Samuela 2
ISA-BOSETA I TAPARAHIHIA RA, TÂPÛHIA TE UPOO E HOPOIHIA IA DAVIDA RA.
4 E ite aˈera te tamaiti a Saula e ua pohe Abinera i Heberona, taiâ atura e to Iseraela atoa ra ua roohia-atoa-hia e te mǎtaˈu.
2 Toopiti hoi o te tamaiti a Saula ra tau taata, na raatira ïa no nia i na pǔpǔ taata ra: o Baana te iˈoa o te hoê, o Rekaba te iˈoa o te tahi; o na tamarii a Rimona i Beeroti, no te mau tamarii a Beniamina; ua haapaohia hoi Beeroti no Beniamina i reira: 3 ua horo hoi to Beeroti i Gitaima, e te parahi ra i reira i teie nei mahana. 4 E tamaiti noa iho hoi to Ionatana, to te tamaiti a Saula ra, ua pirioi to ˈna avae. E pae roa o ˈna matahiti a tae mai ai te parau i te poheraa o Saula raua o Ionatana mai Iezereela maira, ua rave ihora tana hii ia ˈna, horo ê atura: e tei taua ru no ˈna ra, ua mairi ihora oia, e pirioi atura. Mairihia ihora to ˈna iˈoa, Mephiboseta. 5 Ua haere ihora na tamarii a Rimona i Beeroti ra, o Rekaba e o Baana, e ua tae i te fare o Isa-boseta i te avatea ra, te taoto ra oia i nia i te hoê roi i reira: 6 ua tomo atura râ raua i roto i taua fare ra, mai te mea te tii ra raua i te sitona, tairi ihora raua ia ˈna i te taha aoao ra, ora ˈtura Rekaba raua o Baana to ˈna ra taeae. 7 I to raua hoi haereraa ˈtu i roto i te fare, te taoto ra Isa-boseta i nia i to ˈna ihora roi i to ˈna ihora piha taotoraa, ua patia ihora raua ia ˈna, pohe ihora oia, ua tâpû ihora raua i tana upoo, rave atura raua i tana upoo, haere atura raua na te medebara i taua rui ra. 8 Ua hopoi aˈera raua i te upoo o Isa-boseta ia Davida ra i Heberona, e ua parau atura i te arii, A hiˈo mai na i te upoo o Isa-boseta, o te tamaiti a Saula, o to oe na enemi, o tei titau mai ia oe ra. Ua tahoo Iehova i teie nei mahana i te arii i tau fatu, ia Saula, e to ˈna atoa ra huaai.
9 Ua parau atura Davida ia Rekaba, e ia Baana tana taeae, i na tamarii a Rimona i Beeroti, na ô atura ia raua, Mai ia Iehova e ora ra, o tei faaora i tau varua i te mau ati atoa nei, 10 a parau mai ai te tahi ra, a na ô mai ai ra, Inaha, ua pohe aˈenei Saula, te parau ra oia e parau maitai ta ˈna i hopoi mai, ua haru ihora vau ia ˈna, e taparahi ihora vau ia ˈna i Zikelaga, ia ˈna i manaˈo ra e, e hopoi atu vau i te tahi taoˈa na ˈna no ta ˈna ra parau: 11 a tae ˈtu ai hoi i te pohe i te taata maitai i te taata ino, i roto i to ˈna ihora fare, i nia i to ˈna ihora roi, e ore anei au e tahoo atu i to ˈna toto ia orua, a taparahi atu ai ia orua i te fenua nei? 12 Ua faaue ihora Davida i te mau taata no ˈna, ua rave hoi ratou ua taparahi, ua tâpû ê atura i to raua pue rima e to raua pue avae, ua faauta aˈera i nia i te pape i Heberona. Area te upoo o Isa-boseta, ua rave ratou i te reira, ua tanu i roto i te menema a Abinera i Heberona ra.