Nehemia

TE INO TUPU RA, E TE FAAORERAAHIA E NEHEMIA RA.

13 Taio ihora ratou i roto i te buka a Mose i taua mahana ra, e te taata atoa i te faarooraa mai; e itea ihora te parau i te papairaahia i roto e, eiaha roa e ati Amona e te ati Moabi ia ô i roto i te amuiraa a te Atua; 2 no te mea aita ratou i farerei mai i te tamarii a Iseraela ma te maa e te pape, tarahu atura râ ia Balaama ei rave ia ratou e ia katarahia ratou; riro atura taua katara ra ei maitai i to tatou Atua. 3 E ite aˈera ratou i taua ture ra, ua faataa ê atura ratou i taua feia rahi anoˈi noa i te ati Iseraela ra.

4 Hou râ ïa, o Eliasiba tahuˈa, tei ia ˈna te faaitoito i te piha no te fare o to tatou Atua, te ati ra oia ia Tobia: 5 e ua hamani hoi oia i te hoê piha rahi no ˈna, ei reira te vaiihoraahia te tusia amu, e te mea noˈanoˈa, e te mau peu ra, e te ahuru o te sitona, e te uaina apî, e te hinu olive, o tei parauhia mai e hopoi na te ati Levi, e na te feia himene, e te feia tiai uputa; e te mau taoˈa na te feia tahuˈa. 6 Aore râ vau i Ierusalema i ravehia ˈi taua mau mea ra: tae aˈera hoi i te toru ahuru ma piti o te matahiti o te arii o Babulonia ra o Aretehasaseta, haere atura vau i te arii ra, e maoro iti aˈera, tuua ihora vau e te arii: 7 e ua hoˈi maira vau i Ierusalema, ite aˈera vau i taua parau ino i ravehia e Eliasiba ra i te faatiaraa i to Tobia hinaaro, i te hamaniraa i te hoê piha no ˈna i roto i te aumoa o te fare o te Atua. 8 Inoino roa aˈera vau; e ua faarue atura vau i te taoˈa a Tobia i rapae i taua piha ra, 9 ua faaue atura vau, e ua rave maira ratou, ua tamâ i taua mau piha ra; e ua faahoˈi i maira vau i te mau farii o te fare o te Atua, e te tusia amu, e te mea noˈanoˈa.

10 Ite atura hoi au i ta te mau ati Levi tufaa, aore i horoahia ˈtu ia ratou; ua horo anaˈe hoi te mau ati Levi, e te feia himene, o tei rave i te ohipa ra, tei to ˈna vahi tei to ˈna vahi. 11 Ua mârô atura vau i te feia tavana, na ô atura vau, Eaha te fare o te Atua i faaruehia ˈi? ua haaputuputu ihora vau ia ratou, e ua tuu atura hoi i to ratou iho toroa. 12 Ua hopoi maira to Iuda atoa ra i te ahuru o te sitona, e te uaina apî, e te hinu olive, i roto i te pueraa ra. 13 Ua haapao atura vau i te feia tiai i taua pueraa taoˈa ra, o Selemia tahuˈa ra, e o Zadoka papai parau ra, e to te mau ati Levi ra, o Pedaia: e ei tauturu ia ratou ra, o Hanana a Zakura, a Matania: e feia haapao maitai hoi ratou, e to ratou toroa ei tufa taoˈa ïa no to ratou mau taeae. 14 E haamanaˈo mai oe ia ˈu, e tau Atua, i teie; eiaha oe e parai ê atu i te hamani maitai no ˈu i te fare o tau Atua e te mau ohipa no te reira.

15 Ite atura vau i Iuda i taua anotau ra i te feia i taataahi i te neneiraa vine i te sabati, e te hopoiraa mai i te rǔrǔ sitona, e te faautaraa i te taoˈa i nia i te asini; e te faahororaa mai ratou i te sabati i te uaina, e te huero vine, e te suke, e te mau hopoia atoa i roto i Ierusalema; e ua faaite atura vau i te mahana e tia ˈi ia hoo i te maa ra. 16 E ua hopoi maira to Turia i parahi i Ierusalema i te iˈa, e te mau taoˈa ěê atoa, e ua hoo i te mau tamarii a Iuda i Ierusalema i te sabati. 17 Ua avau atura vau i taua feia rarahi o Iuda ra, na ô atura vau ia ratou, Eaha teie nei parau ino i ravehia e outou nei, i faaino ai outou i te mahana sabati nei? 18 Aore anei to outou hui metua i na reira, e aore anei to tatou Atua i hopoi mai i teie nei ino i nia ia tatou nei, e i nia atoa i teie nei oire? te hinaaro na anei outou i te faarahi i te riri o te Atua ia Iseraela nei i faaino ai outou i te sabati nei? 19 E marumaru aˈera i na uputa i Ierusalema i mua ˈˈe te sabati, ua parau atura vau e ia opanihia ïa, e ia oti te sabati a iriti ai; e ua tuu atura vau i te tahi pae tavini o ˈu i taua na uputa ra, e eiaha ei hopoia e hopoihia mai i te mahana sabati. 20 Taoto ihora te feia hoo tei hoo i te mau taoˈa atoa ra i rapae au mai i Ierusalema i e fanu pue mahana. 21 Ua parau atura vau ia ratou, na ô atura, Eaha outou i taoto ai i rapae au mai i te aua nei? i na reira faahou outou, e mau outou ia ˈu. Aita ˈtura ratou i tae faahou mai i te sabati. 22 Ua faaue atura vau i te mau ati Levi, e tamâ ia ratou, e haere mai ratou e tiai i na uputa ra, e ia moˈa hoi te sabati. E haamanaˈo mai â oe ia ˈu, e tau Atua, i teie atoa, e faaherehere mai oe ia ˈu i te rahi hoi o te oe aroha.

23 Ite atura hoi au i taua mau mahana ra i te ati Iuda, ua faaipoipo i te vahine Asadoda, e to Amona, e to Moabi; 24 e parau Asadoda hoi te tahi pae parau a taua mau tamarii ra, eita ˈtura e tia ia parau mai i te parau a te ati Iuda, ta te tahi pae râ, e ta te tahi pae. 25 Ua avau atura vau, e ua aˈo atura vau ia ratou; e ua papai au i te tahi pae, e ua hahae i to te tahi pae rouru, e ua faatǎpǔ atura vau ia ratou ia tǎpǔ i te Atua, na ô atura, Eiaha outou e horoa i ta outou mau tamahine na ta ratou mau tamaroa, eiaha hoi outou e rave i ta ratou mau tamahine na ta outou mau tamaroa, e na outou iho hoi. 26 Aore anei te arii o Iseraela o Solomona i hara i taua mea nei? aita râ o ˈna e faito i te arii i te mau fenua atoa e rave rahi, e te herehia hoi e to ˈna Atua, i faariro ai te Atua ia ˈna ei arii no Iseraela atoa; ua hara-atoa-hia râ oia i taua mau vahine ěê ra. 27 O outou anei ta matou e faaroo, i te raveraa i teie nei ino rahi, e hara ˈtura i to tatou Atua, i te faaipoiporaa i te vahine ěê? 28 O te hoê tamaiti ra a Ioiada, a Eliasiba tahuˈa rahi ra, e hunoa ïa no Sanabalata i Horoni; tiahi ê atura vau ia ˈna e reva ˈtura. 29 E haamanaˈo oe ia ratou, e tau Atua, no te mea, ua viivii te toroa tahuˈa ia ratou, o te faufaa hoi a te feia tahuˈa, e ta te ati Levi. 30 Faataa ê atura vau ia ratou i te mau taata ěê ra, e ua haapao atura vau i te toroa o te feia tahuˈa e te ati Levi, o te taata o to ˈna toroa: 31 e no te hopoiraa raau ra, i te mahana i haapaohia ra, e no te oho matamua ra. E manaˈo mai oe ia ˈu, e tau Atua e, ia maitai hoi au.