Deuteronomi

29 Teie te mau parau o te faufaa ta Iehova i faaue ia Mose e faaau i te nunaa o Iseraela i te fenua o Moabi, taa ê atu i te faufaa ta ˈna i faaau ia ratou i Horeba.+

2 Titau atura Mose ia Iseraela taatoa e na ô atura ia ratou: “Ua ite outou i te mau mea atoa ta Iehova i rave i mua i to outou mata i te fenua o Aiphiti ia Pharao e ta ˈna mau tavini atoa e to ˈna fenua taatoa,+ 3 te mau faautuaraa* rahi ta to outou mata i ite, tera mau tapao e semeio rahi.+ 4 Aita râ Iehova i horoa no outou i te aau no te taa, te mata no te ite e te tariˈa no te faaroo tae roa mai i teie mahana.+ 5 ‘A aratai noa ˈi au ia outou e 40 matahiti na te medebara,+ aita to outou ahu i ino i nia ia outou e aita to outou tiaa i ino i nia i to outou avae.+ 6 Aita outou i amu i te faraoa, e aita outou i inu i te uaina aore ra te tahi atu ava, ia ite hoi outou e o vau o Iehova to outou Atua.’ 7 Tae maira outou i teie vahi, e haere maira Sihona te arii o Hesebona+ e o Oga te arii o Basana+ e aro ia tatou. Ua pau râ ratou ia tatou.+ 8 I muri iho, rave aˈera tatou i to ratou fenua e horoa ˈtura i te reira ei tuhaa na te ati Reubena, te ati Gada e te afaraa o te opu o Manase.+ 9 No reira, a haapao i te mau parau o teie faufaa e a pee i te reira, ia manuïa hoi te mau mea atoa ta outou e rave.+

10 “Te tia nei outou pauroa i teie mahana i mua ia Iehova to outou Atua, te mau upoo o to outou mau opu, to outou mau matahiapo, to outou feia toroa, e pauroa te taata o Iseraela, 11 ta outou mau tamarii, ta outou mau vahine faaipoipo+ e te taata ê+ e noho ra i roto i to outou puhapa, mai te taata ohi i te vahie na outou tae roa i te taata huti i te pape na outou. 12 To ǒ nei oe no te ô i roto i te faufaa a Iehova to Atua e ta ˈna horeo, ta Iehova to Atua e faaau nei ia oe i teie mahana+ 13 ia nehenehe oia e faariro ia oe i teie mahana ei nunaa no ˈna,+ a riro atu ai oia ei Atua no oe,+ mai ta ˈna iho â i fafau ia oe e mai ta ˈna iho â i horeo i to mau tupuna, Aberahama,+ Isaaka+ e Iakoba.+

14 “E ere râ ia outou anaˈe ta ˈu e faaau nei i teie faufaa e teie horeo, 15 i te feia atoa râ e tia ra i ǒ nei e o outou i teie mahana i mua ia Iehova to tatou Atua e i te feia aita i ǒ nei ia tatou nei i teie mahana. 16 (Ua ite maitai hoi outou i to tatou huru oraraa i te fenua o Aiphiti e to tatou haereraa i to tatou tere na te tuhaa fenua o te mau nunaa e rave rau.+ 17 E i ite na outou i ta ratou mau mea faufau e ta ratou mau idolo faufau*+ hamanihia i te raau e te ofai, te ario e te auro, i ǒ ratou.) 18 A ara eiaha i rotopu ia outou i teie mahana ei tane, vahine, utuafare aore ra opu, e fariu ê to ˈna aau ia Iehova to tatou Atua no te haere e tavini i te mau atua o tera mau nunaa,+ e eiaha ei aˈa i ǒ outou o te faatupu mai i te maa taero e te raau tupu avaava.+

19 “Mai te peu râ e faaroo te tahi taata i te mau parau o teie horeo e e faaoru oia i roto i to ˈna aau, a na ô ai: ‘E maitai noa vau noa ˈtu e onoono noa vau i te rave i ta to ˈu aau e hinaaro,’ a ino atu ai te mau mea atoa* na to ˈna eˈa, 20 eita Iehova e faaore i ta ˈna hara.+ E ura râ to Iehova riri rahi i taua taata ra, e tae mai iho â te ati taatoa tei papaihia i roto i teie buka i nia ia ˈna,+ e e faaore mau â Iehova i to ˈna iˈoa i raro aˈe i te raˈi. 21 E e faataa ê Iehova ia ˈna i te mau opu atoa o Iseraela no te ino, ia au i te ati taatoa o te faufaa tei papaihia i roto i teie buka o te Ture.

22 “Ia ite te uˈi a muri aˈe o ta outou mau tamarii e te taata ê no te hoê fenua atea i te mau ati o te fenua, te ino ta Iehova i faatae mai i nia i te reira, 23 te ofai ura, te miti papaa e te paapaa, ia ore hoi ia ueuehia te huero maa na te fenua taatoa, ia ore ia oteo mai te maa e ia ruperupe te raau tupu, mai ia Sodoma e Gomora,+ ia Adema e Zeboîma+ tei pau, ta Iehova i haapau i roto i to ˈna riri e to ˈna riri rahi tahoo, 24 e parau ratou e te mau nunaa atoa: ‘No te aha Iehova i na ô ai i tera fenua?+ Eaha te tumu o teie riri ura e te rahi?’ 25 E e parau ratou: ‘No te mea ua faarue ratou i te faufaa a Iehova,+ te Atua o to ratou mau tupuna, ta ˈna i faaau ia ratou i to ˈna aratairaa ia ratou i rapae i te fenua o Aiphiti.+ 26 Haere atura râ ratou, tavini atura i te tahi atu mau atua e piˈo ihora i raro i mua ia ratou, e atua ta ratou i ore i ite o vai e ta ˈna i ore i faatia ia ratou ia haamori.*+ 27 Tupu ihora ïa to Iehova riri ura i nia i taua fenua ra, e faatae maira oia i nia i te reira i te ati taatoa tei papaihia i roto i teie buka.+ 28 No reira, iriti ê ihora Iehova ia ratou mai to ratou fenua i roto i to ˈna riri+ e to ˈna hae e to ˈna inoino rahi, e hopoi ê atura oia ia ratou i te tahi atu fenua, to reira ratou i teie mahana.’+

29 “Na Iehova to tatou Atua te mau mea tei hunahia,+ area te mau mea tei faaitehia, na tatou ïa e na to tatou huaai e a muri noa ˈtu, ia faaohipa tatou i te mau parau atoa o teie Ture.+