Salamo

TE HAAMAITAI RA DAVIDA, I TE ATUA, OIA I FAAORA IA ˈNA.

E Salamo, e e himene no te haoraa fare o Davida.

30 E haamaitai au ia oe, e Iehova, ua faatia hoi oe ia ˈu i nia, e aita oe i vaiiho noa ˈtu i tau mau enemi ia oaoa noa na ia ˈu. 2 E Iehova, e tau Atua, i tiaoro noa na vau ia oe, e ua faaora oe ia ˈu! 3 Ua faahoˈi mai oe, e Iehova, i tau varua mai hade mai â, e ua faaora oe ia ˈu ia ore au ia tae i raro i te apoo ra.

4 E himene ia Iehova, e te feia moˈa e; e arue i to ˈna maitai, ei manaˈoraa. 5 Mai te amoraa mata nei to ˈna riri i te poto, area to ˈna hereraa mai, e tia ïa i te vairaa e mure noa ˈtu te aho: ia tapae noa mai te oto i te ahiahi; e riro râ i te oaoa ia poipoi.

6 Taua maitairaa no ˈu ra, ua parau â hoi au e, E ore roa vau nei e aueue; 7 no to hereraa mai, e Iehova, i haamau papu ai oe i to ˈu mouˈa: ua huna ihora oe i to mata, maheahea aˈera vau! 8 Ua pure ihora vau ia oe, e Iehova, i reira, e ua faaite atura vau i ta ˈu aniraa ia Iehova. 9 Eaha te faufaa ia rave-pohe-roa-hia vau, e ia hopoi-roa-hia vau i raro i te apoo? E haamaitai anei te repo ia oe, e faaite anei ïa i te parau mau na oe ra? 10 E faaroo mai, e Iehova, e aroha mai oe ia ˈu; e Iehova, ei tauturu oe ia ˈu. 11 Ua faariro oe i te oto no ˈu ra ei oaoa; e na oe i tatara i te ahu oto no ˈu ra, e ua faaahu mai oe ia ˈu i te ahu oaoa. 12 E teie nei, e haamaitai au ia oe ma tau hinuhinu, e ore roa vau e mamû; e Iehova, e tau Atua, e haamaitai â vau ia oe e a muri noa ˈtu.