Samuela 2
TE MAU PARAU HOPEA, E TE SALAMO HOPEA I PAPAIHIA E DAVIDA.
23 Teie â hoi na parau hopea a Davida. Teie ta Davida parau; ta te tamaiti a Iese, te taata i faateitei-hua-hia ra; tei faatahinuhia e te Atua o Iakoba; ta te fatu salamo maitai a Iseraela ra i parau.
2 Te parau nei te Varua o Iehova ia ˈu, e tei tau vaha nei ta ˈna parau. 3 Ua parau mai te Atua o Iseraela; o te Mato o Iseraela tei faaite mai ia ˈu, ei tavana parau-tia ta te taata nei, o tei haapao i ta ˈna tavanaraa ma te mǎtaˈu i te Atua. 4 Mai te maramarama poipoi ia hiti te mahana ra, e poipoi ata ore ra; mai te matie rii e tupu no roto i te fenua i muri aˈe i te ûa, i te mahana anaana maitai ra: 5 ore noâ ˈi to ˈu nei utuafare i te riro mai te reira i te Atua; ua faaau râ oia i te faufaa mure ore ia ˈu nei, e mea haapao-maitai-hia i te mau vahi atoa ra, e te parau mau: o to ˈu ïa ora o te reira ra; e to ˈu atoa ra mau hinaaro, ore noâ ïa i te faatupuhia e ana.
6 Area to Beliala, e au ratou atoa i te raau taratara e tute-ê-hia ïa, e ore e tia ia rave atu te rima. 7 O te taata i opua e rave ra, e paruruhia ïa i te auri e te aufau auri e tia ˈi: e e tahu-roa-hia ratou i te auahi i reira ra.
8 Teie te iˈoa o na taata aito i ǒ Davida; o tei noho i te nohoraa o te Takemoni, o tei hau ïa i na raatira ra, oia hoi o Adino ati Ezeno. Ua aa ihora i ta ˈna maehae i na taata e vau hanere, pau ihora ratou ia ˈna i te pauraa hoê. 9 E muri aˈe ia ˈna, o Eleazara a Dodo ra, e ati Ahohi, o te hoê i taua na taata aito tootoru ra i ǒ Davida, i to ratou faainoraa i te Philiseti, a putuputu ai ratou i te tamaˈi, e te fati ra to Iseraela; 10 ua tia aˈera oia i nia ua tairi i te Philiseti, e piri roa aˈera tana rima i te mauhaa ˈoˈe ra, e ua opa; e pau rahi ta Iehova i rave i taua mahana ra ia ˈna; e ua pee noa ˈtura te taata ia ˈna e haru noa i te taoˈa. 11 E i muri aˈe ia ˈna o Sama a Age i Harari ra. E ua putuputu te Philiseti, e tera maa, i te hoê maa fenua ua î i te kerite: i fati ihora te taata i te Philiseti. 12 Tia noa ihora râ oia i ropu i taua maa fenua ra, ua faahana ihora, e ua tairi ihora i te Philiseti: e pau rahi ihora ta Iehova i rave ia ˈna. 13 Haere atura na taata rarahi tootoru, no taua pǔpǔ e toru ahuru ra, e tae atura i raro ia Davida ra, i te auhune ra, i te ana a Adulama: te patiahia ra to te Philiseti puhapa i te peho ra o Rephaima. 14 Te parahi ra Davida i taua ana ra, e tei Bete-lehema te Philiseti i te tiairaa. 15 Ua hiaai aˈera Davida i te pape, e ua na ô aˈera, Na vai râ e horoa mai i te hoê maa pape i te apoo pape i Bete-lehema nei, i te pae uputa ra? 16 Ua tii noa ˈtura taua na taata aito tootoru ra na roto noa ˈtura i te nuu Philiseti ra, ua huti ihora i te pape i taua apoo pape i te pae uputa i Bete-lehema ra, ua rave maira, ua hopoi maira ia Davida ra; aita aˈera râ Davida i inu, ua rave aˈera râ ua ninii ihora ei tusia inu na Iehova. 17 E ua na ô aˈera oia, Eiaha roa vau i te reira, e Iehova, e ia na reira hoi au nei: e ere anei i te toto teie o te mau taata o tei faaû noa i to ratou pohe i te tiiraa i teie nei pape? Aita aˈera oia i inu. I na reira taua na taata aito tootoru ra. 18 E i muri aˈe ia ratou, o Abisai ïa, te taeae o Ioaba, te tamaiti a Zeruia ra, o te taata ïa i hau i na taata tootoru. Ua maraa aˈera hoi ta ˈna maehae, pohe atura na taata e toru hanere; noaa maira ia ˈna te iˈoa i na taata tootoru. 19 O te taata ïa i hau i taua na taata tootoru ra, riro atura oia ei taata hau; aita râ i taea ia ˈna na taata tootoru i mutaaihora. 20 E i muri aˈe ia ˈna, o Benaia a Iehoiada ïa, e tamaiti na te hoê taata mana i Kabezeela ua hau atoa ta ˈna ravea. E toopiti atoa a ˈna pue taata aito i taparahi i Moabi; e ua pou oia i raro e ua taparahi â i te hoê liona i roto i te apoo, i te anotau hiona. 21 Ua taparahi hoi oia i te hoê taata Aiphiti, e taata maitai ia hiˈo: e maehae hoi tei te rima o taua taata Aiphiti ra, haere atura oia ia ˈna ra, ma te turutootoo, ua haru ihora i taua maehae i te rima a to Aiphiti ra, e ua taparahi atura ia ˈna i te maehae na ˈna iho. 22 I na reira taua taata ra o Benaia a Iehoiada; i noaa ˈi to ˈna iˈoa i na taata aito tootoru nei. 23 Ua hau oia i na taata e toru ahuru ra; aita râ i taea ia ˈna na taata tootoru i mutaaihora. Tuuhia aˈera oia e Davida no nia iho i to ˈna ra pǔpǔ faehau. 24 O Asahela, te taeae o Ioaba, no na taata toru ahuru ra ïa; o Elehanana a Dodo, i Bete-lehema ra; 25 o Sama i Haroda; e o Elika i Haroda ra; 26 o Heleza i Paleti; e o Ira a Ikesa i Tekoa ra; 27 o Abiezera i Anatota; e o Mebunai ati Husa; 28 o Salamona ati Ahohi, e o Maharai e ati Netopha; 29 o Heleba a Baana, e ati Netopha; o Itai a Ribai, no ǒ i Gibea ra no te tamarii a Beniamina; 30 o Benaia i Piratoni; e o Hidai i Nahala-gaasa; 31 o Abi-alabona i Araba; e o Azamaveta i Barahumi; 32 o Eliaba i Salaboni; no te tamarii a Iasena o Ionatana, 33 o Sama i Harari ra; e o Ahiama a Sarara i Harari; 34 o Elipheleta a Ahasebai a te ati Maaka; o Eliama a Ahitophela i Giloni; 35 o Hezero i Karemela; e o Paarai i Arabi ra; 36 o Igala a Natana i Zoba; e o Bani i Gada; 37 o Zeleka e ati Amona; e o Nahari i Beeroti ra, e hopoi mauhaa tamaˈi na Ioaba a Zeruia ra; 38 e o Ira i Ituri; e o Gareba i Ituri; 39 e o Uria ati Heta ra. E toru ahuru ma hitu.