Salamo

TE TITAU RA DAVIDA IA TAUTURUHIA MAI.

Na te Menasehe i nia i te Seminita. E Salamo na Davida.

12 Ia ora, e Iehova e, ua ore aˈenei hoi te feia paieti; e te feia parau mau ra, ua ore aˈenei i ǒ te taata nei. 2 E parau faufaa ore ta ratou e parau nei, i te tahi e te tahi; o te parau haapaia, e te aau piti ta ratou e parau nei.

3 E faaore Iehova i te parau haapaia; e te arero e parau i te parau teoteo ra: 4 to te feia e parau ra e, E tupu ta to tatou arero e parau nei, no tatou iho to tatou vaha, o vai tei hau i nia ia tatou nei? 5 Te parau maira Iehova, No te hamani ino i te taata rii ra, no te mauiui o te feia haehaa, i tia ˈi au nei i teie nei, e tuu vau ia ratou i te vahi e ora ˈi i te feia e vahavaha mai ia ratou.

6 E parau anoi-ore-hia ta Iehova, mai te ario i tamâhia i roto i te pani araea ra, ia tataihituhia te tamâraa. 7 Na oe, e Iehova, e faaora ia ratou, na oe e tiai ia ratou i teie nei ui e a muri noa ˈtu. 8 Ia faateiteihia te taata faufau ra, te ori haere noa ra te feia paieti ore i reira.