Zekaria
12 Te tahi poroi:
“Teie te parau a Iehova no nia ia Iseraela,” te na reira mai ra Iehova,
Tei hohora i te raˈi,+
Tei haamau i te niu o te fenua,+
E tei hamani i te varua* i roto i te taata.
2 E faariro vau ia Ierusalema ei auˈa e peretete ai te mau nunaa atoa ati aˈe. E haaatihia Iuda e o Ierusalema atoa.+ 3 I tera mahana, e faariro vau ia Ierusalema ei ofai teiaha no te mau nunaa atoa. E pepe roa ino te taata atoa o te tamata i te amo ia ˈna.+ E e haaputuputu te mau nunaa atoa o te fenua nei no te aro ia ˈna.+ 4 I tera mahana,” te na reira mai ra Iehova, “e faariaria vau i te mau puaahorofenua atoa e e tairi au i to ratou feia faahoro i te maamaa. Ei nia noa to ˈu mata i te nunaa o Iuda, e haapo râ vau i te mata o te mau puaahorofenua atoa a te mau nunaa. 5 E parau te mau raatira o Iuda i roto i to ratou aau: ‘E puai te feia no Ierusalema no matou, o Iehova o te mau nuu* hoi to ratou Atua.’+ 6 I tera mahana, e faariro vau i te mau raatira o Iuda mai te hoê farii auahi i ropu i te hoê apǎpǎraa raau e mai te hoê mori auahi i ropu i te hoê anairaa amaa huero maa tâpûhia,+ e e pau ia ratou te mau nunaa atoa ati aˈe, i te pae atau e te pae aui.+ E e parahi faahou te feia no Ierusalema i roto i to ratou oire,* i Ierusalema.+
7 “E paruru na mua Iehova i te mau fare ie o Iuda ia ore te nehenehe* o te huaai* o Davida e te nehenehe* o te feia no Ierusalema ia hau aˈe i to Iuda. 8 I tera mahana, e riro Iehova ei paruru ati aˈe i te feia no Ierusalema.+ I tera mahana, e riro tei turori* i rotopu ia ratou mai ia Davida, e e aratai te huaai o Davida ia ratou mai te Atua, mai te melahi a Iehova.+ 9 I tera mahana, e haamou iho â vau i te mau nunaa atoa o te haere mai e aro ia Ierusalema.+
10 “E ninii au i te varua o te farii maitai e te taparuparu i nia i te huaai o Davida e te feia no Ierusalema. E hiˈo ratou i tei patiahia e ratou,+ e e auê ratou no ˈna mai te mea ra e te auê ra ratou no te hoê tamaiti otahi. E oto roa ino ratou ia ˈna mai te mea ra e te oto ra ratou i te hoê tamaiti matahiapo. 11 I tera mahana, e rahi te auê i Ierusalema, mai te auê i Hadadarimona i te peho o Megido.+ 12 E auê teie fenua, te opu fetii tataitahi: te opu fetii o Davida i te tahi pae e ta ratou mau vahine i te tahi atu pae, te opu fetii o Natana+ i te tahi pae e ta ratou mau vahine i te tahi atu pae, 13 te opu fetii o Levi+ i te tahi pae e ta ratou mau vahine i te tahi atu pae, te opu fetii o te ati Simei+ i te tahi pae e ta ratou mau vahine i te tahi atu pae, 14 e te mau opu fetii atoa o te toe mai, te opu fetii tataitahi i te tahi pae e ta ratou mau vahine i te tahi atu pae.