Deuteronomi

19 “Ia haamou Iehova to Atua i te mau nunaa no ratou te fenua ta Iehova to Atua e horoa nei no oe e ua faaere oe ia ratou i to ratou fenua e ua parahi i roto i to ratou mau oire e to ratou mau fare,+ 2 e faataa ïa oe e toru oire i ropu i to fenua ta Iehova to Atua e horoa nei no oe ia fatu oe.+ 3 E vahi oe i te fenua ta Iehova to Atua i horoa no oe ei toru tuhaa, e e faaineine oe i te mau purumu ia nehenehe tei haapohe i te taata e horo i te hoê o tera na oire.

4 “Teie hoi te tupu no tei haapohe i te taata o te nehenehe e horo i reira ia ora oia: Ia haapohe oia i to ˈna taata tupu ma te opua ore e aita oia i hae ia ˈna na mua ˈˈe,+ 5 ei hiˈoraa, ia haere raua to ˈna taata tupu i roto i te uru raau e ohi i te vahie. E amo oia i to ˈna rima i nia no te tâpû i te tumu raau i te opahi,* ia matara râ te auri i te tapea, ia tano to ˈna taata tupu i te reira e ia pohe oia, e horo ïa tei haapohe i to ˈna taata tupu i te hoê o tera na oire ia ora oia.+ 6 Ia ore anaˈe, e nehenehe te taata tahoo i te toto+ e aˈuaˈu i tei haapohe i te taata no te riri rahi,* a roaa ˈtu ai oia ia ˈna e a haapohe atu ai ia ˈna, no te mea mea atea roa te oire. Aita râ i tano ia pohe oia, i te mea aita oia i hae i to ˈna taata tupu na mua ˈˈe.+ 7 No reira vau e faaue ai ia oe: ‘A faataa e toru oire.’

8 “Ia faarahi Iehova to Atua i to tuhaa fenua mai ta ˈna i horeo i to mau tupuna+ e ia horoa oia no oe i te fenua taatoa ta ˈna i fafau e horoa no to mau tupuna,+ 9 mai te peu iho â râ e haapao maitai oe i teie faaueraa atoa ta ˈu e horoa nei ia oe i teie mahana e here ia Iehova to Atua e e haere noa na to ˈna mau eˈa,+ e faataa ïa oe e toru oire hau atu i tera na toru oire.+ 10 E ore ïa te toto hara ore e haamaniihia+ i nia i to fenua ta Iehova to Atua e horoa nei no oe ei tuhaa tutuuhia, e eita oe e roohia i te hara a te haapohe taata.+

11 “Mai te peu râ ua hae te hoê taata i to ˈna taata tupu,+ e ua tiai i te rave ino ia ˈna, ua pepe maitai te taata tupu ia ˈna e ua pohe, e ua horo taua taata ra i te hoê o tera na oire, 12 e tono ïa te mau matahiapo o to ˈna oire i te taata e tii ia ˈna i reira e e tuu ia ˈna i te rima o te taata tahoo i te toto, ia pohe oia.+ 13 Eiaha oe* e aroha ia ˈna, e iriti ê oe i te hara o te toto hara ore no rotopu ia Iseraela,+ ia maitai oe.

14 “Ia noaa ta oe tuhaa i te fenua ta Iehova to Atua e horoa nei no oe ia fatu oe, eiaha oe e hauti i te tapao otia o te fenua o to taata tupu+ i reira to te mau tupuna tuuraa i te otia.

15 “Eita ta te hoê noa ite e nehenehe e faahapa i te tahi atu no te tahi hape aore ra hara ta ˈna i rave.+ Na nia i te haapapuraa a* e piti ite aore ra te haapapuraa a e toru ite e haapapuhia ˈi te reira.+ 16 Ia faahapa te tahi ite manaˈo ino i te tahi taata e ia pari ia ˈna i te tahi hapa,+ 17 e tia ïa na piti taata e peapea to raua i mua ia Iehova, i mua i te mau tahuˈa e te mau haava o taua mau mahana ra.+ 18 E titorotoro maitai te mau haava+ i te taata, e mai te peu e ite haavare te taata tei faahapa e mea haavare ta ˈna pariraa i to ˈna taeae, 19 e rave ïa outou i nia ia ˈna mai ta ˈna iho â i opua e rave i nia i to ˈna taeae,+ e e iriti ê outou i te mea ino mai rotopu ia outou.+ 20 E faaroo e e mǎtaˈu vetahi atu, e e ore roa ratou e rave faahou i te tahi mea ino mai tera i rotopu ia outou.+ 21 Eiaha oe* e aroha:+ E ora ei ora ïa, e mata ei mata, e niho ei niho, e rima ei rima, e avae ei avae.+