Samuela 2

FAAARIIHIA DAVIDA EI ARII NO ISERAELA, PAU IHORA IERUSALEMA IA ˈNA.

5 Ua haere atoa maira te mau opu atoa o Iseraela i Heberona ia Davida i reira, e ua parau atura ia ˈna, na ô atura, Inaha matou, o to oe ïa ivi e o to oe ïa iˈo. 2 Ia mutaaihora hoi, ia Saula i arii i nia ia matou ra, o oe â tei aratai ia matou i rapae, e tei aratai mai ia Iseraela i roto. Ua parau mai hoi Iehova ia oe, E tiai oe mai te tiai mamoe â i to ˈu ra taata ia Iseraela, e ei tavana hoi oe ia Iseraela. 3 Ua haere anaˈe maira te feia rarahi i Iseraela i te arii ra i Heberona; ua faaau ihora taua arii ra o Davida i te tahi faufaa ia ratou i Heberona, i mua ia Iehova: ua faatahinu ihora ratou ia Davida ei arii i nia iho ia Iseraela ra.

4 A toru ahuru o Davida matahiti i riro ai te hau ia ˈna, e a maha hoi ahururaa te matahiti i te vai-noa-raa taua hau ra ia ˈna. 5 E hitu matahiti e ono marama i te ariiraa i nia ia Iuda i Heberona: e i Ierusalema, e toru ïa ahuru e toru tiahapa i te matahiti i te ariiraa i nia ia Iseraela e ia Iuda atoa ra.

6 Haere atura te arii e to ˈna ra mau taata i Ierusalema, e rave i te ati Iebusi, i te feia fenua ra; e ua na ô aˈera ratou ia Davida, e ore oe e ô mai i ǒ nei, ia taa ê râ te mau matapo e te mau pirioi ia oe ra, i manaˈo hoi ratou e ore Davida e ô i reira. 7 Noaa ihora râ ia Davida te pare ra o Ziona, o tei parauhia nei e, O te oire o Davida. 8 I parau na hoi Davida i taua mahana ra, O tei tae na i te eˈa pape, e ua tairi i te ati Iebusi, e te mau pirioi, e te mau matapo, o tei faaino ia Davida ra (i parau na hoi te mau pirioi e te mau matapo ra, E ore oia e ô mai i roto i te fare nei), ei raatira rahi ïa oia. 9 Parahi ihora Davida i roto i taua pare ra, mairihia ihora te oire o Davida: ua patu ihora hoi Davida i te aua e ati noa ˈˈe, mai Milo mai e i roto ra.

10 Tupu atura Davida, haere atura i te rahiraa, e tei pihai-atoa-iho te Atua sabaota ra, o Iehova, ia ˈna.

11 Ua tono maira te arii o Turia ra o Hirama i te vea ia Davida, ma te raau ra o te arezi, e te feia tahuˈa, e te mau patu aua, e ua patu ihora ratou i te tahi fare no Davida. 12 E ite aˈera Davida e, ua haamauhia oia e Iehova ei arii i nia ia Iseraela, e ua faateitei oia i to ˈna hau no to ˈna ra taata no Iseraela.

13 Ua rave ihora Davida i te vahine tavini â na ˈna, e te vahine na ˈna i Ierusalema, mai Heberona mai oia ra; e ua fanau maira hoi te tamaroa e te tamahine na Davida. 14 Teie hoi te mau iˈoa no tei fanau mai na ˈna i Ierusalema; o Samua, e o Sobaba, e o Natana, e o Solomona; 15 e o Ibehara, e o Elisua, e o Nephega, e o Iaphia, 16 e o Elisama, e o Eliada, e o Eliphaleta.

17 E ite aˈera te Philiseti e, ua faatahinu ratou ia Davida ei arii no Iseraela, ua haere anaˈe ihora te mau Philiseti e imi ia Davida; ite aˈera Davida, haere anaˈe atura i raro i te pare. 18 Ua tae mai te Philiseti i reira, e ua haapurara haere i taua peho ra o Rephaima. 19 Ua ui aˈera Davida ia Iehova, na ô aˈera, E tii anei au e rave i te Philiseti? e tuu mai anei oe ia ratou i roto i tau rima nei? ua parau maira Iehova ia Davida, A tii; e tuu mau vau i te Philiseti i roto i to rima na. 20 Ua haere ihora Davida i Baala-perazima, ua tairi ihora oia ia ratou i reira, na ô aˈera, Ua parari roa iho nei tau mau enemi ia Iehova i mua ia ˈu, mai te pape e parari ra. I mairi ai oia i te iˈoa no taua peho ra, ia Baala-perazima. 21 I reira to ratou mau idolo i te faarueraahia, e na Davida, e na to ˈna ra mau taata i tahu i te auahi.

22 Ua haere maira te mau Philiseti, ua haapurara haere i taua peho ra o Rephaima. 23 E ia ui hoi Davida ia Iehova, ua na ô maira oia, Eiaha oe e haere e farerei atu ia ratou: e faataninito oe na muri ia ratou, a rave ai ia ratou na muri, na te pae i te raau ra i te baka ra. 24 E ia faaroo oe i te ahehe i roto i te mau baka ra, a faaitoito oe i reira: ei reira hoi Iehova e haere ai na mua ia oe, e rave i taua nuu ra i te Philiseti. 25 E ua na reira hoi Davida, i ta Iehova i parau mai ia ˈna ra; ua tairi ihora i te Philiseti mai Geba ˈtu e tae noa ˈtura i Gaza ra.