Te mau arii 1
TE ARII VAHINE O SEBA I TE HAEREA MAI IA SOLOMONA RA.
10 E ite aˈera te arii vahine o Seba i te roo o Solomona, e te iˈoa o Iehova, ua haere maira oia e ui ia ˈna i te parau imi-atâ. 2 Oia e te taata atoa e rave rahi i te taeraa mai i Ierusalema; e ma te kamela i te faahororaa mai i te raau noˈanoˈa, e te auro e rave rahi, e te ofai maitatai. E tae atura oia ia Solomona, ua paraparau ihora oia i te mau parau atoa i roto i tana aau. 3 Ua faaite atura Solomona i te mau parau atoa ta ˈna i ui maira, aore roa ana e parau moe i te arii, tei ore i faaitehia ˈtu ia ˈna. 4 E ite aˈera taua arii vahine o Seba ra i to Solomona paari, e te fare i faatiahia e ana ra, 5 e te maa i ta ˈna ra amuraa, e te nahonaho o to ˈna mau tavini, e te tiaraa o te feia no pihaiiho ra, e to ratou ahu, e te feia hopoi auˈa, e te mau tusia taauahi i hopoihia e ana i te fare o Iehova; aita ˈtura e varua i roto ia ˈna. 6 Ua parau atura oia i te arii, E parau mau â ta ˈu i faaroo i to ˈu ra fenua, i ta oe ravea e to oe paari. 7 Aita râ vau i faaroo i taua roo ra, ia tae hua maira vau, e ia ite hua ta ˈu mata nei: e inaha, te toe nei te rahi i te parau aore â i faaitehia mai ia ˈu: ua hau ê atura to oe paari e to oe mana i tei faaitehia mai ia ˈu nei. 8 E ao to te mau taata no oe! e ao to teie nei mau tavini, e tia noa i pihaiiho ia oe nei, faaroo ai i te parau paari na oe na! 9 Ia haamaitaihia to Atua, o Iehova, oia i au mai ia oe, e ua tuu ia oe i nia i te terono i Iseraela nei: no to Iehova aroha vairaa mure ore ia Iseraela, i haapao ai oia ia oe ei arii, ei haapao i te parau mau e te parau-tia. 10 Ua hopoi atura oia i na taleni auro na te arii hoê hanere e piti ahuru, e te raau noˈanoˈa e rave rahi, e te ofai maitatai: aita ˈtu e raau noˈanoˈa i te rahi i tae mai maori râ o tei horoahia mai e te arii vahine o Seba i te arii ra ia Solomona.
11 E te mau pahi atoa a Hirama, o tei uta mai i te auro mai Ophira mai, ua uta atoa mai i te raau ra i te alamuga mai Ophira mai â, e te ofai maitatai. 12 Ua rave ihora te arii i taua raau ra i te alamuga ei patia no te fare o Iehova e no to te arii iho fare; e te kinura, e te nabala no te feia himene ra: aita ïa alamuga i te taeraa mai e te itearaa, e tae roa aˈenei i teie nei mahana. 13 Ua horoa ˈtura te arii ra o Solomona i ta te arii vahine o Seba i hinaaro ra, ta ˈna i ani maira, te taa ˈtura ta te arii ra ta Solomona i horoa noa ˈtura. Hoˈi atura oia reva ˈtura i to ˈna fenua mau, oia e to ˈna mau tavini.
14 E te teiaha o te auro i tae mai ia Solomona i te matahiti hoê, e ono ïa hanere e ono ahuru e ono tiahapa taleni auro; 15 te taa ˈtura tei noaa mai ia ˈna i te feia i hoo haere ra, e ta te feia i hoo i te raau noˈanoˈa ra, e ta te hui arii i Arabia ra, e te feia tavana o te fenua ra.
16 Ua hamani ihora Solomona i e piti hanere i te paruru auro i tupaihia ra; hoê paruru ra e ono ïa hanere sekela auro. 17 Ua hamani ihora hoi oia i te toru hanere paruru rii, e auro tupaihia; hoê paruru, e toru ïa mina i te auro; ua tuu aˈera te arii i te reira i roto i te fare i te uru raau i Lebanona ra.
18 Ua hamani ihora te arii i te terono rahi sena ra, e ua tapoˈi i te auro maitai ra. 19 E ono taahiraa to taua terono ra, e i nia iho i taua terono ra, e mea porotaa ïa i muri mai; e te vai ra te mauraa rima i te parahiraa i te tahi pae, e te tahi pae, e na liona e piti i te tiaraa i pihaiiho i taua mauraa rima ra. 20 E i nia iho i taua na taahiraa e ono ra, e ono atoa liona i te tahi pae, e e ono hoi i te tahi pae i te tiaraa: aita ïa i hamanihia i te mau basileia atoa ra.
21 E te mau auˈa inu atoa a te arii ra a Solomona, e auro anaˈe ïa, e te mau auˈa atoa o te fare i te uru raau i Lebanona, e auro maitai anaˈe ïa; aita roa te hoê farii ario: aore hoi te reira i riro ei taoˈa i te anotau ia Solomona ra. 22 E pahi Taresisa ta te arii tei te moana, o tei reva atoa e te mau pahi a Hirama i Taresisa ra, hoê â revaraa e toru atoa matahiti, e te faahororaa mai i te auro, e te ario, e te sena, e te kuphi, e te teki.
23 Hau ê atura te arii ra o Solomona i te taoˈa e te paari i te hui arii atoa o te ao nei. 24 Ua imi maira to te mau fenua atoa ia Solomona, ia ite ratou i te paari i tuuhia mai e te Atua i roto i tana aau ra. 25 Ua hopoi maira ratou i te taata atoa ra, i tana ihora ô, i te taoˈa ario, e te taoˈa auro, e te ahu, e te taoˈa tamaˈi, e te raau noˈanoˈa, e te puaahorofenua, e te pheradi, to tera matahiti, to tera matahiti.
26 Ua haaputu ihora Solomona i te pereoo, e te feia i faahoro i te puaahorofenua; hoê a ˈna tausani i te pereoo, e maha hoi hanere, hoê ahuru e piti tiahapa i te tausani i te faahoro puaahorofenua, o tei haaparahihia e ana i roto i te oire pereoo, e pihai-atoa-iho i te arii i Ierusalema. 27 Riro atura te ario mai te ofai ra i Ierusalema i te arii ra; e te arezi mai te sukamino i te peho ra i te rahi.
28 E puaahorofenua e te aho vavai ta Solomona i hopoihia mai mai Aiphiti maira: na te mau taata hoo no te arii i rave i taua aho vavai ra ma te haapao i te hoo mau ra. 29 E noaa maira te pereoo hoê mai Aiphiti mai i na sekela ario e ono hanere, e te puaahorofenua ra, hoê ïa hanere e pae ahuru: e mai te reira atoa ia hopoihia mai e ratou na te mau arii ati Heta ra, e te mau arii i Arama ra.