Te faatiaraa a Mareko

4 Haapii faahou atura Iesu i te taata i tatahi e mea rahi roa te taata tei haere mai ia ˈna ra. Haere atura ïa oia i nia i te hoê poti, parahi ihora e faaatea rii atura i tai a faaea noa ˈi te nahoa atoa i tatahi.+ 2 Haapii atura oia ia ratou e rave rahi parau mau na roto i te mau faahohoˈaraa+ e na ô atura:+ 3 “A faaroo mai na. Inaha, e taata ueue tei haere e ueue i te huero.+ 4 A ueue ai oia, topa ihora te tahi mau huero na te hiti purumu, haere maira te mau manu e amu ihora i te mau huero. 5 Topa ihora te tahi atu mau huero i te vahi ofaifai aita i rahi te repo e tupu ihora, no te mea e maa repo iti to reira.+ 6 I te puairaa mai râ te mahana, paapaa aˈera te mau huero e mǎrô atura no te mea aita i aˈa. 7 Topa ihora te tahi atu mau huero i roto i te mau raau taratara, tupu maira te mau raau taratara, tapoˈi aˈera i te mau huero, e aita ˈtura i hotu mai.+ 8 Topa ihora râ te tahi atu i nia i te repo maitai, e a tupu e a rahi mai ai, hotu maira e tataitoru ahuru ta te hoê, tataiono ahuru ta te tahi e tataihanere ta te tahi atu.”+ 9 Na ô faahou atura oia: “Te taata e tariˈa to ˈna no te faaroo, ia faaroo ïa.”+

10 A faaea noa ˈi Iesu o ˈna anaˈe, uiui maira te tahi mau pǐpǐ e na 12 no nia i te mau faahohoˈaraa.+ 11 Parau atura oia: “Ua horoahia ia outou te taaraa i te parau huna moˈa+ o te Faatereraa arii a* te Atua, no to rapae râ, e faahohoˈaraa anaˈe ïa ta ratou e faaroo.+ 12 No reira, hiˈo noa ˈi ratou, te hiˈo ra, aita râ e ite ra, e horoa noa ˈi ratou i te tariˈa faaroo, te faaroo ra, aita râ e taa ra i te auraa, eita atoa ratou e hoˈi mai i te Atua ra a faaorehia ˈtu ai ta ratou hara.”+ 13 Na ô faahou atura oia: “Aita e taa ra ia outou teie faahohoˈaraa, e nafea ïa e taa ˈi ia outou te tahi atu mau faahohoˈaraa atoa?

14 “E ueue te taata ueue i te poroi.+ 15 Te hiti purumu i ueuehia ˈi te huero, o te feia ïa no faaroo noa ihora i te poroi, haere maira râ Satani+ e hutihuti ihora i te poroi i ueuehia i roto ia ratou.+ 16 Oia atoa, te vahi ofaifai i ueuehia ˈi te huero, o te feia ïa no faaroo noa ihora i te poroi e farii atura i te reira ma te oaoa.+ 17 Aita râ te poroi i aˈa i roto i to ratou aau, maa taime noa ïa to ratou fariiraa i te reira, e i te tupuraa iho â te ati aore ra te hamani-ino-raa no te poroi, turori aˈera ratou. 18 Te vahi taratara i topa ˈi te huero, o te feia ïa tei faaroo i te poroi.+ 19 Tupu maira râ i roto i to ratou aau te haapeapearaa+ no te oraraa o teie ao* nei, te mana haavarevare o te taoˈa rahi+ e te hinaaro+ i te mau mea rau, tapoˈi aˈera i te poroi, e aita ˈtura i hotu mai. 20 E te repo maitai i ueuehia ˈi te huero, o te feia ïa tei faaroo e tei farii maitai i te poroi, hotu maira e tataitoru ahuru ta te hoê, tataiono ahuru ta te tahi e tataihanere ta te tahi atu.”+

21 Parau faahou atura oia ia ratou: “Eita te mori e tuuhia i raro aˈe i te hoê farii* aore ra i raro aˈe i te hoê roˈi, e tuuhia râ i nia i to ˈna vairaa, e ere anei?+ 22 Aita hoi e mea huna eita e faaitehia, e aita e mea i tapoˈi-maitai-hia eita e haamahorahia.+ 23 Te taata e tariˈa to ˈna no te faaroo, ia faaroo ïa.”+

24 Parau faahou atura oia ia ratou: “A faaroo maitai i ta outou e faaroo nei.+ Tei te huru o ta outou faitoraa e faito-atoa-hia ˈi ta outou, oia mau, hau atu â ta outou e fanaˈo. 25 Te taata hoi e faufaa ta ˈna, e horoahia hau atu â e e rahi mau â ta ˈna faufaa.+ Te taata râ aita ta ˈna e faufaa, oia atoa te mea e vai ra ia ˈna ra e iriti-ê-hia.”+

26 Na ô faahou atura ïa oia: “E au te Faatereraa arii a te Atua i te hoê taata o te ueue i te huero i raro i te repo. 27 E taoto oia i te po e e ara i te ao, e oteo e e tupu mai te huero ma te ore oia e ite e nafea. 28 Na te repo iho e faahotu riirii mai, te omou na mua, te maa sitona i muri iho o te paari roa mai i te pae hopea. 29 I te paariraa iho â te sitona, e tâpû oia i te reira i te tipi fefe, ua tae mai hoi te ootiraa.”

30 Na ô faahou atura oia: “I te aha e faaau ai tatou i te Faatereraa arii a te Atua, aore ra na roto i teihea faahohoˈaraa e faataa ˈi tatou i te reira? 31 E au te reira i te hoê huero sinapi, te huero nainai roa ˈˈe o te mau huero atoa o te fenua ia tanuhia i raro i te repo.+ 32 Ia tanuhia râ, e tupu mai te reira e e rahi aˈe i te mau maa tupu atoa a toro atu ai to ˈna mau amaa, a nehenehe atu ai te mau manu o te reva e parahi i raro aˈe i to ˈna marumaru.”

33 Ua haapii oia ia ratou i te poroi na roto e rave rahi faahohoˈaraa+ mai tera te huru, ia au i ta ratou e nehenehe e taa. 34 Oia mau, na roto noa i te mau faahohoˈaraa e paraparau ai oia ia ratou. I ta ˈna anaˈe râ mau pǐpǐ e faataa ˈi oia i te mau mea atoa.+

35 E ahiahi ihora i taua mahana ra, parau atura oia ia ratou: “Mai, fano anaˈe i tera ˈtu pae.”+ 36 I muri aˈe i to te mau pǐpǐ tuuraa i te nahoa ia hoˈi, rave aˈera ratou i te poti tei roto Iesu e fano atura e te tahi atu mau poti.+ 37 Tupu ihora te hoê mataˈi rahi, fati maira te mau are i nia i te poti tei fatata roa i te tomo.+ 38 Tei te muriraa râ o te poti Iesu, e taoto ra i nia i te turua. Faaara maira te mau pǐpǐ ia ˈna e na ô maira: “Orometua, e pohe tatou, aita oe e haapeapea ra?” 39 Tia aˈera oia, tamaˈi ihora i te mataˈi e parau atura i te miti: “A faaea! Mamû!”+ Faaea ihora te mataˈi e mania roa ˈtura. 40 Parau atura oia ia ratou: “Eaha outou e mǎtaˈu* roa ˈi? Aita â to outou e faaroo?” 41 E mǎtaˈu rahi hoi to ratou, a na ô ai te tahi i te tahi: “O vai hoi teie taata? E faaroo atoa te mataˈi e te miti ia ˈna.”+