Salamo

E HAAMAITAI TATOU I TE ATUA E TIA ˈI.

105 E arue ia Iehova: e tiaoro i to ˈna iˈoa; e faaite i ta ˈna i rave i rotopu i te taata atoa ra. 2 E himene ia ˈna, e himene ia ˈna ma te salamo; e paraparu faahou i te mau ohipa taa ê na ˈna ra. 3 E fanao outou o to ˈna ra taata, i to ˈna ra iˈoa moˈa; ia oaoa te aau o te feia i imi ia Iehova ra. 4 E imi ia Iehova, e to ˈna ra puai; e imi tamau i to ˈna mata. 5 E tamau â i te manaˈo i te ohipa taa ê na ˈna ra; ta ˈna ohipa ê, e te utua no roto i to ˈna ra vaha; 6 e te mau huaai o tana tavini ra, o Aberahama; e te mau tamarii a Iakoba hinaarohia e ana ra. 7 Oia to tatou Atua, o Iehova; ua itea ta ˈna parau au i te fenua atoa ra. 8 E tamau oia i to ˈna manaˈo i ta ˈna ra faufaa: i te parau ta ˈna i tuu mai e tausani noa ˈtu i te ui ra: 9 te faufaa ta ˈna i fafau ia Aberahama; e te tǎpǔ ta ˈna i tǎpǔ ia Isaaka ra; 10 ta ˈna i haamau ia Iakobo, ei ture: e ia Iseraela, ei faufaa vaiiho tamau: 11 a na ô ai ra e, E horoa ˈtu vau i te fenua ra o Kanaana ia oe, ei tufaa na outou, ei kelero: 12 i to ratou itiraa ra, aore rea ia taio ra, te varavara ra, e te taata ěê hoi i reira.

13 To ratou haereraa ra mai te tahi mataeinaa e tae atura i te tahi mataeinaa; e mai te tahi basileia e tae atura i te tahi pae taata ê; 14 aore oia i horoa noa ˈtu ia ratou ia hamani-ino-hia e te taata ra; e e hui arii hoi tei aˈohia mai e ana ia ratou: 15 na ô maira, Eiaha e tiaia noa ˈtu i tei faatahinuhia e au ra, e eiaha e hamani ino i ta ˈu ra mau peropheta. 16 Ia ˈna i hopoi mai i te oˈe i nia i te fenua ra, e ua faaore atura i te mau maa atoa ra: 17 ua tono-ê-hia na te hoê taata i mua ia ratou i Aiphiti; o Iosepha ua hoohia ïa ei tavini. 18 I mauiui to ˈna avae i te tapea, ua mau hoi oia i te auri; 19 e tupu aˈera ta ˈna parau i faaite-atea-hia maira, e ua tamatahia oia i te parau a Iehova. 20 Ua tono aˈera te arii i te vea e tatara ia ˈna; te tavana o te mau taata ra, tei tuu ia ˈna: 21 ua faariro atura oia ia ˈna ei raatira i to ˈna ra utuafare, e ei ia ˈna anaˈe ra te parau i ta ˈna atoa ra mau taoˈa; 22 ia tapea oia i to ˈna ra hui arii ia hinaaro ra, e ia haapii i tana feia moimoi i te parau paari!

23 Reva ˈtura Iseraela i Aiphiti, e ua parahi Iakoba i te fenua o Hama ra. 24 I reira te Atua i te faarahi-roa-raa i to ˈna taata, e puai atura ratou i to ratou mau enemi. 25 Tioi atura to ratou aau i te ririraa i to ˈna ra mau taata, e i te haavare i to ˈna mau tavini. 26 Ua tono aˈera oia i tana tavivi ia Mose, e ia Aarona i maitihia e ana. 27 Na raua i faaite i ta ˈna mau tapao i roto ia ratou, i ta ˈna mau ravea taa ê i te fenua o Hama ra. 28 Ua tuu atura oia i te pouri e mahora aˈera i nia ia ratou; e aore ratou i mârô noa mai i ta ˈna parau. 29 Ua faariro oia i ta ratou mau pape ei toto; e pau ihora ta ratou mau iˈa i te pohe! 30 I roa aˈera to ratou fenua i te rana, e roto roa i te mau piha o te hui arii ra! 31 Ua faaue aˈera oia, e ua haere maira te popoti; e te utu e ati aˈera to ratou fenua. 32 Ua faariro aˈera oia i ta ratou ûa ei ûa-paari, e te anaparaa uira e ati noa ˈˈe to ratou ra fenua. 33 Ua tairi atura i ta ratou mau vine e te mau suke, e ua ofati aˈera i te mau raau o to ratou ra fenua. 34 Ua parau oia e ua haere maira te arabe, e te he, eita e hope ia taio; 35 o tei amu pau roa i te mau raau rii o to ratou ra fenua, e pau roa aˈera te mau maa atoa i ǒ ratou ra. 36 Ua tairi hoi oia i te mau matahiapo o to ratou fenua; te matamehai o to ratou ra puai.

37 Ua aratai mai oia i to ˈna ra mau taata ma te ario e te auro; e aore roa te hoê i paruparu i to ratou atoa ra mau opu. 38 Ua oaoa hoi Aiphiti i to ratou revaraa; ua roohia hoi ratou i te mǎtaˈu ia ratou.

39 Ua hohora oia i te hoê ata ei tamaru ia ratou e te hoê auahi ei haamaramarama ia ratou i te po. 40 Ua ani mai ratou, e ua hopoi mai oia i te salu, e ua paia ratou ia ˈna i te maa o te raˈi. 41 Ua vahi oia i te mato, e ua manii maira te pape; e ua tahe haere noa ˈtura na te mau vahi mǎrô atoa ra. 42 Te manaˈo ra hoi oia i ta ˈna parau moˈa, i parauhia e ana i tana tavini ia Aberahama: 43 i aratai mai ai oia i to ˈna taata ma te oaoa; e tei maitihia e ana ma te himene umere ra. 44 Ua horoa maira oia i te mau fenua o te mau etene no ratou, e ua riro maira ia ratou ta te mau taata ra i ohipa; 45 ia haapao ratou i ta ˈna ra mau peu, e ia faaroo i ta ˈna ra mau ture. Halelu Ia.