Te mau arii 2
TO IOSIA HAERE-FAAHOU-RAA I TE HIERO RA.
23 Ua tono aˈera te arii, e ua haaputuputu maira ia ˈna i te feia paari o Iuda e to Ierusalema. 2 Haere atura te arii i nia i te fare o Iehova, e te mau taata no Iuda, e to Ierusalema atoa ra, e te feia tahuˈa, e te mau peropheta, e te taata atoa, o tei rahi e o tei iti: e ua taio atura oia i roto i to ratou tariˈa i te mau parau atoa i taua buka faufaa i itea i roto i te fare o Iehova.
3 Ua tia noa ihora te arii i te pae pou ra, ua fafau ihora i te tahi faufaa i te aro o Iehova, e e pee oia ia Iehova e e haapao i ta ˈna parau e ta ˈna i faaite mai, e ta ˈna haapaoraa ma te aau atoa e te varua atoa, e ia rave maite i te mau parau no te faufaa i papaihia i roto i teie nei buka. E ua haapao maite atura te mau taata atoa i taua faufaa ra. 4 Ua faaue aˈera te arii i te tahuˈa rahi ra ia Hilikia, e na tahuˈa tauturu, e te mau tiai uputa, e rave mai i te mau auˈa i hamanihia na Baala, i roto i te hiero o Iehova, e ta te idolo o te vahi uru raau, e ta to te raˈi atoa ra; e ua tutui oia i te auahi i rapae au mai i Ierusalema i roto i te mau aua i Kiderona, ua hopoihia râ te rehu i Betela. 5 Ua faaore hoi oia i te mau tahuˈa idolo, tei haapaohia e te mau arii no Iuda ei tutui i te mea noˈanoˈa i nia i te vahi teitei, i roto i te mau oire o Iuda ra, e te mau vahi atoa i pihaiiho i Ierusalema; e o tei tutui i te mea noˈanoˈa na Baala, i te mahana, e te marama, e ia taurua ma, e to te raˈi atoa ra. 6 Ua rave maira oia i te idolo o te vahi uru raau mai roto i te fare o Iehova, i rapae au i Ierusalema, e te pape ra o Kiderona, e ua tutui ihora i te auahi i taua pape ra i Kiderona, e ua taataahi ihora e huˈahuˈa roa aˈera, ua titiri haere i te rehu na nia i te tanuraa o te taata rii ra. 7 Ua vavahi oia i te mau fare o te pâiˈa i pihaiiho i te fare o Iehova, i te vahi e raraahia ˈi e te mau vahine te ahu no te idolo o te uru raau ra.
8 E ua hopoi ê atura oia i te mau tahuˈa i te mau oire atoa o Iuda ra, e ua haaviivii i te mau vahi teitei i tutuihia ˈi e te mau tahuˈa te mea noˈanoˈa, mai Gibea mai e tae noa ˈtura i Bere-seba. Ua vavahi hoi oia i te mau vahi teitei i te tomoraa ra, i te tomoraa o te uputa o te tavana o te oire ra o Iosua, i te pae aui ia tomo i roto i te oire ra. 9 Aore hoi te mau tahuˈa o te mau vahi teitei i faafatata mai i te fata a Iehova i Ierusalema, ua amu râ ratou i te pane faahopue ore i roto i to ratou mau taeae. 10 E au haaviivii oia ia Topheta, i te peho o te tamaiti a Hinoma, ia ore te taata ia pûpû i ta ˈna tamaiti e ta ˈna tamahine i na roto i te auahi ia Moloha. 11 E ua hopoi ê atura oia i te mau puaahorofenua i pûpûhia e te mau arii no Iuda no te mahana, i te tomoraa i te fare o Iehova, i pihaiiho i te piha o Natana-meleha, eunuka, e fare tia hiti; e ua tutui oia i te pereoo no te mahana ra i te auahi. 12 E na fata e vai i nia iho i te fare o Ahaza, tei hamanihia e te mau arii o Iuda ra; e na fata i hamanihia e Manase i roto i na aumoa i te fare o Iehova, ua vavahihia ïa e te arii e pau atura, e ua titiri i te rehu i raro i te pape ra i Kiderona. 13 E ua haaviivii atoa te arii i na vahi teitei i mua iho i Ierusalema, tei te pae atau i te mouˈa ra o Oliveta, i faatiahia e te arii o Iseraela ra e Solomona na Asetarota, e idolo faufau na to Sidona, e na Kimosa, i te idolo faufau na te ati Moabi, e na Milekoma, i te idolo faufau a te tamarii a Amona. 14 E ua vavahi oia i te mau tii ra, e ua tâpû i te mau uru raau, e ua faaîî i taua mau vahi ra i te ivi o te taata pohe.
15 E te fata e vai i Betela, i te vahi teitei, i hamanihia e Ieroboama a Nebata, i hara ˈi Iseraela ia ˈna, taua fata ra e te vahi teitei atoa ra, ua vavahihia ïa e ana, e ua tutui i te idolo no taua vahi teitei ra i te auahi, e ua taataahi e huˈahuˈa roa aˈera, e ua ama atoa te uru raau ia ˈna. 16 Tei te fariuraa o Iosia ra, ite atura oia i te mau vairaa tupapau i nia i te mouˈa ra, e ua faaue aˈera e tii i te mau ivi i roto i taua mau vairaa tupapau ra, e ua tutui aˈera i nia i te fata, viivii atura, ta Iehova hoi i parau maira, ta taua taata na te Atua ra, o tei faaite mai i tau parau nei. 17 Ua na ô maira oia, Eaha tera ra parau ta ˈu e ite nei? Ua parau maira to te oire ia ˈna, O te tanuraa ïa o te taata no te Atua ra, o tei haere mai mai Iuda mai, e ua faaite i teie nei parau ta oe i rave iho nei i te fata i Betela nei. 18 Ua parau maira oia, E vaiiho noa na ïa; eiaha roa ei taata e hauti noa ˈtu i to ˈna ivi. Ua vaiiho noa ihora ratou i to ˈna ivi, e te ivi atoa o te peropheta mai Samaria maira. 19 E te mau fare atoa no te mau vahi teitei i roto i te mau oire i Samaria, ta te mau arii o Iseraela i hamani ei faaoooraa ˈtu ia Iehova ia riri, ua hurihia ïa e Iosia i raro; e ua rave oia i te reira mai ta ˈna atoa i rave i Betela ra. 20 Ua taparahi hoi oia i te mau tahuˈa no te mau vahi teitei i nia i te fata e vai noa i reira; e ua tahu oia i te ivi taata i nia iho, hoˈi maira oia i Ierusalema.
21 Ua faaue atura te arii i te taata atoa, na ô atura, E haapao outou i te pasa na to outou Atua na Iehova, i tei papaihia i roto i te buka faufaa nei. 22 Aita ïa e pasa i te haapaoraahia, mai te anotau mai o te mau tavana o tei faaau i te parau ia Iseraela nei, e te anotau atoa o te mau arii o Iseraela, e te mau arii no Iuda; 23 tei te matahiti hoê ahuru ma vau ra o te arii ra o Iosia i haapaohia ˈi taua pasa nei na Iehova i Ierusalema.
24 E te mau haamori varua ino, e te hiˈohiˈo, e to teraphima, e te mau idolo, e te mau mea faufau atoa i itea i te fenua ra o Iuda, e i Ierusalema, ua faaruehia ïa e Iosia, ia tupu te ture i papaihia i roto i te buka i itea ia Hilikia tahuˈa, i roto i te fare o Iehova ra. 25 Aita ïa arii e au ia ˈna mai mutaaiho mai â, tei fariu ia Iehova ma te aau atoa, e ma te varua atoa, e ma te puai atoa, ia au i te ture atoa a Mose ra; aita hoi o ˈna e faito i tupu i muri aˈe.
26 Aita râ Iehova i faarue i te rahi o to ˈna riri i tupu ia Iuda, no te mau faaooo a Manase i faaooo mai ia ˈna ra. 27 Ua parau maira hoi Iehova, E haamoe atoa ˈtu vau ia Iuda ia moe atoa oia, mai ia ˈu i haamoe atoa ia Iseraela, e faarue au i teie nei oire ia Ierusalema i haapaohia e au ra, e te fare ta ˈu i parau ra, Ei reira tau iˈoa vai ai. 28 E te toea o te parau a Iosia, e ta ˈna atoa i rave ra, e ere anei ua papaihia ïa i roto i te buka, te parau no te mau mahana o te mau arii o Iuda?
29 Tei to ˈna ra anotau to te arii o Aiphiti to Pharao-neko haereraa e rave i te arii o Asura, i te pape ra o Eupharate; ua haere ihora taua arii ra o Iosia e rave ia ˈna; pohe ihora oia ia ˈna i Megido, i te iteraa ˈtu ia ˈna ra. 30 Ua uta pohe noa tana mau tavini ia ˈna na nia i te pereoo mai Megido mai, e tae maira i Ierusalema, e ua tanu atura ia ˈna i roto i to ˈna iho tanuraa. Ua rave aˈera to te fenua ia Iehoahaza a Iosia ra, e ua faatahinu ia ˈna, faariro atura ei arii ei mono i to ˈna ra metua.
31 Ua tae Iehoahaza i te taau ma toru o te matahiti i arii ai oia; e a toru aˈera o ˈna marama i te ariiraa i Ierusalema. Hamutala te iˈoa o to ˈna metua vahine, e tamahine na Ieremia i Libena. 32 Ua rave oia i te parau ino i te aro o Iehova, mai ta te mau metua atoa no ˈna i rave ra. 33 Ua tapea ihora Pharao-neko ia ˈna i Ribela, i te fenua ra o Hamata, eiaha to ˈna ei hau i Ierusalema; ua tuu ihora i te taoˈa aufau i nia i taua fenua ra, hoê hanere taleni ario, hoê hoi taleni auro. 34 Ua faariro aˈera Pharao-neko ia Eliakima a Iosia ei arii, ei mono mai i tana metua ia Iosia ra, e ua ruri aˈera i te iˈoa ia Iehoiakima, rave atura ia Iehoahaza, reva ˈtura i Aiphiti, pohe atura i reira. 35 Ua hopoi atura Iehoiakima i taua ario ra e te auro ia Pharao; ua tuu aˈera râ i te aufau i nia i te fenua, tei parauhia mai e Pharao, ua titau atura oia i te ario e te auro i te taata atoa o te fenua, haapao atura i tei faaauhia i nia i te taata atoa ra, a hopoi ai na Pharao-neko.
36 Tei te matahiti taau ma pae Iehoiakima i arii ai oia; hoê ahuru o ˈna matahiti hoê tiahapa i te ariiraa i Ierusalema, o Zebuda te iˈoa o to ˈna metua vahine, e tamahine na Pedaia i Ruma ra. 37 Ua rave oia i te parau ino i te aro o Iehova, mai ta te mau metua atoa no ˈna ra