Te mau arii 2

HOSEA E TO ˈNA HAU INO, E SAMARIA I TE PAU-ATOA-RAA.

17 Tei te matahiti hoê ahuru ma piti o te arii o Iuda o Ahaza, i arii ai Hosea a Ela i Samaria, i nia ia Iseraela; e iva hoi o ˈna matahiti i te ariiraa. 2 Ua rave hoi oia i te parau ino i te aro o Iehova, eiaha râ mai te mau arii o Iseraela i mua ˈˈe ia ˈna ra.

3 Oia tei haerehia mai e te arii o Asura ra e Salamanesera; riro atura hoi Hosea ei tavini no ˈna, e ua hopoi i te taoˈa na ˈna. 4 Itea ihora râ ta Hosea haavare i te arii o Asura ra; i tono na hoi oia i te vea i te arii o Aiphiti ia Soa, e aita i hopoi mai i te taoˈa matahiti na te arii o Asura mai tei mutaaihora; mau ihora oia i te tapeahia e te arii o Asura, e ruuruuhia ihora i roto i te tapearaa.

5 Ua haere ihora hoi taua arii o Asura ra na ropu i te fenua ra, e ua haere ihora i Samaria, e ua aro atura e a toru aˈera matahiti i te aroraa.

6 E tae aˈera i te iva o to Hosea matahiti, i pau ai Samaria i te arii o Asura ra, e ua hopoi-ê-hia aˈera Iseraela i Asura, e ua faanoho ihora ia ratou i pihaiiho i te pape ra o Gozana i Hala e i Habora, e te mau oire atoa o te Medai. 7 I na reirahia ˈi ratou, no te mea ua hara te tamarii a Iseraela i to ratou Atua ia Iehova, o tei aratai mai ia ratou mai te fenua maira mai Aiphiti, mai raro mai i te rima o te arii o Aiphiti ra o Pharao, e ua mǎtaˈu hoi ratou i te mau atua ěê. 8 E ua haapao hoi i te parau a te mau fenua i faarue-ê-hia e Iehova i mua i te aro o te tamarii a Iseraela, e tei papaihia hoi e te mau arii o Iseraela ra. 9 Ua imi ihora hoi te tamarii a Iseraela i te parau tia ore, aore aˈera i au i te parau a to ratou Atua a Iehova; e ua patu ihora ratou i te mau vahi teitei i to ratou atoa ra mau oire, mai te pare o te mau tiai e tae noa ˈtu i te oire auahia ra. 10 E ua faatia aˈera i te tii no ratou, i te idolo o te uru raau i te mau aivi teitei atoa ra, e i raro aˈe i te mau raau mǎrǔmǎrǔ atoa ra. 11 I reira, i nia i taua mau vahi teitei ra ta ratou tutuiraa i te mea noˈanoˈa, mai te mau fenua i pau ia Iehova i mua i to ratou aro. Ua na reira ratou i te rave i te parau ino ei faaririraa ˈtu ia Iehova. 12 Ua haamori hoi ratou i te idolo, i tei parauhia mai ratou e Iehova ra, Eiaha outou e na reira. 13 Ua faaite maira hoi Iehova ia Iseraela, e ia Iuda i te vaha o te mau peropheta, e te mau hiˈo atoa ra, na ô maira, A fariu mai outou i ta outou mau parau ino, e haapao i ta ˈu ra mau parau e ta ˈu ra mau peu, e te ture atoa ta ˈu i parau atu i to outou mau metua, e ta ˈu i hapono atu ia outou, i te vaha o tau mau tavini te mau peropheta atoa ra. 14 Aitâ râ ratou i faaroo mai, ua mârô râ ratou mai to ratou mau metua atoa tei ore i faaroo i to ratou ra Atua ia Iehova. 15 Ua faarue hoi ratou i ta ˈna mau peu, e te faufaa na ˈna ta ˈna i fafau i to ratou ra mau metua: e ta ˈna hoi i faaite hua roa i roto ia ratou; ua pee atura ratou i te idolo maamaa, e ua maamaahia ratou, e ua pee i te mau fenua i haatihia ˈi ratou ra, o tei parauhia mai ratou e Iehova e, eiaha mai ta ratou ra te rave. 16 Ua faarue hua ra ratou i te mau parau atoa a to ratou Atua a Iehova, e ua hamani i te hohoˈa i faatôhia, na kafa e piti ra; e ua hamani hoi ratou i te idolo no te uru raau e ua haamori i to te raˈi atoa ra, e ua haapao atoa ia Baala. 17 E ua hopoi i ta ratou mau tamarii tamaroa, e te mau tamarii tamahine na roto i te auahi ia Moloha; e na ratou hoi te pifao e te hiˈo; e ua horoa ratou ia ratou ino ei rave i te parau ino i te aro o Iehova, ia tupu to ˈna riri. 18 Riri roa aˈera Iehova ia Iseraela, e ua faataa ê atu ia ratou ia moe atu: aore i toe maori râ o te opu o Iuda ra. 19 Aita atoa hoi Iuda i haapao i te parau a to ratou Atua a Iehova, haapao atura râ i te mau haapaoraa ta te mau arii no Iseraela i faatupu ra. 20 Faarue-roa-hia ihora te huaai o Iseraela e Iehova, e ua tuu atu i te pohe i nia ia ratou, e ua horoa ia ratou i te rima o te feia i rave ino mai, e pee ê atura ratou e aita oia i ite atu. 21 Ua hahae maira te ati Iseraela i te utuafare o Davida; e ua faaarii ratou ia Ieroboama a Nebata ra, e na Ieroboama i tiahi ia Iseraela ia ore ia pee ia Iehova, e ua hara rahi roa ratou ia ˈna. 22 Ua haapao hoi te tamarii a Iseraela i te mau hara atoa a Ieroboama ta ˈna i rave ra; aore ïa ratou i faarue i te reira. 23 E maoro aˈera, faataa ˈtura Iehova ia Iseraela ia moe atu, ta ˈna hoi i parau mai i te vaha o tana mau tavini peropheta atoa ra. Reva ˈtura Iseraela mai roto atu i to ˈna iho fenua e tae atura i Asura, e tae roa aˈenei i teie nei mahana. 24 Ua hopoi maira te arii no Asura i te taata no Babulonia, e no Kuta, e no Ava, e no Hamata, e no Sepharavaima, e ua faanoho i te mau oire i Samaria ra, ei mono i te tamarii a Iseraela; riro atura Samaria ia ratou, e ua parahi i to reira mau oire. 25 To ratou ra parahiraa i reira i mutaaihora, aore ratou i mǎtaˈu ia Iehova; ua tuu maira Iehova i te liona i roto ia ratou, e rave rahi tei pohe roa i te liona. 26 Ua parau atura ratou i te arii o Asura, na ô atura, O te mau fenua i hopoihia e oe, e ua faanohohia i te mau oire i Samaria ra, aore ïa i ite i te haamori i te Atua no taua fenua ra; e ua tuu mai oia i te liona i roto ia ratou E inaha, ua pau ratou i te liona, no te mea aita ratou i ite i te haamoriraa i te Atua o taua fenua ra. 27 Ua parau maira taua arii no Asura ra, na ô maira, A aratai na i te hoê tahuˈa i arataihia mai e outou na; e na ˈna e haere e parahi i reira, e na ˈna ratou e haapii i te huru o te haamoriraa i te Atua no taua fenua ra. 28 Ua haere maira te hoê tahuˈa ta ratou i aratai mai mai Samaria maira e ua parahi i Betela, e ua haapii oia ia ratou i te haamori ia Iehova. 29 Ua hamani râ te mau fenua atoa i te atua no ratou iho, e ua tuu i roto i te mau fare o taua mau vahi teitei ta to Samaria i hamani ra; ua na reira to te mau fenua i ta ratou mau oire e parahi ra. 30 Ua rave aˈera to Babulonia ia Sukota-benota, ua rave aˈera to Kuta ia Neregala, ua rave aˈera to Hamata ia Asima. 31 Ua rave aˈera to Ava ia Nibehaza e ia Tarataka; ua tutui hoi to Sephara-vaima i ta ratou tamarii i te auahi no Adarameleka raua o Anameleka, na atua no Sepharavaima. 32 Ua mǎtaˈu â hoi ratou ia Iehova, ua rave râ ratou i te taata rii atoa ua faariro ei tahuˈa no te mau vahi teitei ra, o tei hopoi i te tusia na ratou i roto i te mau fare no taua mau vahi teitei ra. 33 Ua mǎtaˈu â hoi ratou ia Iehova, ua haamori râ i to ratou ihora mau atua, mai te mau fenua atoa no reira mai ratou. 34 Te haapao noa ra ratou i teie nei â i ta ratou iho mau peu, e ere hoi o Iehova anaˈe ra ta ratou e mǎtaˈu, aore hoi e haapao i te mau peu e te mau parau, e te ture, e te mau parau a Iehova i parau mai i te tamarii a Iakoba, tei mairihia e ana, ia Iseraela ra: 35 tei fafauhia e Iehova te faufaa ia ratou, e tei aˈohia e ana e, Eiaha outou e mǎtaˈu i te atua ěê, eiaha e piˈo i raro ia ratou, eiaha e hopoi i te tusia ia ratou, eiaha e haamori ia ratou: 36 o Iehova râ, o tei aratai mai ia outou mai te fenua maira mai Aiphiti, ma te mana rahi, e ma te rima i faatorohia ra, oia ta outou e mǎtaˈu, oia ta outou e haamori, e hopoi hoi outou i te tusia na ˈna. 37 E te haapaoraa, e tei faaauhia ra, e te ture, e te mau peu i papaihia e ana, o ta outou ïa e haapao eiaha e faaea; area te mau atua ěê ra, eiaha outou e mǎtaˈu i te reira. 38 E te faufaa i fafauhia e au ia outou ra, eiaha outou e haamoe i te reira; eiaha hoi e haamori i te mau atua ěê. 39 O to outou râ Atua o Iehova, o ta outou ïa e mǎtaˈu, e na ˈna outou e faaora i te rima e to outou mau enemi atoa ra. 40 Aita aˈera râ ratou i faaroo, haapao atura ratou i ta ratou mau peu tahito ra. 41 Ua mǎtaˈu hoi to teie nei mau fenua ia Iehova, e ua haamori hoi i to ratou iho mau idolo taraihia ra: mai ta to ratou mau metua ra, ua na reira atoa ta ratou mau tamarii, e to ratou maa mootua, e tae roa aˈenei i teie nei mahana.