Genese

NA TAOTO O PHARAO RA, E TE FAAITERAAHIA E IOSEPHA RA.

41 E hope aˈera na matahiti e piti ra, e taoto ta Pharao, e inaha, mai te mea oia te tia noa ra i te pae pape. 2 E inaha, ua haere maira na puaatoro maitatai e te poria e hitu, mai raro mai i taua pape ra; e te amu ra ïa i te maa i te vahi aihere ra. 3 E i muri aˈe i te reira, inaha, ua haere maira na puaatoro iino e te tiahape e hitu, mai raro mai â i taua pape ra; e ua tia noa ihora ïa i pihai iho i te tahi mau puaatoro, i te hiti o taua pape ra. 4 Ua amu ihora na puaatoro iino tiahape ra i na puaatoro maitatai e te poria e hitu ra, e pau roa aˈera. Ara aˈera Pharao i reira. 5 E piri faahou atura tana mata, taotootoâ-faahou-hia maira oia, o te piti ïa o te taoto; e inaha, ua tupu maira e hitu huero sitona maitai e te rahi i nia i te tumu hoê. 6 E i muri aˈe i te reira, inaha, ua tupu maira e hitu huero sitona hoene e te para i te mataˈi o te hitia o te râ ra. 7 E pau roa aˈera na sitona rarahi e te maitai ra i na sitona hoene ra. Ua ara aˈera Pharao, e inaha, e moemoeâ.

8 Ia ao aˈera, ua ahoaho aˈera to ˈna aau; e tono atura i te taata e tii i te mau hiˈohiˈo, e te mau taata paari atoa o Aiphiti ra; e ua faaite atura Pharao ia ratou i taua na moemoeâ na ˈna ra; aita roa râ i tia i te hoê ia faaite mai ia Pharao i taua na moemoeâ na ˈna ra. 9 Ua parau atura te raatira o te rave vine ia Pharao, na ô atura, Ua itea ia ˈu ta ˈu nei hapa i teie nei mahana. 10 Riri aˈera Pharao i na tavini no ˈna, ia ˈu, e te rave maa rahi, e ua tuu ihora ia mâua i roto i te fare tapearaa a te raatira faehau ra. 11 E e moemoeâ ta mâua, o vau e oia atoa, hoê â arui; na ˈna ta ˈna moemoeâ, e na ˈu â ta ˈu, e e auraa mau to taua na moemoeâ ra. 12 E i reira atoa te hoê taata apî e Hebera, e tavini no te raatira faehau ra; e ua faaite atura mâua ia ˈna, e ua faaite maira oia ia mâua i te auraa o ta mâua moemoeâ; ta te tahi ra moemoeâ e ta te tahi, ta ˈna ïa i faaite mai e au maite aˈera. 13 E ua tupu maite iho nei hoi ta ˈna i faaite maira. Ua faahoˈi mai oia ia ˈu i to ˈu ra toroa, e ua tarî oia ia ˈna.

14 Ua tono atura Pharao i te vea i te tapapa ia Iosepha; ua aratai oioi maira ratou ia ˈna mai roto mai i te tapearaa ra. E mâ aˈera to ˈna taa i te hahu, e ahu aˈera i to ˈna ahu, ua tomo maira oia i roto ia Pharao ra. 15 Ua parau atura Pharao ia Iosepha, E moemoeâ ta ˈu, e aita roa e taata e tia ˈi ia faaite mai i te auraa. Ite aˈenei hoi au i te parau ia oe, e ua faaite-anaˈe-hia oe i te moemoeâ, e tia ia oe ia faaite mai i te auraa.

16 Ua parau maira Iosepha ia Pharao, na ô maira, Aita ra te reira ia ˈu nei: na te Atua râ e tuu mai ia Pharao i te parau ora.

17 Ua parau atura Pharao ia Iosepha, Taua moemoeâ na ˈu nei inaha, te tia noa ra vau i te pae pape ra; 18 e inaha, ua haere maira na puaatoro poria e te maitatai e hitu, mai raro mai i taua pape ra; e te amu noa ra ratou i te maa i te vahi aihere ra. 19 E inaha, i muri aˈe i te reira, ua haere mai i nia na puaatoro iino e te tiahape, e e huru pohe hoi, e hitu, aita roa ïa puaatoro i itea ia ˈu i Aiphiti atoa nei i te ino. 20 Ua amu ihora na puaa tiahape e te iino, i tei mutaa ihora mau puaa poria e hitu ra: 21 e pau aˈera ratou i te horomiihia, aore i itea e ua horomiihia, o to ratou â hoi to ratou huru i te iino, mai tei mutaaihora. Ara aˈera vau i reira. 22 E i moemoeâ-faahou-hia vau, e inaha, ite atura vau i e hitu huero sitona rarahi e te maitatai i te tupuraa i nia i te tumu hoê. 23 E inaha, i muri aˈe i te reira, ua tupu maira e hitu â huero sitona oriorio e to hoene, e ua para i te mataˈi o te hitia o te râ ra. 24 E pau roa aˈera na huero sitona maitatai e hitu, i na huero sitona hoene ra. E ua faaite hoi au i taua parau nei i te mau hiˈohiˈo ra; aita roa râ e taata i tia ˈi ia faaite mai i te auraa.

25 Ua parau maira Iosepha ia Pharao, Hoê â taua na moemoeâ a Pharao ra. Ua faaite mai te Atua ia Pharao i ta ˈna e fatata i te rave nei. 26 O na puaatoro maitatai e hitu ra, e hitu ïa matahiti; e na huero sitona maitatai e hitu ra, e hitu ïa matahiti: hoê â na moemoeâ nei. 27 E na puaatoro tiahape e te ino e hitu ra, i tei haere mai i muri aˈe, e hitu ïa matahiti; e na huero sitona hoene e te para i te mataˈi o te hitia o te râ e hitu ra, e hitu ïa matahiti oˈe. 28 O taua parau ra teie, ua faaitehia ˈtu e au ia Pharao: ta te Atua e rave nei, ua faaite mai oia ia Pharao. 29 Inaha, teie a tupu na matahiti auhune rahi roa e hitu e ati noa ˈˈe te fenua atoa nei o Aiphiti: 30 e i muri aˈe i te reira, o na matahiti oˈe ïa e hitu, e e moe taua auhune rahi i te fenua nei o Aiphiti; e pau roa hoi te fenua i te oˈe: 31 e ore roa hoi taua auhune rahi ra e manaˈohia i te fenua i te oˈe i muri aˈe; e riro hoi i te oˈe rahi roa. 32 Area i te tapitiraa mai i taua moemoeâ ia Pharao ra, no te mea ïa ua tia roa ïa parau i te Atua, e ua fatata i te faatupuhia e te Atua ra. 33 E tena na, ia imi Pharao i te hoê taata ite e te haapao maitai, a tuu ai ia ˈna ei nia iho i teie nei fenua ia Aiphiti. 34 Ia na reira Pharao, e e faataa hoi oia i te tahi pae taata ei tavana no nia atoa iho i teie nei fenua, a rave ai i te pae o te tufaa o te maa atoa o teie nei fenua o Aiphiti i na matahiti auhune e hitu atoa nei; 35 a haaputu ai ratou i te mau maa atoa no taua na matahiti maitatai e fatata mai nei; a vaiiho maite ai ratou i te sitona i te pueraa na Pharao e mau, ia maahia to roto i te mau oire ra. 36 E maahia to te fenua i reira, no na matahiti oˈe e hitu e tupu i teie nei fenua i Aiphiti nei; ia ore hoi ia pohe teie nei fenua i taua oˈe nei.

37 E parau maitai taua parau nei ia Pharao, e to ˈna atoa ra mau taata. 38 Ua parau atura Pharao i taua mau taata no ˈna ra, Eaha ˈtu â ta tatou taata e noaa e au i teie nei taata, tei roto ia ˈna te Varua o te Atua ra? 39 Ua parau atura Pharao ia Iosepha, No te mea ua faaite mai te Atua ia oe i taua mau parau nei, aita ˈtu e taata ite, e te haapao maitai, maori râ o oe na: 40 ei nia iho oe i to ˈu nei utuafare; e o ta oe te parau e faaroohia e te mau taata atoa no ˈu nei: ei nia vau i te terono arii anaˈe ra e hau ai ia oe. 41 Ua parau atura hoi Pharao ia Iosepha, Inaha, ua faarirohia oe e au ei nia iho i te fenua atoa nei i Aiphiti. 42 Ua rave ihora Pharao i te tapea no nia i to ˈna iho rima, ua oomo atura i te rima o Iosepha, e ua faaahu atura ia ˈna i te ahu vavai maitai, e ua tuu atura i te fifi auro i nia i tana aˈî; 43 e ua haaparahi ia ˈna i nia iho i te pereoo maitai roa no ˈna ihora, maori râ hoê ra; e ua pii haere te taata na mua ia ˈna, A tuu i te turi i raro. Faariro atura ia ˈna ei tavana i nia iho i taua fenua atoa i Aiphiti ra. 44 Ua parau atura Pharao ia Iosepha, O vau o Pharao, e aore roa e taata e hopoi i to rima i nia, e e haere te avae, maori râ ia parau oe ra, e ati noa ˈˈe taua fenua atoa nei o Aiphiti. 45 Ua mairi ihora Pharao i to Iosepha iˈoa, ia Zaphanate-paanea; e ua tuu atura oia ia Asenata a Potiphera, tahuˈa i Ono ra, ei vahine na ˈna. Haere atura Iosepha e ati noa aˈera taua fenua ra o Aiphiti.

46 A toru aˈera o Iosepha ahururaa i te matahiti a tia ˈi oia i mua i te aro o te arii o Aiphiti ra o Pharao. Haere atura Iosepha mai te aro atu o Pharao, haaati haere atura i taua fenua atoa ra i Aiphiti. 47 Hotuumu atura taua fenua ra i na matahiti auhune e hitu ra. 48 Ua haaputu ihora oia i te maa atoa i na matahiti e hitu i taua fenua ra i Aiphiti, e vaiiho maite ihora i te maa i roto i te mau oire, o te maa no te mau aua i pihaiiho i taua mau oire ra e ati noa ˈˈe, o ta ˈna ïa i vaiiho i roto i taua mau oire ra. 49 Pue maite aˈera te sitona ia Iosepha mai te one tahatai ra; e aita ˈtura oia i taio i taua maa ra i te rahi; aita aˈera e tia ia taio.

50 E aita i tae i na matahiti oˈe ra, i fanau mai ai ta Iosepha pue tamarii tamaroa toopiti, ta Asenata a Potiphera, tahuˈa i Ono, i fanau na ˈna ra. 51 Mairi ihora Iosepha i to te matahiapo ra iˈoa, o Manase: ua na ô aˈera hoi oia, Ua moe na to ˈu ra mau ati, e te utuafare atoa o to ˈu ra metua ia ˈu, i te Atua. 52 E mairi ihora oia i te iˈoa o te toopiti ra o Epheraima: ua na ô aˈera hoi oia, Ua hotu vau i te Atua i te fenua i ati ai au nei.

53 E hope aˈera taua na matahiti auhune e hitu i taua fenua ra i Aiphiti; 54 ua tupu maira taua na matahiti oˈe e hitu ta Iosepha i parau ra. E ua ati te mau fenua atoa i te oˈe, area te fenua ra o Aiphiti e ati noa ˈˈe, e maa ïa te vai ra. 55 E pohe aˈera to Aiphiti i te poia, ua pii noa maira te taata ia Pharao i te maa; ua parau atura Pharao i to Aiphiti atoa ra, A haere ia Iosepha ra; e o ta ˈna e parau mai ia outou na, o ta outou ïa e rave. 56 Ati paatoa aˈera taua fenua ra i te oˈe, ua iriti aˈera Iosepha i te mau fare pueraa maa atoa ra, e ua hoo atura i te sitona na to Aiphiti, rahi roa aˈera te oˈe i taua fenua ra o Aiphiti. 57 Ua haere maira to te mau fenua atoa i Aiphiti ia Iosepha ra e hoo i te sitona; ua ati hoi te mau fenua atoa i te oˈe.