Deuteronomi

15 “I te mau hitu matahiti atoa, ei tuuraa tarahu ta oe.+ 2 Mai teie te tuuraa tarahu: E faaore te taata atoa i te tarahu a to ratou taata tupu. Eiaha ratou e titau i te tahi faahoˈiraa i to ratou taata tupu aore ra taeae, e faaite-haere-hia hoi te tahi tuuraa tarahu no Iehova.+ 3 E nehenehe oe e titau i te tahi faahoˈiraa i te taata ê,+ eiaha râ oe e titau i te mau mea atoa ia faahoˈi mai to taeae. 4 Eiaha râ hoê i rotopu ia outou ia riro ei taata veve, e haamaitai mau â hoi Iehova ia oe+ i te fenua ta Iehova to Atua e horoa ˈtu nei ia fatu oe ei tuhaa tutuuhia, 5 mai te peu noa râ e faaroo maitai oe i te reo o Iehova to Atua e e haapao maitai oe pauroa teie faaueraa ta ˈu e horoa ˈtu nei ia oe i teie mahana.+ 6 E haamaitai Iehova to Atua ia oe mai ta ˈna iho â i fafau ia oe, e e horoa* oe na te nunaa e rave rahi. O oe râ, aita ïa e faufaa ia tipee oe.+ E e faatere oe e rave rahi nunaa, eita râ ratou e faatere ia oe.+

7 “Ia riro noa ˈtu hoê o to mau taeae i rotopu ia outou ei taata veve i te hoê o to mau oire o te fenua ta Iehova to Atua e horoa nei no oe, eiaha e faaetaeta i to aau aore ra ia pipiri i nia i to taeae veve.+ 8 E hohora noa ˈtu oe i to rima ia ˈna+ e e horoa* iho â oe i ta ˈna e hinaaro mau ra aore ra e ere ra. 9 A ara eiaha e atuatu i teie manaˈo ino i roto i to aau: ‘Ua fatata te hitu o te matahiti, te matahiti o te tuuraa tarahu,’+ a ore atu ai e faaite i to aau horoa i to taeae veve e a ore atu ai e horoa i te tahi mea na ˈna. Ia tiaoro oia ia Iehova ma te faahapa ia oe, e riro ïa te reira ei hara na oe.+ 10 E horoa oe na ˈna ma te aau horoa noa,+ e eiaha oe* e horoa na ˈna ma te hinaaro ore, no te reira hoi e haamaitai ai Iehova to Atua i ta oe mau haaraa e ohipa atoa.+ 11 E ite-noa-hia hoi te feia veve i ǒ outou.+ No reira vau e faaue ai ia oe: ‘E hohora oe i to rima ma te aau horoa noa no to taeae veve i roto i te ati i to fenua.’+

12 “Mai te peu ua hoohia ˈtu ia oe hoê o to mau taeae, e tane aore ra e vahine Hebera, e ua tavini oia ia oe e ono matahiti, e tuu oe ia ˈna i te hitu o te matahiti.+ 13 E ia tuu oe ia ˈna, eiaha oe e faahoˈi ia ˈna aita e faufaa ta ˈna. 14 E horoa noa ˈtu oe na ˈna i te tahi mea o ta oe nǎnǎ mamoe e puaaniho, o ta oe vahi tairiiriraa huero maa,* e o ta oe apoo taataahiraa olive e te vine. Mai ia Iehova iho â to Atua tei haamaitai ia oe, e horoa oe na ˈna. 15 A haamanaˈo e i riro na oe ei tîtî i te fenua o Aiphiti e ua hoo mai Iehova to Atua ia oe. No reira vau e faaue ai ia oe ia na reira i teie mahana.

16 “Ia na ô râ oia ia oe: ‘Eita vau e vaiiho ia oe!’ no te mea te here ra oia ia oe e to utuafare, i te mea te oaoa ra oia i ǒ oe,+ 17 e rave ïa oe i te tahi pine e e patia oe i to ˈna tariˈa i nia i te uputa, e e riro oia ei tavini na oe no te oraraa taatoa. E na reira atoa oe i ta oe tavini vahine. 18 Eiaha oe e manaˈo e pau oe ia tuu oe ia ˈna e ia vaiiho oia ia oe, no te mea te hoo o to ˈna taviniraa ia oe i na ono matahiti, e piti ïa taime te moni ohipa a te hoê rave ohipa tarahuhia, e ua haamaitai Iehova to Atua ia oe i te mau mea atoa i ravehia.

19 “Ia haamoˈa oe no Iehova to Atua i te mau fanauˈa oni matamua o ta oe nǎnǎ puaatoro e ta oe nǎnǎ mamoe e puaaniho.+ Eiaha oe e faarave i te ohipa i te fanauˈa matamua o ta oe nǎnǎ puaatoro,* eiaha atoa e hahu i te fanauˈa matamua o ta oe nǎnǎ mamoe e puaaniho. 20 E amu oe e to utuafare i te reira i mua ia Iehova to Atua i tera e tera matahiti i te vahi ta Iehova e maiti.+ 21 Mai te peu râ e ino to nia iho i taua animara ra, e pirioi, e matapo, aore ra te tahi atu ino rahi, eiaha oe e pûpû i te reira ei tusia ia Iehova to Atua.+ 22 E amu oe i te reira i roto i to mau oire,* te taata viivii e te taata viivii ore atoa, mai te mea ra e zabi aore ra e aili.+ 23 Eiaha râ oe e amu i to ˈna toto.+ E ninii oe i te reira i raro i te repo mai te pape.+