Te mau arii 1
TE PITI O TO TE ATUA HAERE-FAAITE-RAA MAI IA SOLOMONA I TE ORAMA RA.
9 E oti aˈera te fare o Iehova i te faatiahia e Solomona, e te fare o te arii, e te mau mea atoa ta Solomona i hinaaro i te rave, 2 ua fa maira Iehova ia Solomona ra, o te piti ïa i te faraa mai, mai ia ˈna atoa i fa mai ia ˈna i Gibeona. 3 Ua parau maira Iehova ia ˈna, Ua faaroo vau i to pure e ta oe aniraa, i ta oe i pure mai ia ˈu ra: ua haamoˈahia e au taua fare i faatiahia e oe ra, ei reira ta ˈu iˈoa vai ai e a muri noa ˈtu; ei reira hoi tau mata e tau aau vai mau atu ai. 4 E ia faito atoa to oe haerea i mua ia ˈu nei mai to metua ra ia Davida, ma te haapao maitai o te aau, e ma te parau-tia, i te haapao-maite-raa i ta ˈu i parau atu ia oe ra, e ia rave oe i ta ˈu ra mau haapaoraa, e ta ˈu ra mau parau: 5 e haamau vau i to oe ra terono i to oe ra basileia i nia ia Iseraela e a muri noa ˈtu; ta ˈu hoi i parau atu i to metua ra ia Davida, a na ô ai au ra e, Eita e ore te hoê o to oe ra huaai i te parahi i nia i te terono o Iseraela, 6 Ia fariu ê râ outou e ta outou mau tamarii, e ia ore ia pee mai ia ˈu, e ia ore hoi ia haapao mai i ta ˈu parau, e ta ˈu ra mau peu, i tuuhia ˈtu e au i mua i to outou aro, e ia haere ia faaroo i te mau atua ěê, e ua haamori ia ratou; 7 e tâpû-ê-hia e au Iseraela i reira i te fenua i horoahia e au no ratou ra, e teie nei fare i haamoˈahia e au i to ˈu nei iˈoa, e faarue-ê-hia ïa e au e ia moe atu, e riro hoi Iseraela i te taua-parau-hia, e ei parabole i te taata atoa ra: 8 e teie nei hoi fare i haamaitai-rahi-hia nei, e riro te taata atoa i te maere, e te hiˈo; e riro i te na ô mai e, Eaha ra Iehova i na reira mai ai i teie nei fenua, e teie nei fare? 9 E riro hoi te tahi pae i te na ô mai e, No te mea ua faarue ratou i to ratou Atua ia Iehova, tei aratai mai i to ratou mau metua mai te fenua maira mai Aiphiti; e ua ati ratou i te mau atua ěê, e ua haamori ia ratou, ua faaroo ia ratou; i hopoi mai ai Iehova i teie nei ino i nia ia ratou.
10 E hope aˈera na matahiti hoê taau ra, e oti aˈera na fare e piti i te faatiahia e Solomona, te fare o Iehova, e to te arii ihora fare; 11 no te mea ua horoa mai te arii o Turia ra o Hirama ia Solomona i te arezi, e te berusi, e te auro, e mâhâ aˈera to ˈna hinaaro, ua hopoi atura te arii ra o Solomona i te oire na Hirama hoê taau i te fenua ra i Galilea. 12 Ua haere maira Hirama mai Turia mai e hiˈo i taua na oire i ho-mai-hia mai e Solomona; aita aˈera râ i au ia ˈna. 13 Ua na ô aˈera oia, Eaha teie nei mau oire ta oe i ho mai na ˈu nei, e tau taeae? Mairi ihora oia i taua fenua ra ia Kabula, te iˈoa noa iho â ïa e tae roa aˈenei i teie nei mahana. 14 Ua hapono maira Hirama i na taleni auro na te arii hoê hanere e piti ahuru.
15 Teie te mea i faataahia ˈi te hoê pǔpǔ taata e Solomona; ei faatia i te fare o Iehova, e te fare no ˈna iho, e Milo, e te patu i Ierusalema, e Hazora, e Megido, e Gezera. 16 Ua reva maira hoi Pharao te arii o Aiphiti e ua pau Gezera ia ˈna, ua ama i te auahi, e ua pau te ati Kanaana tei parahi i taua oire ra i te taparahihia, e ua horoa mai na te tamahine, na te vahine a Solomona; 17 ua faatia faahou ra Solomona i Gezera, e Bete-horona i ǒ nei mai, 18 e Baalata, e Tadamora i te medebara, i te fenua ra o Zoba, 19 e te mau oire vairaa taoˈa na Solomona, e te mau oire no te pereoo no ˈna, e te oire no te feia horo puaahorofenua no ˈna ra, e te mau mea atoa ta Solomona i hinaaro i te faatia i Ierusalema, e i Lebanona, e i te mau fenua i roto i to ˈna ra hau. 20 E te feia ati Amori i toe ra, e te ati Heta, e te Perizi, e te ati Heva, e te ati Iebusi, e ere i to te tamarii a Iseraela, 21 e tamarii râ na te feia i vaiihohia i nia i te fenua ra, tei ore i pau i te tamarii a Iseraela; o ta Solomona ïa i faataa i te hoê pae ei rave ohipa e tae roa aˈenei i teie nei mahana. 22 Aita râ te tamarii a Iseraela i faataahia e Solomona ei rave ohipa; e taata ïa no te tamaˈi e tavini no ˈna, e hui raatira, e feia raatira, e te faahoro pereoo, e te feia puaahorofenua no ˈna ra. 23 Teie na taata rarahi i te feia i faaitoito i te ohipa a Solomona, e pae hanere, e pae hoi ahuru, o tei faaite ïa i te feia i rave i taua ohipa ra.
24 E tae maira te tamahine a Pharao mai te oire mai o Davida ra, i to ˈna ra fare i faatiahia e Solomona no ˈna ra, ua faatia aˈera ia Milo.
25 A toru aˈera o Solomona hopoiraa i te tusia taauahi, e te tusia no te maitai i nia i te fata i faatiahia e ana na Iehova, i te matahiti hoê: e oti aˈera taua fare ra ia ˈna, ua tutui oia i te mea noˈanoˈa i nia i te fata i mua i te aro o Iehova.
26 Ua tarai hoi te arii ra o Solomona i te pahi i Ezioni-gebera, i pihaiiho i Elota, i tahatai i te miti uteute, i te fenua ra o Edoma. 27 Ua faaue aˈera Hirama i to ˈna iho tavini e amui atoa i te mau tavini o Solomona i nia i te pahi ra, e ihitai anaˈe ïa feia. 28 E reva ˈtura ratou i Ophira, e ua rave maira i te auro; e maha hanere e piti ahuru i te taleni, e ua hopoi maira i te arii ra ia Solomona.