Deuteronomi

8 “A haapao maitai i te mau faaueraa atoa ta ˈu e horoa nei ia outou i teie mahana, ia ora noa outou,+ ia rahi to outou huaai, ia tomo e ia fatu outou i te fenua ta Iehova i horeo i to outou mau tupuna.+ 2 A haamanaˈo i te eˈa roa na reira Iehova to outou Atua i faahaere ai ia outou teie e 40 matahiti na te medebara,+ no te faahaama e no te tamata ia outou+ ia ite oia eaha to roto i to outou aau,+ e auraro anei outou i ta ˈna mau faaueraa aore ra eita. 3 No reira, ua faahaehaa oia ia outou e ua vaiiho ia outou ia poia noa+ e ua horoa ˈtu i te mâna+ ei maa na outou, ta outou e to outou mau metua i ore i matau, ia ite outou e eita te taata e ora i te maa anaˈe, e ora râ te taata i te mau faahitiraa atoa no roto mai i te vaha o Iehova.+ 4 Aita te ahu ta outou i oomo i ino, e aita atoa to outou avae i oru i teie e 40 matahiti.+ 5 Ua ite maitai outou i roto i to outou aau e mai te hoê taata e aˈo i ta ˈna tamaiti, te aˈo ra Iehova to outou Atua ia outou.+

6 “E auraro oe i te mau faaueraa a Iehova to Atua a haere ai na ta ˈna mau eˈa e a mǎtaˈu ai ia ˈna. 7 Te aratai nei hoi Iehova to Atua ia oe i te hoê fenua maitai,+ e fenua no te tahora pape, te pape pihaa e te apoo pape o te tahe ra na te peho e te mau vahi mouˈa, 8 e fenua no te sitona e te kerite, te vine, te tumu suke e te remuna,+ e fenua no te hinu olive e te meri,+ 9 e fenua e ore ai te maa e pau e e ore ai oe e ere noa ˈˈe i te tahi mea, e fenua e auri to roto i te ofai e e iriti mai ai oe i te veo no roto mai i to ˈna mau mouˈa.

10 “Ia tamaa oe e ia paia, e haamaitai ïa oe ia Iehova to Atua no te fenua maitai ta ˈna i horoa no oe.+ 11 A ara eiaha oe ia haamoˈe ia Iehova to Atua a ore ai e auraro i ta ˈna mau faaueraa, ta ˈna mau faaotiraa haavaraa e ta ˈna mau faatureraa ta ˈu e faaue nei ia outou i teie mahana. 12 Ia tamaa oe, ia paia oe, ia patu oe i te fare nehenehe e ia parahi oe i roto,+ 13 ia rahi roa te fanauˈa o ta oe nǎnǎ puaatoro e ta oe mau nǎnǎ mamoe e puaaniho, ia rahi ta oe ario e auro e ia rahi ta oe mau faufaa atoa, 14 eiaha to aau ia teoteo+ a moˈe atu ai ia oe o Iehova to Atua, tei aratai ia oe i rapae i Aiphiti, te fenua* o te faatîtîraa,+ 15 o te faahaere ia oe na te medebara rahi e te riaria,+ te vai ra te ophi taero e te pata patia e te fenua mǎrô aita e pape. Ua haapahi mai oia i te pape no roto i te mato+ 16 e ua horoa mai i te mâna+ ei maa na oe i te medebara, ta to oe mau metua i ore i matau, no te faahaama+ e no te tamata ia oe ia maitai oe a muri aˈe.+ 17 Ia parau noa ˈtu oe i roto i to aau: ‘Mea na roto i to ˈu mana e te puai o to ˈu rima i noaa mai ai ia ˈu teie mau faufaa atoa,’+ 18 a haamanaˈo e o Iehova to Atua te horoa ra i te puai ia rahi ta oe faufaa,+ no te haapao i ta ˈna faufaa ta ˈna i horeo i to oe mau tupuna, mai i teie mahana.+

19 “Ia haamoˈe noa ˈtu oe ia Iehova to Atua e ia haere oe na muri i te tahi atu mau atua a tavini ai ia ratou e a piˈo ai i raro i mua ia ratou, te faaara nei au ia outou i teie mahana e e mou iho â outou.+ 20 Mai te mau nunaa ta Iehova e haamou nei i mua ia outou, mea na reira atoa outou e mou ai, no te mea aita outou i faaroo i te reo o Iehova to outou Atua.+