Salamo

TE TIATURI RA DAVIDA I TE ATUA.

Na te Menasehe. E Salamo na Davida.

31 Te tiaturi nei au ia oe, e Iehova; eiaha roa vau ia haama; e faaora ia ˈu i ta oe ra parau-tia. 2 A tuu mai na i to tariˈa ia ˈu nei, ia peepee mai oe i te faaora ia ˈu, ei pare etaeta oe na ˈu, ei fare haapuraa ia ora vau. 3 E pare etaeta hoi oe na ˈu, e e haapuraa hoi oe no ˈu: e no to oe ra iˈoa, e aratai mai oe ia ˈu e e faaite mai ia ˈu. 4 E ume oe ia ˈu i rapae i te upeˈa i hunahia e ratou no ˈu, o oe hoi to ˈu puai. 5 Te pûpû atu nei au i tau varua i to rima; ua faaora oe ia ˈu, e te Atua parau mau, e Iehova. 6 E feia riri na ˈu tei haamori i te mau idolo faufaa ore ra: area vau nei, tei ia Iehova tau tiaturiraa. 7 E oaoa vau, e mauruuru vau i to oe ra aroha; i hiˈo na hoi oe i to ˈu atiraa, e ua ite mai oe i tau varua i te mau ati no ˈu nei; 8 aore hoi oe i horoa ia ˈu i te rima o tau mau enemi, ua tuu râ oe i tau avae i te vahi atea.

9 E aroha mai, e Iehova, ua ahoaho hoi au: ua poopoo tau mata i te oto, ua tarapape tau varua e tau tino atoa hoi. 10 Ua mure tau aho i te oto, e tau mau matahiti i te autâ. Ua ore roa tau puai i te hara na ˈu nei, e ua ino to ˈu nei mau ivi. 11 Ua riro vau ei faafaufauraa na tau mau enemi, e ei riariaraa na tau mau taua e te mau taata-tupu ra; e te feia i ite mai ia ˈu i te atea ê ra, ua horo ê ïa. 12 Aore au i haapaohia mai, mai te taata pohe ra aore i manaˈohia ra; ua riro vau mai te auˈa i parari ra. 13 Te ite nei au i te faaino a te rahi o te taata nei; ua haapunihia vau e te haamǎtaˈu e ati noa ˈˈe: te faaau ra ratou i ta ratou parau e rave ia ˈu nei, te imi ra i ta ratou ravea ia pohe au.

14 Area vau nei, te tiaturi nei au ia oe, e Iehova: te parau nei au e, O oe tau Atua! 15 Tei to rima hoi to ˈu mau taime: ia ora vau ia oe i te rima o tau mau enemi, e tei hamani ino mai ia ˈu nei. 16 Ia ite mai to mata i to tavini; ia ora hoi au i to oe ra aroha! 17 Eiaha vau ia haama, e Iehova e, te tiaoro nei hoi au ia oe; ia haama râ te paieti ore, e ia reva i raro i hade ra. 18 Ia haamamûhia te vaha haavare, tei parau ino mai i te feia parau-tia ra, no te teoteo e no te vahavaha.

19 I te rahi hoi o te mau mea maitatai na oe, i tei vaiihohia e oe no te feia i mǎtaˈu ia oe ra! i tei haapaohia e oe no te feia i tiaturi ia oe i mua i te aro o te tamarii a te taata nei! 20 E faatapuni oe ia ratou i mua i to aro na, i te amuiraa parau ino a te taata ra! e huna oe ia ratou i roto i to sekene ra, i te vaha mârô ra.

21 Ia haamaitaihia Iehova, o tei faaite mai i to ˈna hamani maitai rahi ia ˈu mai te mea e tei roto vau i te pare ati ra! 22 I parau na hoi au i taua hepoheporaa no ˈu ra e, Ua faataa-ê-hia vau i mua i to mata na; ua faaroo maira râ oe i ta ˈu nei aniraa ˈtu, ia ˈu i tiaoro atu ia oe ra.

23 O Iehova ta outou e hinaaro, e te feia moˈa no ˈna e: te faaora nei Iehova i te feia haavare ore: e faautua hua oia i tei teoteo.

24 Ia etaeta, e na ˈna e faaitoito mai i to outou aau, outou atoa, e te feia e tiaturi ia Iehova ra.