Te mau arii 2
O HEZEKIA I TE TONORAA I TE VEA IA ISAIA RA.
19 Ite aˈera taua arii ra o Hezekia, ua hahae i to ˈna ahu, e ua tapoˈi ia ˈna i te ahu oto, haere atura i roto i te fare o Iehova. 2 Ua tono aˈera oia ia Eliakima, no nia i te utuafare, e ia Sebena papai parau, e te feia tahuˈa taata paari ra, ma te ahu oto i te tapoˈiraahia, ia Isaia peropheta a Amosa ra. 3 Ua parau maira ratou ia ˈna, Te na ô maira Hezekia, E mahana ahoaho teie, e te faaino, e te tâhitohito: ua fatata hoi te tamarii i te fanau, e aita e puai e tia ˈi. 4 Peneiaˈe ua faaroo to Atua ra o Iehova i te parau a Rabasake, o tei tonohia mai ïa e to ˈna ra fatu e te arii no Asura e faaino i te Atua ora nei; peneiaˈe o te haapao mai to Atua o Iehova i te mau parau to ˈna e faaroo nei: e tauturu mai hoi oe i te pure i na taata rii e toe nei.
5 Ua haere ihora te mau tavini o te arii ra o Hezekia ia Isaia ra; 6 ua parau maira Isaia ia ratou, E na ô atu outou i to outou fatu; Te parau maira Iehova, Eiaha e mǎtaˈu i te parau ta oe i faaroo aˈenei, ta te mau tavini o te arii o Asura i faaino mai ia ˈu ra. 7 Inaha, e aau ê ta ˈu e tuu i roto ia ˈna, e riro oia i te ite mai i te parau, a hoˈi ai oia i to ˈna ra fenua mau; e pohe oia ia ˈu i te ˈoˈe ia tae i to ˈna fenua mau.
8 E ua hoˈi atura Rabasake, roohia ˈtu te aro ra te arii no Asura ia Libena; ua ite aˈera oia e ua faaruehia Lakisa. 9 E parauhia maira oia i reira; na ôhia maira, Inaha hoi te arii o Kusa o Tirahaka, te haere maira e aro ia oe, ua tono faahou oia i te vea ia Hezekia, na ô atura, 10 E na ô outou ia parau atu i te arii o Iuda ra ia Hezekia, e parau atu outou, Eiaha to Atua, ta oe e tiaturi na, e haavare mai ia oe ra, i te na ôraa mai e, E ore Ierusalema e tuuhia ˈtu i te rima o te arii o Asura ra. 11 Inaha, ua ite hoi oe i ta te mau arii o Asura i rave i te mau fenua atoa, e rave haapau roa ïa: e o oe anei te ora? 12 Ua faaora anei te mau atua i te mau fenua i pau i tau mau metua ra; ia Gozana, e ia Harana, e ia Rezepha, e te mau tamarii i Edena i parahi i Telasera? 13 Teihea ihora te arii o Hamata, e te arii o Araphada, e te arii o te oire ra o Sepharavaima, o te Hena, e to Iva?
14 Ua rave maira Hezekia i taua leta i te rima o te mau tiatia vea ra, e ua taio ihora; haere atura Hezekia i nia i te fare o Iehova ra, e ua hohora ˈtura i taua leta ra i mua i te aro o Iehova. 15 Ua pure ihora Hezekia i mua i te aro o Iehova, na ô atura, E te Atua o Iseraela, e Iehova e, e tia oe i ropu i na kerubi, o oe te Atua, oe anaˈe ra, no te mau fenua atoa o te ao nei; na oe hoi te raˈi e te fenua nei i hamani. 16 E faarooroo mai to tariˈa, e Iehova, ia ite; e nânâ mai i to mata e hiˈo: e faaroo mai oe i te parau a Senakeriba i hapono mai ei faaino i te Atua ora nei. 17 E parau mau â hoi, e Iehova, ua pau te mau etene e to ratou fenua i te mau arii no Asura, 18 e ua huri i to ratou mau atua i roto i te auahi: e ere râ ïa te atua, e mea hamanihia ïa e te rima taata, e raau e te ofai: i pau ai ratou. 19 E teie nei, e to matou Atua, e Iehova, o ta ˈu ïa parau ia oe, e faaora oe ia matou i tana rima, ia ite te mau basileia atoa o te ao nei, e o oe anaˈe ra te Atua o Iehova.
20 Ua tono aˈera Isaia a Amosa i te vea ia Hezekia, na ô atura, Te parau maira te Atua o Iseraela o Iehova; ta oe i pure mai ia ˈu nei, i te arii o Asura ia Senakeriba, ua faaroohia e au. 21 Teie te parau a Iehova i parau mai ia ˈna; Te tamahine paretenia ra o Ziona tei faaino ia oe, ua atahia oe e ua vahavahahia; ua ueue te tamahine ra o Ierusalema i tana upoo ia oe. 22 O vai ta oe e faafaufau mai e te faaino hoi, o vai ta oe e faateitei i to reo, e ua hiˈo to mata i nia? E ere anei i Tei Moˈa i Iseraela nei? 23 Ua faatiotioo oe ia Iehova, i te mau vea na oe ra, e ua parau e, Ua tae au i nia i te mouˈa i te rahi o to ˈu ra mau pereoo, i te pae i Lebanona ra, e ua motu ia ˈu te mau arezi teitei e te berusi here na ˈna ra; e ua tae au i roto i te vahi moe na ˈna, e i roto i te uru raau i te ô maitai no ˈna ra. 24 Ua ôhia e au e ua inu i te pape ê, e ua paapaamǎrô ia ˈu te mau pape no te mau vahi i auahia ra, i to ˈu ra avae! 25 Aita oe i ite e, na ˈu i haapao i te reira mai tahito mai â? e ua opuahia e au mai mutaaiho mai â? e teie nei; ua faatupuhia e au, ia riro oe ei faariro i te mau oire etaeta ei puea. 26 I ore i puai ai to reira, ua mǎtaˈu ratou e ua ahoaho; ua riro mai te aihere i roto i te ô ra, e mai te raau rii tupu apî ra; mai te aihere e tupu i nia i te fare; mai te aupara aore i hope i te tupu ra. 27 O to oe ra parahiraa, e to oe haereraa ˈtu, e to oe hoˈiraa mai, e to oe riri ia ˈu ra, ua ite ïa vau; 28 no to oe ra, riri ia ˈu ra, e ta oe tâhito, ua tae roa i to ˈu nei tariˈa; e oomo vau i tau mǎtau i roto i to apoo ihu, e tau tavaha i roto i to taa na, a faahoˈi ai au ia oe na te eˈa i haerehia mai e oe ra. 29 Teie hoi ta oe tapao, Hezekia; E amu outou i te mea tupu noa i teie nei matahiti, e te piti o te matahiti i tei tupu i te reira ra; e ia tae i te toru o te matahiti, e ueue ïa a ooti ai, a tanu ai i te ô vine, a amu ai i te maa. 30 E toro hoi te aa ra i te toea o te utuafare o Iuda i raro, a hotu ai i nia. 31 E reva hoi te toea mai Ierusalema ˈtu, e te feia i ora mai te mouˈa mai o Ziona: na te itoito o te Atua sabaota ra o Iehova, e rave i te reira. 32 Te parau maira Iehova i te arii o Asura ra, e ore oia e tae mai i teie nei oire, e ore ta ˈna ohe e pee mai i reira, e ore oia e haere mai ma te paruru, e ore e faateitei i te repo i teie nei oire. 33 E hoˈi oia na te eˈa haerehia mai e ana; e ore oia e ô mai i teie nei oire, te parau maira Iehova. 34 Na ˈu hoi e tiai i teie nei oire ia ora, no ˈu iho, e no tau tavini no Davida.
35 Ua haere ihora te hoê melahi a Iehova i taua rui ra i rapae, ua rave ihora i to te puhapa Asura ra hoê hanere e vau ahuru ma pae i te tausani, e ia tia te feia i toe ia poipoi aˈe, inaha, e tupapau anaˈe. 36 Reva ˈtura te arii o Asura o Senakeriba, parahi atura i Nineve. 37 Te haamori ra oia i roto i te fare o to ˈna atua o Neseroka, ua tairi ihora na tamarii no ˈna o Aderameleka raua o Sarezera ia ˈna i te ˈoˈe: reva ˈtura raua i te fenua ra o Aremenia. Monohia aˈera oia i te hau i te tamaiti ia Esarahadona.