Deuteronomi

11 “E here oe ia Iehova to Atua+ e e haapao noa oe i ta ˈna i faaue mai e ta ˈna mau faatureraa, ta ˈna mau faaotiraa haavaraa e ta ˈna mau faaueraa. 2 Ua ite outou e i teie mahana, te paraparau nei au ia outou, eiaha i ta outou mau tamarii tei ore i faaruru aore ra i ite i te aˈo a Iehova to outou Atua,+ to ˈna mana,+ to ˈna rima puai+ e to ˈna rima faatorohia. 3 Aita ratou i ite i ta ˈna mau tapao e ta ˈna mau ohipa i rave i Aiphiti ia Pharao arii o Aiphiti e to ˈna fenua taatoa,+ 4 e ta ˈna i rave i te mau nuu a to Aiphiti, ta Pharao mau puaahorofenua e pereoo tamaˈi, tei tapoˈihia e te miti Uteute a aˈuaˈu ai ratou ia outou, e te mouraa ratou ia Iehova e a muri noa ˈtu.*+ 5 Aita ratou i ite i ta ˈna i rave no* outou i te medebara e tae roa mai ai outou i teie vahi, 6 e ta ˈna i rave ia Datana e Abirama, na tamaiti a Eliaba te tamaiti a Reubena, i te amaharaa te fenua e horomiiraa ia raua, e to raua mau utuafare e to raua na fare ie e pauroa te taata e animara tei pee ia raua, i mua i te mata o Iseraela taatoa.+ 7 O to outou mata tei ite i te mau ohipa maere atoa ta Iehova i rave.

8 “E auraro outou i te faaueraa taatoa ta ˈu e horoa ˈtu nei ia outou i teie mahana, ia riro outou ei nunaa puai e ia haere, i te tahi atu pae, i te fenua ta outou e fatu, 9 e ia ora maoro outou+ i te fenua ta Iehova i horeo e horoa no to outou mau tupuna e to ratou huaai,+ e fenua e tahe noa te û e te meri.+

10 “E ere te fenua ta outou e fatu mai te fenua o Aiphiti, mai reira mai outou i te haereraa i rapae, i reira outou i ueue noa ˈi i ta outou mau huero maa e i rohi ai i te faararirari i te faaapu,* mai ta outou e faararirari i te hoê ô maa tupu. 11 Area te fenua i te tahi atu pae i reira outou e haere ai, a fatu atu ai, e fenua mouˈa e te peho+ ïa. E inu taua fenua ra i te pape o te ûa no te raˈi mai,+ 12 e fenua ta Iehova to outou Atua e atuatu ra. Tei nia noa i te reira te mata o Iehova to outou Atua, mai te omuaraa o te matahiti e tae roa i te hopea o te matahiti.

13 “Ia faaroo maite outou i ta ˈu mau faaueraa ta ˈu e faaue nei ia outou i teie mahana, ia here outou ia Iehova to outou Atua e ia tavini outou ia ˈna ma to outou aau atoa e to outou ora* atoa,+ 14 e horoa atoa ˈtu vau i te ûa no to outou fenua i te taime faataahia, te ûa matamua e te ûa hopea, e e haaputu outou i ta outou huero maa e ta outou uaina apî e ta outou hinu.+ 15 E faatupu vau i te aihere i nia iho i to outou fenua no ta outou mau animara. E tamaa e e paia outou.+ 16 A ara eiaha to outou aau ia hema a hahi ê atu ai outou, a haamori atu ai i te tahi atu mau atua e a piˈo atu ai i raro i mua ia ratou.+ 17 Ia ore anaˈe, e ura to Iehova riri ia outou, e e tapiri oia i te raˈi ia ore ia ûa mai+ e ia ore te fenua e horoa mai i te maa, a mou oioi atu ai outou mai nia i te fenua maitai ta Iehova e horoa nei no outou.+

18 “E nenei outou i teie mau parau ta ˈu i nia i to outou aau e to outou manaˈo* e e taamu outou i te reira i nia i to outou rima ei haamanaˈoraa. E riro te reira mai te hoê taamu upoo i nia i to outou rae.*+ 19 E haapii outou i te reira i ta outou mau tamarii, a paraparau ai no nia i te reira ia parahi outou i roto i to outou fare, ia haere outou na nia i te purumu, ia tarava outou e ia tia mai outou i nia.+ 20 A papai i te reira i nia i na pou opani o to outou fare e i nia i to outou mau uputa,* 21 a ora maoro atu ai outou e ta outou mau tamarii+ i te fenua ta Iehova i horeo e horoa no to outou mau tupuna,+ a vai noa ˈi te raˈi i nia ˈˈe i te fenua.

22 “Ia haapao maitai outou i teie faaueraa ta ˈu e horoa ˈtu nei ia outou e ia faaohipa outou i te reira, oia hoi e here ia Iehova to outou Atua,+ e haere na to ˈna mau eˈa atoa e e ati maite ia ˈna,+ 23 e tiahi Iehova i teie mau nunaa atoa mai mua ia outou,+ e e rave outou i te fenua o te mau nunaa puai aˈe e te rahi aˈe ia outou.+ 24 I te mau vahi atoa e taahi ai to outou avae, e riro ïa no outou.+ Mai te medebara tae roa i Lebanona, mai te anavai, te anavai Eupharate, tae roa i te miti i te pae tooa o te râ,* e riro ïa ei otia no outou.+ 25 Aita e taata e faaû ia outou.+ E haaparare Iehova to outou Atua i te riaria e te mǎtaˈu ia outou i nia i te fenua taatoa na reira outou e haere ai,+ mai ta ˈna iho â i fafau ia outou.

26 “Inaha, te tuu nei au i mua ia outou i teie mahana i te tahi haamaitairaa e te tahi ati:+ 27 te haamaitairaa ia faaroo outou i te mau faaueraa a Iehova to outou Atua ta ˈu e faaue nei ia outou i teie mahana,+ 28 e te ati ia ore outou ia faaroo i te mau faaueraa a Iehova to outou Atua+ e ia hahi ê outou i te eˈa ta ˈu e faaue nei ia outou ia na reira i te haere i teie mahana e ia pee outou i te mau atua aita outou i ite o vai.

29 “Ia faatomo Iehova to outou Atua ia outou i te fenua e fatu ai outou, e faahiti* outou i te haamaitairaa mai te mouˈa Gerizima mai e i te ati mai te mouˈa Ebala mai.+ 30 E ere anei na mouˈa tei te tahi atu pae o Ioridana i te pae tooa o te râ,* i te fenua o te ati Kanaana e ora ra i te Araba, i mua ia Gilagala, i pihai iho i te mau tumu raau rarahi o More?+ 31 Te na roto atu nei hoi outou i te pape Ioridana a tomo atu ai e a fatu atu ai i te fenua ta Iehova to outou Atua e horoa nei no outou.+ Ia fatu outou i te reira e ia ora outou i reira, 32 e haapao maitai outou i te faaohipa i te mau faaueraa e te mau faaotiraa haavaraa atoa ta ˈu e tuu nei i mua ia outou i teie mahana.+