Samuela 2

TE HARA A DAVIDA I TE TAIORAA I TE MAU TAATA, TE POHE I TUUHIA MAI I NIA I TE FENUA.

24 Riri faahou aˈera Iehova ia Iseraela, ua faaitoito hoi Satani ia Davida ia ratou, ia parau oia e, A tii, a taio ia Iseraela e ia Iuda. 2 Ua parau atura te arii ia Ioaba i pihaiiho ia ˈna ra, o te raatira hoi oia no taua nuu ra, A haere na roto atoa i te mau opu atoa o Iseraela nei, mai Dana ˈtu e tae noa ˈtu i Bere-seba a taio ai i te taata, ia ite au i te rahi. 3 Ua parau atura Ioaba i te arii, Rahi noa ˈtu â ratou, ia faarahi mai â to Atua ra o Iehova e ia riro noa ˈtu te taata hoê ei hanere; e ia ite hua hoi to mata, e tau fatu, e te arii, i te reira, eaha ra hoi oe i au atu ai i te reira parau, e tau fatu, e te arii? 4 Ua hau atura râ ta te arii ra parau i ta Ioaba, e ta te mau raatira o taua nuu ra, reva ˈtura Ioaba e te mau raatira o te nuu ra i rapae mai i mua i te aro o te arii ra, e taio i te mau taata o Iseraela ra.

5 Reva ˈtura râ i te tahi pae Ioridana, patia ihora i te tiahapa i Aroera, i te pae atau o te oire tei roto i te pioa pape i Gada ra, i te pae Iazera ra. 6 Haere atura ratou i Gileada, e te fenua ra o Tatima-hodesi: e ua tae atura ratou i Dana-iaana, e reva ˈtura hoi i Sidona. 7 Mai reira hoi, reva ˈtura ratou i taua pare ra o Turai, e te mau oire atoa a te ati Heva, e te ati Kanaana; reva ˈtura ratou i Bere-seba i te pae i apatoa i Iuda ra. 8 E ati aˈera ia ratou taua fenua ra, ua tae maira ratou i Ierusalema, ua hope aˈera na marama e iva, e na mahana hoi hoê taau. 9 Ua faaite atura Ioaba i te arii i te huru i te rahiraa o taua mau taata ra: e vau hanereraa i te tausani i te taata itoito anaˈe, e ˈoˈe te mauhaa i to Iseraela: e to Iuda ra e pae ïa hanereraa i te tausani.

10 Ua faahapa maira to Davida aau ia ˈna, ua oti aˈera taua mau taata ra i te taiohia. Ua parau atura Davida ia Iehova, Ua rahi ta ˈu hara i ta ˈu i rave iho nei; e teie nei, teie ta ˈu parau ia oe, e Iehova, e faaore mai oe i te hara i ravehia e to tavini nei; e parau maamaa rahi roa ta ˈu i rave iho nei. 11 E ao aˈera ia tia mai Davida i nia, ua tae maira te parau a Iehova i te peropheta ra ia Gada, o ta Davida ïa hiˈo, ua na ô maira, 12 A haere a parau atu ia Davida, Te na ô maira Iehova, E toru eie pue parau ta ˈu e faaite atu ia oe; o te hoê ra ta oe e rave, ia na reira ˈtu vau ia oe. 13 Ua haere maira Gada ia Davida ra, e ua na ô maira ia ˈna, Ia roohia mai anei oe i te oˈe e ia toru aˈe matahiti i to fenua nei? e ia toru anei o oe marama i te auauraahia mai e to oe ra mau enemi, te auau noa maira ratou ia oe? e ia toru anei mahana maˈi pohe i to fenua nei? E tena na, a haamanaˈo, a hiˈo, ta ˈu hoi parau ia faahoˈi atu i tei tono mai ia ˈu nei. 14 Ua parau atura Davida ia Gada, E ati rahi to ˈu: ei te rima o Iehova tatou; te rahi nei to ˈna aroha: eiaha râ vau ei te rima o te taata nei.

15 E ua tuu maira Iehova i te maˈi pohe i nia ia Iseraela mai te poipoi mai e tae noa ˈtura i te taime i haapaohia; pohe ihora te taata e hitu ahuru i te tausani mai Dana mai e tae roa aˈera i Bere-seba. 16 Ia faatoro faahou ra te melahi i tana rima e rave ia Ierusalema, ua tatarahapa ihora Iehova i taua ino ra, e ua parau atura i te melahi i taparahi i taua mau taata ra, Atira na: a faaea iho na i reira. Tei pihaiiho taua melahi a Iehova ra i te vahi papairaa sitona a Arauna ati Iebusi ra. 17 Ua parau atura Davida ia Iehova, i te iteraa ˈˈe oia, i taua melahi i tairi i te taata ra, ua na ô atura, Inaha, ua hara vau, e ua rave au i te ino: area i teie nei mau mamoe, eaha noa na ratou? teie ta ˈu parau ia oe, ei nia to rima ia ˈu nei, e ei nia atoa i te utuafare a tau metua.

18 Ua haere hua maira Gada ia Davida ra i taua mahana ra, ua parau atura ia ˈna, A haere, e faatia i te tahi fata na Iehova i nia i te vahi papairaa sitona a Arauna ati Iebusi ra. 19 Reva ˈtura Davida i nia, i ta Gada i parau maira, i ta Iehova i faaue mai ia ˈna ra. 20 Ua hiˈo maira Arauna, ite maira i te arii e tana mau tavini te haere anaˈe maira ia ˈna ra: haere atura Arauna i rapae, ua tahopu atura i te arii, i raro te mata i te repo. 21 Ua parau atura Arauna, Eaha te mea i tae mai ai oe, e tau fatu, e te arii, i to tavini nei? Ua parau maira Davida, I haere mai au e hoo i te vahi papairaa sitona na oe nei ei faatiaraa i te tahi fata na Iehova, ia faaorehia mai te maˈi pohe i te taata nei. 22 Ua parau atura Arauna ia Davida, E rave oe, e tau fatu, e te arii, e hopoi i ta oe e hinaaro ra. Inaha, teie te puaatoro ei tusia taauahi, teie hoi te mau papai, e te mau mauhaa no nia i te puaatoro ei vahie. 23 I hopoi-noa-hia e Arauna taua mau mea atoa nei mai ta te arii ra na te arii. E ua na ô maira Arauna i te arii, Ia itehia mai hoi oe e to Atua e Iehova. 24 Ua parau atura te arii ia Arauna, Eiaha; ei hoo â, e hoo hua ˈtu vau ia oe; eiaha ta ˈu ei taoˈa hoo-ore-hia e au ia hopoi ei tusia taauahi na tau Atua ra na Iehova. Hoo atura Davida i taua vahi papairaa sitona ra, e na puaatoro ra, i na sekela ario e pae ahuru ra. 25 Ua faatia ihora Davida i te hoê fata na Iehova, e ua hopoi i te tusia taauahi e te tusia no te maitai ra. Mâhâ aˈera to Iehova riri i taua fenua ra, ore aˈera te maˈi pohe ia Iseraela.