Deuteronomi
17 “Eiaha oe e pûpû ei tusia ia Iehova to Atua i te tahi puaatoro oni aore ra mamoe e ino to nia iho ia ˈna aore ra te tahi atu mea ino, mea faufau hoi te reira no Iehova to Atua.+
2 “A feruri na e itehia i to mau oire ta Iehova to Atua e horoa nei no oe, te tahi tane aore ra vahine o te rave ra i te mea ino i te aro o Iehova to Atua e o te ofati ra i ta ˈna faufaa,+ 3 e te hahi ê ra oia e te haamori ra i te tahi atu mau atua e te tipapa ra i raro i mua ia ratou, i mua i te mahana, te avaˈe aore ra te nuu taatoa o te raˈi,+ aita hoi au i faaue i te reira.+ 4 Ua faaite-anaˈe-hia ia oe te reira aore ra ia faaroo oe, e titorotoro maitai ïa oe i te taata. Mai te peu e tera iho â,+ te ravehia ra teie ohipa faufau i Iseraela, 5 e aratai ïa oe i te tane aore ra te vahine tei rave i teie ohipa ino i rapaeau i te mau uputa o te oire, e e pehihia taua tane ra aore ra taua vahine ra i te ofai e ia pohe roa.+ 6 Na nia i te haapapuraa a* e piti ite aore ra e toru ite+ e haapohehia ˈi te taata mea titauhia ia pohe oia. Eiaha oia ia haapohehia na nia i te haapapuraa a te hoê noa ite.+ 7 Na te rima o te mau ite na mua e haapohe ia ˈna, e te rima o te nunaa taatoa i muri iho. E iriti ê oe i te mea ino mai rotopu ia outou.+
8 “Ia tupu te tahi fifi i roto hoê o to mau oire eita e haere ia oe ia haava, ua manii anei te toto,+ ua horohia te tahi, e ohipa haavî uˈana tei ravehia aore ra te tahi atu peapea, e tia mai ïa oe e e haere oe i te vahi ta Iehova to Atua e maiti.+ 9 A haere i te mau tahuˈa ati Levi e i te haava+ o taua mau mahana ra, e a uiui ia ratou, e na ratou e faaite ia oe i te faaotiraa.+ 10 I muri iho, e haa oe ia au i te faaotiraa ta ratou i faaite ia oe i te vahi ta Iehova e maiti. A haapao maitai i te rave ia au i ta ratou mau faaueraa atoa ia oe. 11 E haa oe ia au i te ture ta ratou e faaite ia oe e ia au i te faaotiraa ta ratou e parau ia oe.+ Eiaha e hahi ê i te faaotiraa ta ratou e faaite ia oe, eiaha i te pae atau eiaha atoa i te pae aui.+ 12 Ia pohe te taata o te haa ma te teoteo a ore ai e faaroo i te tahuˈa e tavini ra ia Iehova to Atua aore ra i te haava.+ E iriti ê oe i te mea ino mai rotopu ia Iseraela.+ 13 E faaroo e e mǎtaˈu ïa te nunaa taatoa, e eita ratou e haa faahou ma te teoteo.+
14 “Ia tomo oe i te fenua ta Iehova to Atua e horoa nei no oe, ia fatu oe i te reira, ia ora oe i reira e ia na ô oe: ‘A vaiiho na ia ˈu ia faatoroa i te tahi arii i nia ia ˈu mai te mau nunaa atoa ati aˈe ia ˈu,’+ 15 mai te reira anaˈe, e faatoroa mau â ïa oe i te tahi arii ta Iehova to Atua e maiti.+ E faatoroa oe i te tahi arii no rotopu i to mau taeae. Ua opanihia oe ia faatoroa i nia ia oe i te tahi taata ê e ere i te taeae no oe. 16 Eiaha râ oia e faarahi i te puaahorofenua na ˈna+ aore ra e faahoˈi i te nunaa i Aiphiti ia rahi atu â te puaahorofenua e noaa mai,+ i te mea ua parau Iehova ia outou, ‘Eiaha roa ˈtu outou e hoˈi na tera eˈa.’ 17 Eiaha atoa oia e faarahi i te vahine faaipoipo na ˈna, ia ore to ˈna aau ia hahi ê.+ Eiaha atoa oia e faarahi roa i te ario e te auro na ˈna.+ 18 Ia parahi oia i nia i te terono o ta ˈna faatereraa arii, e papai oia no ˈna i roto i te hoê buka* i teie Ture, e vai ra i te mau tahuˈa ati Levi.+
19 “E vai noa te reira ia ˈna ra e e taio oia i te reira i te mau mahana atoa o to ˈna oraraa.+ E haapii hoi oia i te mǎtaˈu ia Iehova to ˈna Atua e e haapao oia i te mau parau atoa o teie Ture e teie mau faaueraa ma te faaohipa i te reira.+ 20 Eita ïa to ˈna aau e faateitei na nia ˈˈe i to ˈna mau taeae, e eita oia e hahi ê i te faaueraa, eiaha i te pae atau, eiaha atoa i te pae aui, ia nehenehe hoi oia e ta ˈna mau tamaiti e faatere maoro ia Iseraela.