Genese

IAKOBA I TE TONORAA I TA ˈNA MAU TAMARII E HOO I TE SITONA.

42 E ite aˈera Iakoba e e hooraa sitona tei Aiphiti, ua parau maira Iakoba i ta ˈna ra mau tamarii, Eaha outou i tiatonu noa ˈi te tahi i te tahi? 2 E ua parau maira oia, Inaha, ite aˈenei au e, e hooraa sitona tei Aiphiti, e haere outou i reira e hoo i ta tatou, ia ora tatou, eiaha hoi ia pohe.

3 Reva ˈtura na tuaana o Iosepha tino ahuru i Aiphiti e hoo i te sitona. 4 Area to Iosepha taeae mau o Beniamina, aore ïa i tono-atoa-hia e Iakoba a tono atoa ai i te mau tuaana; ua na ô aˈera oia, O te roohia-noa-hia ˈtu e te ino.

5 O te tamarii atoa a Iseraela tei haere atoa e hoo i te sitona, ratou e te feia atoa i haere e hoo; ua oˈe hoi taua fenua ra o Kanaana. 6 O Iosepha hoi te tavana o te fenua ra o Aiphiti, e na ˈna e hoo i te sitona i te taata atoa o taua fenua ra. Ua haere maira taua mau tuaana o Iosepha ra, ua tipapa ihora ratou i raro roa i te repo i mua i tana aro. 7 E ia hiˈo atura Iosepha i taua mau tuaana no ˈna ra, ua ite atura oia ia ratou; ua faataata ê atura râ oia, e ua parau iriâ ˈtura ia ratou, na ô atura, Maihea mai outou na? Ua parau maira ratou, Mai te fenua ra mai Kanaana mai, i haere mai matou e hoo i te maa. 8 Te ite noa ra Iosepha i taua mau tuaana no ˈna ra, aore â ratou i ite ia ˈna.

9 Ua manaˈo ihora Iosepha i na moemoeâ na ˈna ia ratou ra, e ua parau atura ia ratou, E hiˈo outou na; i haere mai outou e hiˈo i te mau vahi fatafata o teie nei fenua. 10 Ua parau maira ratou ia ˈna, Eiaha, e to matou tavana e, i haere mai râ to mau tavini nei e hoo i te maa: 11 e tamarii hoi matou atoa nei na te taata hoê; e feia parau mau matou; e ere to mau tavini nei i te hiˈo. 12 Ua parau atura oia ia ratou, E ere; i haere mai râ outou e hiˈo i te mau vahi fatafata o teie nei fenua. 13 Ua parau maira ratou, Tino ahuru ma piti to mau tavini nei hoê â fetii, e tamarii na te taata hoê i te fenua ra o Kanaana; e inaha, to matou hopea roa ˈˈe tei te metua tane ra i teie nei, e aita nei te hoê. 14 Ua parau atura Iosepha, ia ratou, O ta ˈu â hoi i parau atu ia outou na e, e hiˈo outou. 15 Teie te mea e itea ˈi outou: Te ora nei Pharao ra, e ore roa outou e reva, maori râ ia tae mai to outou teina iti hopea ra i ǒ nei. 16 A tono outou i te hoê o outou e tii i to outou teina, e e tapeahia outou i roto i te tapearaa, ia itea ta outou parau i te tiaraa: e aore ra, te ora nei Pharao ra, e hiˈo mau â outou na. 17 Ua tuu atura oia ia ratou i roto i te tapearaa e rui toru aˈera.

18 E tae aˈera i te rui toru ra, ua parau atura Iosepha ia ratou, E na ô outou, ia ora outou; te mǎtaˈu nei hoi au i te Atua. 19 E feia parau mau outou na, e vaiiho i te hoê o outou ia tapea-noa-hia na i roto i teie nei fare e tapeahia ˈi outou nei; a haere ai outou, a hopoi ai i te sitona i hoohia na, ei maa no to outou mau utuafare i te oˈe: 20 aratai mai na râ i to outou teina hopea ra i ǒ nei ia ˈu nei, ia riro ta outou parau ei parau mau, ia ore hoi outou ia pohe. E ua na reira ˈtura hoi ratou.

21 Ua paraparau ihora ratou ratou iho, Ua hara mau tatou i to tatou taeae ra; ua ite hoi tatou i to ˈna mauiui aau, a taparu mai ai oia ia tatou ra, e aore tatou i faaroo atu; i roohia mai ai tatou e teie nei ati. 22 Ua parau aˈera Reubena ia ratou, na ô aˈera, E ere anei o vau tei parau atu ia outou e, Eiaha e rave ino i te tamaiti na; e aore aˈera outou i faaroo mai? E inaha, i titauhia mai ai te hoo i to ˈna toto i tena na. 23 Aore ratou i ite e te ite maira Iosepha i ta ratou parau; e taata hoi te faaite i te parau ia ratou. 24 Ua fariu ê maira oia, ua oto ihora; e mai reira hoi ua hoˈi faahou atura ia ratou ra, e ua paraparau atura ia ratou, ua rave atura oia ia Simeona no roto ia ratou, e ua tapea ihora ia ˈna i mua mau i to ratou mata.

25 Ua faaue atura Iosepha e faaîî i ta ratou mau pute i te sitona, e e faahoˈi i ta ratou atoa ra mau moni i roto i ta ratou mau pute, e e horoa ˈtu hoi i te maa no te haerea; e ua na reira hoi oia ia ratou. 26 Ua faauta aˈera ratou i te sitona i nia iho i ta ratou mau asini, reva ˈtura.

27 E tae aˈera i te vahi taotoraa, ia tatara te hoê i ta ˈna pute e hopoi i te tahi maa maa na ta ˈna asini, inaha, ite aˈera oia i ta ˈna moni, tei roto hoi tei te auvaha o te pute ra. 28 Ua na ô aˈera oia i to ˈna mau taeae, Ua faahoˈihia mai ta ˈu moni, inaha hoi; tei roto i tau pute nei. Tarapape atura to ratou aau, rurutaina ihora i te mǎtaˈu, e ua na ô aˈera ratou ratou iho, Eaha teie rave a te Atua ia tatou nei?

29 E tae roa ˈtura i te fenua ra o Kanaana i to ratou metua ia Iakoba ra, e ua faaite atura ia ˈna i te mau mea atoa i roohia mai ai ratou ra; na ô atura, 30 I parau iria mai te tavana o taua fenua ra ia matou, parau aˈera e hiˈo matou i taua fenua ra. 31 Ua parau atura râ matou ia ˈna, E feia parau mau matou; e ere matou i te hiˈo: 32 tino ahuru ma piti matou i to matou fetii, hoê o matou metua tane; aita nei te tahi, e o te hopea roa ˈˈe, tei to matou metua tane ïa i teie nei, i te fenua ra o Kanaana. 33 Ua na ô maira taua taata ra, te tavana o taua fenua ra, ia matou, Teie te mea e ite ai au e e feia parau mau outou; e vaiiho i te hoê o outou i ǒ nei ia ˈu nei, a rave i te sitona no te oˈe i to outou utuafare, a haere atu ai: 34 a aratai mai ai i to outou teina iti hopea i ǒ nei ia ˈu nei; e ite ïa vau e, e feia parau mau outou i reira, e ere ïa i te hiˈo; a tuu atu ai au i to outou tuaana ia outou na, a hoo haere noa ˈtu ai outou i teie nei fenua.

35 E tei te iritiraa ratou i te maa i roto i ta ratou mau pute, inaha, ta ratou atoa ra mau puohu moni i roto i ta ratou ra mau pute; e ite aˈera ratou, e to ratou metua tane, i taua mau puohu moni ra, mǎtaˈu aˈera ratou. 36 Ua na ô aˈera to ratou metua tane ra o Iakoba ia ratou, Ua ere au i te tamarii ia outou, aita nei Iosepha; e aita nei Simeona; e te titau mai nei hoi outou ia Beniamina: o te rave ïa ia ˈu e ino ai au i taua mau mea nei. 37 Ua parau atura Reubena i tana metua tane, na ô atura, Ia ore au ia faahoˈi mai ia ˈna ia oe ra, e rave oe e taparahi i ta ˈu aˈera pue tamarii tamaroa toopiti, a tuu mai oe ia ˈna i to ˈu nei rima, e na ˈu e hopoi faahou mai ia ˈna ia oe na. 38 Ua na ô maira râ oia, E ore tau tamaiti e tae i to outou tere; ua pohe hoi to ˈna mua ˈˈe, oia anaˈe tei toe iho nei: ia roohia-noa-hia oia i te ino i to outou na haerea, e tae roa tau upoo hinahina i raro i te apoo ma te oto ia outou na.