Deuteronomi

1 Teie te mau parau a Mose i te ati Iseraela taatoa i te tuhaa fenua o Ioridana i te medebara, i te mau vahi papu pâpâmǎrô i mua ia Suphe, i ropu ia Parana, Tophela, Labana, Hazerota e Dizahaba. 2 Mai Horeba tae roa i Kadesa-barenea+ na te eˈa e tae atu ai i te mouˈa Seira, 11 ïa mahana. 3 I te 40raa o te matahiti,+ i te mahana matamua o te 11 o te avaˈe, paraparau ihora Mose i te ati Iseraela* ia au i ta Iehova atoa i faaue ia ˈna ia parau ia ratou. 4 Ua tupu te reira i muri iho i to ˈna upootiaraa i nia ia Sihona,+ te arii o te ati Amori, e parahi ra i Hesebona, e ia Oga+ te arii o Basana, e parahi ra i Asetarota, i Ederei.+ 5 I te tuhaa fenua o Ioridana i te fenua o Moabi, faataa ˈtura Mose i te Ture,+ a na ô ai:

6 “Ua parau mai Iehova to tatou Atua i Horeba: ‘Mea huru maoro to outou faaearaa i teie tuhaa fenua mouˈa.+ 7 A tia mai e a haere i te tuhaa fenua mouˈa o te ati Amori+ e i te mau tuhaa fenua tapiri atoa: te Araba,+ te tuhaa fenua mouˈa, te Sephela, te Negeba e te pae tahatai.+ A haere i te fenua o te ati Kanaana, e tae roa i Lebanona*+ e te anavai rahi, te anavai Eupharate.+ 8 A hiˈo, ua tuu vau i te fenua i mua ia outou. A haere a fatu i taua fenua ra ta Iehova i horeo i to outou mau metua ia Aberahama, Isaaka+ e Iakoba,+ e horoa no ratou e to ratou huaai i muri mai ia ratou.’+

9 “Ua parau vau ia outou i taua taime ra: ‘Eita outou e maraa ia ˈu anaˈe.+ 10 Ua faarahi Iehova to outou Atua ia outou, e i teie mahana ua rahi roa outou mai te mau fetia o te raˈi.+ 11 Ia faarahi Iehova, te Atua o to outou mau tupuna, ia outou+ ia tausani taime, e ia haamaitai oia ia outou mai ta ˈna iho â i fafau ia outou.+ 12 E nafea e maraa ˈi ia ˈu anaˈe ia amo ia outou, e hopoia teimaha hoi, e te teimaha o to outou mau fifi e ta outou mau mârôraa?+ 13 A maiti i te tahi mau tane feruriraa paari, haroˈaroˈa e te aravihi o to outou mau opu, e e faatoroa vau ia ratou ei upoo no outou.’+ 14 Ua pahono mai outou: ‘Mea maitai ta oe i parau ia matou ia rave.’ 15 Rave ihora ïa vau i te mau upoo o to outou mau opu, e tane feruriraa paari e te aravihi, e faatoroa ˈtura ia ratou ei upoo no outou, ei raatira tausani, raatira hanere, raatira pae ahuru, raatira ahuru, e ei feia toroa o to outou mau opu.+

16 “I taua taime ra to ˈu faaueraa i to outou mau haava: ‘Ia haava outou i to outou mau taeae, e haava ïa outou ia ratou ma te parau-tia,+ e piti anei ati Iseraela aore ra hoê ati Iseraela e hoê taata ê e noho ra i rotopu ia outou.+ 17 Eiaha outou e maitiiti i te taata i roto i te haavaraa.+ Ei hoê â haavaraa ta outou i te taata haihai e te taata toroa.+ Eiaha outou e taiâ i te taata,+ na te Atua hoi te haavaraa.+ E mai te peu mea fifi roa te tahi haavaraa, e faaite mai ïa outou ia ˈu, e na ˈu e haava i te reira.’+ 18 I taua taime ra to ˈu horoaraa ˈtu i te mau faaueraa no nia i te mau mea atoa ia rave outou.

19 “Faareva aˈera tatou mai Horeba e haere aˈera na taua medebara rahi ra e te riaria,+ ta outou i ite na te eˈa e tae atu ai i te tuhaa fenua mouˈa o te ati Amori,+ mai ta Iehova iho â to tatou Atua i faaue mai, e tae atura tatou i Kadesa-barenea.+ 20 Na ô atura vau ia outou: ‘Ua tae mai outou i te tuhaa fenua mouˈa o te ati Amori, ta Iehova to tatou Atua e horoa mai nei no tatou. 21 A hiˈo, ua horoa ˈtu Iehova to outou Atua i tera fenua no outou. A tia mai, a fatu i te reira, mai ta Iehova iho â, te Atua o to outou mau tupuna, i parau ia outou.+ Eiaha e taiâ, eiaha e riaria.’

22 “Tera râ, faafatata maira outou pauroa ia ˈu e na ô maira: ‘E tono anaˈe i te tahi mau tane na mua ia tatou ia hiˈopoa haere i te fenua no tatou e ia faaite mai i te parau no nia i te eˈa ia na reira tatou i te haere e te mau oire ta tatou e tomo atu.’+ 23 Ua au vau i teie parau, e maiti ihora ïa vau 12 tane i rotopu ia outou, hoê no te opu tataitahi.+ 24 Reva ˈtura ratou, pauma aˈera i te tuhaa fenua mouˈa,+ tae atura i te peho o Esekola e hiˈopoa haere aˈera i te fenua. 25 Rave aˈera ratou i te tahi mau maa hotu o te fenua ta ratou i hopoi mai, e faaite maira i teie parau: ‘E fenua maitai+ ta Iehova to tatou Atua e horoa mai nei no tatou.’ 26 Aita râ outou i hinaaro e pauma, e ua patoi outou i te faaueraa a Iehova to outou Atua.+ 27 Mutamuta noa ihora outou i roto i to outou mau fare ie, a na ô ai: ‘No to Iehova hae ia tatou i aratai ai oia ia tatou i rapae i te fenua o Aiphiti, no te tuu ia tatou i te rima o te ati Amori e no te haamou ia tatou. 28 Mai te aha tera vahi ta tatou e haere? Ua faatoaruaru*+ to tatou mau taeae i to tatou aau a na ô ai: “E feia puai aˈe ratou e te roa ˈˈe ia tatou, e mea teitei to ratou mau oire e mea auahia i te patu tae roa i te raˈi,*+ e ua ite matou i te ati Anaka+ i ǒ.”’

29 “Parau atura ïa vau ia outou: ‘Eiaha outou ia riaria, eiaha e taiâ no ratou aˈe.+ 30 E na mua Iehova to outou Atua ia outou e e aro oia no outou,+ mai ta ˈna i rave i Aiphiti i mua maitai i to outou mata.+ 31 E ua ite outou i te medebara mea nafea to Iehova to outou Atua amoraa ia outou mai te hoê taata e amo ra i ta ˈna tamaiti, na te mau vahi atoa ta outou i haere tae roa mai i teie vahi.’ 32 Noa ˈtu râ teie mau parau atoa, aita outou i tiaturi ia Iehova to outou Atua,+ 33 tei na mua hoi ia outou na nia i te eˈa, no te hiˈopoa haere i te tahi vahi e puhapa ˈi outou. Ua fa mai oia na roto i te auahi i te po e na roto i te ata i te ao no te faaite ia outou i te eˈa ia na reira outou i te haere.+

34 “Te faaroo noa ra hoi Iehova i ta outou e parau ra, e riri ihora oia. Horeo+ atura oia: 35 ‘Aita hoê aˈe o teie mau taata o teie uˈi ino e ite i te fenua maitai ta ˈu i horeo e horoa no to outou mau metua,+ 36 o Kaleba anaˈe râ, te tamaiti a Iephune. E ite oia i te reira, e e horoa vau i te fenua ta ˈna i haere no ˈna e no ta ˈna mau tamarii, no te mea ua pee oia ia Iehova ma te aau atoa.*+ 37 (Ua riri atoa Iehova ia ˈu no outou aˈe, e ua na ô mai: “O oe atoa, e ore oe e tomo i ǒ.+ 38 O Iosua te tamaiti a Nuna, e tia ra i mua ia oe,+ te tomo i taua fenua ra.+ A* faaitoito ia ˈna,+ na ˈna hoi e aratai ia Iseraela ia fatu i taua fenua ra.”) 39 Oia atoa ta outou mau tamarii ta outou i parau e haruhia ratou,+ e ta outou mau tamaiti o tei ore i ite i teie mahana i te maitai e te ino, o ratou te tomo atu, e e horoa vau i taua fenua ra no ratou ia fatu ratou.+ 40 Outou râ, a fariu mai e a haere i te medebara na te eˈa e tae atu ai i te miti Uteute.’+

41 “Na ô maira ïa outou ia ˈu: ‘Ua hara matou ia Iehova. E pauma matou i teie nei e e aro matou, mai ta Iehova iho â to tatou Atua i faaue mai!’ Rave aˈera ïa outou tataitahi i ta outou mau mauhaa tamaˈi, a manaˈo ai e mea ohie ia pauma i nia i te mouˈa.+ 42 Na ô maira râ Iehova ia ˈu: ‘A parau ia ratou: “Eiaha outou e pauma e aro, e ore hoi au e tia i pihai iho ia outou.+ Ia pauma noa ˈtu outou, e pau outou i to outou mau enemi.”’ 43 Paraparau atura ïa vau ia outou, aita râ outou i faaroo. Ua patoi outou i ta Iehova faaueraa, e ma te teoteo ua tamata outou i te pauma i nia i te mouˈa. 44 Haere maira ïa te ati Amori, o te parahi ra i nia i taua mouˈa ra, e aro ia outou e aˈuaˈu maira ia outou mai te mau manu meri ra e tapapa mai ra, e haapurara aˈera ia outou na Seira tae roa i Horamâ. 45 Hoˈi maira ïa outou e haamata ihora i te taˈi i mua ia Iehova. Aita râ Iehova i faaroo ia outou, aita oia i haapao mai ia outou. 46 No reira outou i faaea noa ˈi i Kadesa ehia maororaa.