faainoraa na te mau taata tupu; ei vahavaharaa e ei tâhitohitoraa na te feia e haaati mai ia matou nei. 14 Ua faariro oe ia matou ei parauraa na te mau etene; e ei ueueraa upoo na te taata atoa nei. 15 Te vai noa nei â te maaroaro i mua ia ˈu nei; e ua tapoˈihia to ˈu mata e te haama. 16 I te reo o te tâhitohito e te faaino; i te aro hoi o te enemi e te ono ra. 17 Ua roohia mai â matou i taua mau mea atoa nei; aitâ râ matou i taiva ia oe; aita hoi i haavare i te faufaa na oe ra. 18 Aore to matou aau i hoˈi i muri ia oe ra, aore hoi to matou avae i faarue i to oe eˈa: 19 ua tairi ra oe ia matou i te vahi teni ra, e ua hohora i te mǎrǔ pohe i nia ia matou.
20 Ahiri i moe ia matou te iˈoa o to matou Atua; ahiri hoi i faatoro na to matou rima i te atua ê; 21 e ore anei te Atua e imi i te reira? tei itea ia ˈna te mau parau moe atoa o te aau ra. 22 No oe ra matou i taparahihia ˈi i te mau mahana atoa ra; e ua haapaohia mai te mamoe no te pohe ra. 23 A ara! eaha oe i taoto ai, e Iehova? a tia, eiaha matou e faarue-roa-hia! 24 Eaha hoi oe i tapoˈi ai i to mata; e ua haamoe oe i to matou ati e to matou hamani-ino-raa-hia? 25 Ua tuu haehaahia matou i raro i te fenua: e ua piri to matou tino i raro i te repo. 26 A tia i nia ei tauturu ia matou; e faaora ia matou i te aroha no oe ra.