Paraleipomeno 2
TE ATI ISERAELA I TE HAAPUTUPUTURAA I SEKEMA, E FAAARII IA REHOBOAMA.
10 Haere atura Rehoboama i Sekema: ua hope hoi to Iseraela atoa i te tae mai i Sekema e faaarii ia ˈna. 2 Ite aˈera Ieroboama a Nebata i Aiphiti, i horo hoi oia i reira i te aro o te arii ra o Solomona, e ua pohe Solomona, ua hoˈi maira Ieroboama mai Aiphiti mai. 3 Ua tii atura ratou ia ˈna e haere mai i te apooraa. Ua haere maira Ieroboama e o Iseraela atoa e parau ia Rehoboama, na ô maira, 4 Teiaha roa to te zugo a to metua i nia matou, e tena na, e faahuru mâmâ na oe i ta matou ohipa rahi i to metua ra, e te zugo teiaha ta ˈna i tuu mai i nia ia matou, e faaroo matou ia oe i reira. 5 Ua parau maira oia ia ratou, E hoˈi mai â outou i ǒ nei ia ˈu nei ia rui toru aˈe. Reva ˈtura taua mau taata ra.
6 Ua ui atura te arii ra o Rehoboama i te mau taata paari e tia i mua i tana metua ia Solomona, a ora ˈi oia, na ô atura, E nafea ta ˈu parau ia parau atu i teie nei feia? 7 Ua parau maira ratou ia ˈna na ô maira, Ia hamani maitai oe i teie nei mau taata, e te au ra ta oe parau ia ratou, e ia parau atu oe ia ratou i te parau maitai, e riro ratou ei tavini no oe e a muri noa ˈtu. 8 Ua faarue ihora râ oia i te aˈo a te feia paari i tuu mai ia ˈna ra, e ua ite faahou atura i te parau a te mau taata apî, hoê â paari-atoa-raa e oia hoi, e o tei tavini ia ˈna iho. 9 Ua parau atura oia ia ratou, E nahea vau ia parau atu i teie nei mau taata, o tei parau mai ia ˈu nei, tei na ǒ mai e, E faahuru mâmâ na oe i te zugo i tuuhia mai e to metua i nia ia matou nei? 10 Ua parau maira taua mau taata apî hoê â paari-atoa-raa e oia ihora, na ô maira, E na ô oe i te parau atu i te mau taata i parau mai ia oe ra, o tei na ô mai e, E teiaha rahi to te zugo a to metua i tuu mai i nia ia matou, e faa-huru-mâmâ maira oe ia matou nei; e parau atu oe ia ratou, E rahi hua tau rima iti nei i te tauupu o tau metua. 11 Ua tuu â hoi tau metua i te zugo teiaha i nia ia outou, e rahi hua râ ta outou zugo ia ˈu: ua papai tau metua ia outou i te papai mau, e papai râ vau ia outou i te okerebe. 12 Ua haere maira Ieroboama e te taata atoa ia Rehoboama ra i te rui toru, ta te arii hoi i parau maira, a na ô ai ra e, E hoˈi faahou mai outou ia tae i te rui toru. 13 Ua parau iriâ maira te arii ia ratou; ua faarue hoi te arii ra o Rehoboama i te aˈo a te mau taata paari: 14 e ua parau atura i te parau a te mau taata apî ra, na ô atura, Ua faateiaha hoi tau metua i to outou zugo, e rahi hua râ ta ˈu i te teiaha; i papai â hoi tau metua ia outou i te papai mau, e papai râ vau ia outou i te okerebe. 15 Aita ˈtura te arii i faaroo i te mau taata: te faatupu ra hoi te Atua ra i taua parau nei, ia tia ia Iehova te parau ta ˈna i parau i te vaha o Ahia i Silo ra, ia Ieroboama a Nebata ra.
16 E ite aˈera to Iseraela atoa, e e ore te arii e faaroo mai ia ratou, ua parau atura taua mau taata ra i te arii, na ô atura, Eaha ta matou faufaa ia Davida nei? eaha to matou kelero i te tamaiti a Iese? ei te utuafare mau, e Iseraela e: e tena na, e Davida, e rohi i to oe ra utuafare. Reva anaˈe atura Iseraela i to ratou iho utuafare. 17 Area te mau tamarii a Iseraela i parahi i te mau oire i Iuda ra, e hau ta Rehoboama i nia ia ratou. 18 ua tono atura taua arii ra o Rehoboama ia Hadomara no nia i te taoˈa aufau ra; tuihia ihora oia e te tamarii a Iseraela i te ofai, e pohe roa aˈera; e mai ore mai tae taua arii ra o Rehoboama i nia i te pereoo e horo i Ierusalema. 19 Ua amui aˈera Iseraela i te parau i te utuafare o Davida, e te taa noa ra ratou ei basileia ê, e tae roa aˈenei i teie nei mahana.