Te mau arii 2
HEZEKIA NO TE MEA I FAAITEHIA TO ˈNA POHE, PURE IHORA, E HAAMAORO A I TE AHO.
20 Tei taua mau mahana ra, pohe ihora Hezekia i te maˈi e maˈi pohe. Ua haere maira te peropheta ra o Isaia a Amosa ia ˈna ra, e ua parau maira ia ˈna, te na ô maira Iehova, A haamaitai na i to utuafare; e pohe hoi oe, e ore e ora. 2 Ua fariu aˈera Hezekia i to ˈna mata i te pae paruru e ua pure ia Iehova, na ô atura, 3 Teie tau parau ia oe, e Iehova e, e haamanaˈo mai oe ia ˈu i to ˈu nei haerea i mua ia oe ma te parau mau, e ma te aau tia, e ua rave au i te mea tia ia oe ra. Ua oto roa aˈera Hezekia. 4 E aita Isaia i reva i rapae i te aumoa i ropu ra, i tae mai ai te parau a Iehova ia ˈna, na ô maira, 5 E hoˈi oe e parau atu i te raatira o to ˈu ra mau taata ia Hezekia, Te parau maira te Atua o to tupuna ra o Davida, o Iehova, ua faaroo vau i ta oe pure, ua ite au i to oe roimata: e inaha, e faaora vau ia oe; ia tae i te rui toru ra e tae ai oe i te fare o Iehova. 6 E amui atoa ˈtu vau i to oe ra pue mahana hoê ahuru ma pae i te matahiti; e faaora vau ia oe e teie nei oire i te rima o te arii o Asura ra: no ˈu iho ra e tiai ai au i teie nei oire, e no tau tavini hoi no Davida. 7 Ua parau atura Isaia, A rave i te maa suke; rave ihora ratou, ua taati atu i nia i te maˈi, e ora aˈera oia.
8 Ua parau maira Hezekia ia Isaia, Eaha te tapao e ite ai au e e faaorahia vau e Iehova? e e tae au i roto i te fare o Iehova ia tae i te rui toru ra? 9 Ua parau atura Isaia, teie te tapao ta Iehova e horoa mai ia oe ra, e e rave â Iehova i ta ˈna i parau mai ia oe ra; e hopoi anei i te mǎrǔ i nia i te tapao mahana aˈera i mua, e ia mairi na otia hoê ahuru, e e faahoˈi anei i muri e ia ahuru te otia ia mairi? 10 Ua parau maira Hezekia, E tia noa ia hopoi i te mǎrǔ i mua e ia ahuru te otia ia mairi; eiaha, e faahoˈi râ i te mǎrǔ i muri e ia ahuru te otia ia mairi. 11 Ua parau atura Isaia peropheta ia Iehova: e ua faahoˈi maira oia i taua mǎrǔ ra e hoê ahuru aˈera otia i mairi, ua reva hoi i mua i nia i te tapao mahana a Ahasa.
12 I reira to Berodaka-baladana a Baladana, arii no Babulonia haponoraa mai i te leta, e na tiatia vea atoa ma te taoˈa atoa na Hezekia: ua ite aˈera e, ua pohe Hezekia i te maˈi. 13 Faaroo aˈera Hezekia ia ratou ra, e ua faaite atura i te mau fare pueraa taoˈa na ˈna iho, i te ario, e te auro, e te mau raau noˈanoˈa, e te monoˈi maitai ra, e te fare o te mauhaa tamaˈi na ˈna ra, e te mau mea atoa i roto i te pueraa taoˈa na ˈna: aore roa e taoˈa i toe i roto i to ˈna fare, i to ˈna atoa ra basileia i ore i faaitehia e Hezekia.
14 Ua haere maira Isaia peropheta i te arii ra ia Hezekia ra, e ua parau maira ia ˈna, Mai hea mai teie nei feia, e nahea mai ratou ia oe? Ua parau atura Hezekia, Mai te fenua roa mai ratou, mai Babulonia mai. 15 Ua na ô maira oia, Eaha ta ratou i ite i roto i to fare na? Ua parau atura Hezekia, I te mau mea atoa i roto i tau fare nei ua ite ïa ratou: aita roa a ˈu e taoˈa toe i te faaitehia e au ia ratou. 16 Ua parau maira Isaia ia Hezekia, A faaroo mai na i te parau a Iehova, 17 Inaha, te fatata maira te mahana, e paoo roa ˈtu ai te mau taoˈa atoa i roto i to fare, e ta to mau metua i vaiiho e tae roa aˈenei i teie nei mahana, i te hopoihia i Babulonia: e ore roa e faatoehia, te parau maira Iehova. 18 E to mau tamarii ra ta oe e fanau ra, e pau atoa i te hopoi-ê-hia; e riro hoi ratou ei eunuka i te fare o te arii o Babulonia. 19 Ua parau atura Hezekia ia Isaia, E parau maitai te parau a Iehova ta oe i parau maira: e ua na ô maira e, E ere anei ei hau e te parau mau i to ˈu nei anotau?
20 E te toea o te parau a Hezekia, e to ˈna hoi puai, e te pape hopuna i ravehia e ana, e te faataheraa i tae mai ai te pape i roto i te oire, e ere anei ua papaihia i roto i te buka, te parau no te mau mahana o te mau arii no Iuda? 21 Taoto ihora Hezekia i ǒ tona ra mau metua; monohia aˈera te hau i te tamaiti ra ia Manase.