Paraleipomeno 2
TE ARII VAHINE O SEBA I TE MAERERAA I TE ITE O SOLOMONA RA.
9 E ite aˈera te arii vahine i Seba i te roo ia Solomona, ua haere maira oia e tuu i te piri ia Solomona i Ierusalema, e ma te tiaa rahi atoa; ma te mau kamela i te faahororaa mai i te raau noˈanoˈa, e te auro e rave rahi, e te ofai maitatai. E ia arataihia ˈtura oia ia Solomona ra, ua paraparau atura oia ia ˈna i te mau parau atoa i roto i to ˈna aau. 2 E ua matara maira ia Solomona te mau mea atoa ta ˈna i ui maira: e aita roa e mea i moe ia Solomona i te faaitehia ˈtu e ana. 3 E ite aˈera taua arii vahine o Seba ra i te ite rahi o Solomona, e te fare i faatiahia e ana, 4 e te maa i ta ˈna ra amuraa, e te nahonaho o to ˈna mau tavini, e te atiraa mai o te feia e ati ia ˈna ra, e to ratou ahu; e te mau hopoi auˈa atoa, e to ratou ahu; e te paiumaraa no ˈna, ta ˈna e haere i roto i te fare o Iehova; aita ˈtura e varua o roto ia ˈna. 5 Ua parau atura oia i te arii, E parau mau â ta ˈu i ite i to ˈu ra fenua i ta oe ravea e to oe ite rahi: 6 aita râ vau i faaroo i taua parau ra, e ia tae mai râ vau e ite hua aˈenei au i tau mata: e inaha, aita te rahi o to oe paari i faaitehia mai ia ˈu nei: ua hau â oe i tei faaroohia e au ra. 7 E ao to te mau taata no oe nei, e ao to te mau tavini no oe, o tei tia maite i pihaiiho ia oe a faaroo ai ta oe parau paari. 8 Ia haamaitaihia to Atua o Iehova o tei au atu ia oe, e ua faanoho ia oe i nia i tana terono ei arii na to Atua na Iehova. No te mea, ua aroha to Atua ia Iseraela, e ia vaiiho taiata ratou, i faaarii ai oia ia oe i nia ia ratou, ei rave i te parau au e te parau tia. 9 Ua hopoi atura oia i te auro na te arii hoê hanere e piti ahuru i te taleni, e te raau noˈanoˈa e mea rahi, e te ofai maitatai: aita ïa raau noˈanoˈa i itea mai, i ta te arii vahine o Seba i ho mai na te arii ra na Solomona.
10 E te mau tavini o Hirama, e te mau tavini atoa o Solomona tei uta mai i te auro no Ophira mai, ua hopoi atoa mai i te raau ra i te alamuga e te ofai maitatai. 11 Ua rave ihora te arii i taua raau ra i te alamuga, ei patia no te fare o Iehova, e no te fare atoa no ˈna iho, e te kinura, e te nabala no te feia himene: aita ïa raau i itea mai i taua fenua ra o Iuda mai mutaaiho mai â. 12 Ua horoa ˈtura te arii ra o Solomona i ta te arii vahine o Seba i hinaaro, e ua faahope, i te mau mea atoa ta ˈna i ani ra, e hau atura i ta ˈna i horoa mai i te arii ra, Ua fariu atura oia, haere atura i to ˈna iho fenua, oia e tana mau tavini atoa.
13 E te huru o te teiaha o te auro i tae mai ia Solomona i te matahiti hoê ra, e ono ïa hanere, e ono ahuru, e ono hoi tiahapa i te taleni auro: 14 te taa ra ta te feia hoo ra e ta te feia haaputu ra i hopoi mai. E ua hopoi maira te mau arii i Arabia, e te mau tavana o te mau fenua, i te auro e te ario ia Solomona.
15 Ua hamani ihora taua arii ra o Solomona i te paruru e piti hanere i taua auro ra: hoê paruru, e ono ïa hanere i te sekela i te auro tiapaihia ra. 16 E ua hamani ihora i te paruru huru haihai mai e toru hanere, e auro tiapaihia ra: e toru hanere hoi sekela to te paruru hoê, i te auro tiapaihia ra. Ua tuu atura hoi te arii i roto i te fare i te uru raau i Lebanona.
17 Ua hamani ihora hoi te arii i te terono rahi sena, e ua vehî i te auro maitai ra. 18 E ono taahiraa to taua terono ra, e auro hoi te tuuraa avae, ua mau anaˈe i nia i te terono, e te mauraa rima i te tahi pae e te tahi pae i te parahiraa, e na liona e piti i te tiaraa i pihaiiho i taua mauraa rima ra: 19 e na liona hoê ahuru e ma piti, i te tahi pae e te tahi pae, i te tia-noa-raa i nia i na taahiraa e ono ra. Aita roa ïa mea i te hamaniraahia i te mau fenua atoa.
20 E te mau auˈa atoa a te arii ra a Solomona, e auro anaˈe ïa, e te mau farii atoa i te fare i te uru raau i Lebanona, e auro maitai anaˈe ïa: aita roa e mea ario; aita ïa i haapao-taoˈa-hia i te anotau ia Solomona ra. 21 O te mau pahi o te arii ra, e te mau tavini o Hirama, tei haere i Taresisa: e ia tae i te toru o te matahiti, e hoˈi mai ai taua mau pahi Taresisa ra, i te hopoiraa mai i te auro, e te ario, e te sena, e te kuphi, e te teki.
22 Hau atura taua arii ra o Solomona i te taoˈa e te paari i te mau arii atoa i te ao nei. 23 Ua titau maira te mau arii atoa o te fenua nei ia ite ia Solomona, ia faaroo ratou i to ˈna ite i tuuhia mai e te Atua i roto i tana aau. 24 E ua hopoi ratou te taata atoa ra i ta ˈna iho taoˈa ei ô, i te mau mea ario, e te mau mea auro, e te ahu, e te mauhaa tamaˈi, e te raau noˈanoˈa, e te puaahorofenua, e te pheradi; ei taoˈa matahiti.
25 E maha tausani a Solomona vairaa pereoo e te puaahorofenua, hoê ahuru e piti tiahapa i te tausani i te feia puaahorofenua; tei faanohohia e ana i roto i te mau oire vairaa pereoo ra, e i pihaiiho ia ˈna iho i Ierusalema.
26 Hau atura oia i nia iho i te mau arii atoa, mai te pape mai e tae noa ˈtura i te fenua o te Philiseti, e tae noa ˈtura i te pae Aiphiti ra. 27 Faariro atura te arii i te ario mai te ofai ra te huru, e te arezi riro atura mai te sukamino i te peho ra i te rahi. 28 Ua hopoi maira ratou i te puaahorofenua ia Solomona mai Aiphiti mai, e mai te mau fenua atoa hoi.
29 E te toea o te parau ia Solomona, mai mutaaiho mai e tae noa ˈtu i te hopea, e ere anei ua papaihia ïa i roto i te buka a Natana peropheta, e i roto hoi i te tohu a Ahia i Silo ra, e i roto hoi i te mau orama a Ido hiˈo ra, ia Ieroboama a Nebata? 30 E maha ahuru o Solomona matahiti i te ariiraa i Ierusalema i nia ia Iseraela atoa ra. 31 Taoto atura Solomona i ǒ to ˈna ra mau metua, e tanuhia ihora oia i roto i te oire o to ˈna ra metua o Davida: e monohia aˈera oia i te hau i te tamaiti ra ia Rehoboama.