Deuteronomi

21 “Ia ite-noa-hia ˈtu te tahi taata tei haapohehia i te fenua ta Iehova to Atua e horoa nei no oe ia fatu oe e aita i itehia na vai i haapohe ia ˈna, 2 e haere ïa to oe mau matahiapo e haava+ e faito i te atea i rotopu i te tino pohe e te mau oire ati aˈe. 3 Na te mau matahiapo o te oire piri roa ˈˈe i te tino pohe e rave i roto i te nǎnǎ puaatoro i te hoê puaatoro apî aita i faaravehia aˈenei i te ohipa, aita te zugo i tuuhia aˈenei i nia iho ia ˈna, 4 e na te mau matahiapo o taua oire ra e putô i te puaatoro apî i raro i te hoê peho e pape te tahe ra, i te hoê vahi aita i arotehia aore ra i ueuehia i te huero, e na ratou e ofati i te aˈî o te puaatoro apî i reira i te peho.+

5 “E e tapiri mai te mau tahuˈa, te ati Levi, no te mea ua maiti Iehova to Atua ia ratou no te tavini ia ˈna,+ no te haamaitai i te nunaa i te iˈoa o Iehova.+ Na ratou e faaite e nafea ia faaafaro i te mau peapea atoa ua tupu te haavîraa uˈana.+ 6 E pauroa te matahiapo o te oire piri roa ˈˈe i te tino pohe te horoi i to ratou rima+ i nia ˈˈe i te puaatoro apî ua ofatihia te aˈî i te peho, 7 e e parau ratou: ‘Aita to matou rima i haamanii i teie toto, aita atoa to matou mata i ite i te maniiraa te reira. 8 Eiaha oe, e Iehova, e faahapa i to nunaa o Iseraela ta oe i hoo mai+ no te reira, e eiaha e vaiiho i te hara o te haamaniiraa i te toto hara ore ia vai i rotopu i to nunaa o Iseraela.’+ E e ore ratou e parihia i te haamaniiraa i te toto. 9 Mea na reira oe e iriti ê ai i te hara o te haamaniiraa i te toto hara ore mai i ǒ oe ra a rave ai i te mea tia i te aro o Iehova.

10 “Ia haere oe i te tamaˈi e aro i to oe mau enemi, ia haapau Iehova to Atua ia ratou no oe, ia rave oe ia ratou ei tîtî,+ 11 e ia ite oe i rotopu i te mau tîtî i te hoê vahine nehenehe e ua au roa oe ia ˈna e e hinaaro oe e rave ia ˈna ei vahine faaipoipo na oe, 12 e nehenehe oe e aratai ia ˈna i to fare. E hahu oia i to ˈna upoo, e tâpû oia i to ˈna maiuu, 13 e tatara oia i to ˈna ahu faatîtîraa, e e parahi oia i to fare. E oto oia i to ˈna metua tane e metua vahine hoê avaˈe taatoa,+ e i muri iho oe e nehenehe ai e taoto ia ˈna. E riro oe ei tane faaipoipo na ˈna e e riro oia ei vahine faaipoipo na oe. 14 Ia ore râ oe e au ia ˈna, e vaiiho ïa oe ia ˈna ia haere+ i te vahi atoa ta ˈna e hinaaro. Eiaha râ oe e hoo atu ia ˈna i te moni aore ra e haavî ia ˈna, i te mea ua faahaama oe ia ˈna.

15 “Mai te peu e piti vahine faaipoipo ta te hoê tane e mea here aˈe na ˈna hoê i te tahi atu* e ua fanau mai raua i te tamaiti na ˈna e na te vahine faaipoipo e ere mea here-roa-hia te tamaiti matahiapo,+ 16 i te mahana e horoa ˈi oia i ta ˈna tuhaa na ta ˈna na tamaiti, eita ta ˈna e nehenehe e faariro i te tamaiti a te vahine faaipoipo herehia ei matahiapo na ˈna, a ere atu ai te tamaiti a te vahine faaipoipo e ere mea here-roa-hia, te matahiapo hoi. 17 E farii oia i te tamaiti a te vahine faaipoipo e ere mea here-roa-hia ei matahiapo ma te horoa na ˈna e piti tuhaa o ta ˈna mau mea atoa, no te mea o ˈna te haamataraa o to ˈna puai faafanau. Tei ia ˈna ra te tiaraa matahiapo.+

18 “Mai te peu e tamaiti etaeta e te orure hau ta te hoê taata e eita oia e faaroo i to ˈna metua tane aore ra to ˈna metua vahine,+ e ua tamata raua i te aˈo ia ˈna, eita râ oia e hinaaro e faaroo ia raua,+ 19 e rave ïa to ˈna metua tane e to ˈna metua vahine ia ˈna, e aratai raua ia ˈna i te mau matahiapo i te uputa o to ˈna oire 20 e e parau raua i te mau matahiapo o to ˈna oire: ‘Mea etaeta e mea orure hau teie tamaiti ta mâua, e eita oia e hinaaro e faaroo ia mâua. Mea tamaa roa o ˈna ma te haapuupuu+ e mea inu ava.’+ 21 E pehi pauroa te taata o to ˈna oire ia ˈna i te ofai e ia pohe roa. E iriti ê ïa oe i te mea ino mai rotopu ia outou. E faaroo o Iseraela taatoa e e mǎtaˈu ratou i te reira.+

22 “Ia rave te tahi taata i te hoê hara e au i te utua pohe e ua haapohehia oia+ e ua tarîhia i nia i te hoê pou,+ 23 eiaha to ˈna tino pohe ia vai noa i nia i te pou hoê po taatoa.+ E huna mau râ oe ia ˈna i tera iho â mahana ra, no te mea mea faufau no te Atua te taata tei tarîhia,+ e eiaha oe e haaviivii i to fenua ta Iehova to Atua e horoa nei no oe ei tuhaa tutuuhia.+