Zekaria

Na Iehova e hamani i te mau ata vero,

Na ˈna e faatopa i te ûa no te taata,+

E na ˈna e horoa na te taata atoa i te hotu o te mau faaapu.

 2 E haavare hoi ta te mau tii o te mau atua o te utuafare* i parau.

E orama haavare ta te feia hiˈohiˈo i ite.

Te faatia ra ratou i te moemoeâ faufaa ore,

E te tamata ra ratou i te tamahanahana i te taata, aita râ hoê e mahanahana ra.

 3 Te ura nei to ˈu riri i te mau tiai mamoe,

E e tahoo vau i te mau aratai haavî.*

Te haapao ra hoi Iehova o te mau nuu* i ta ˈna nǎnǎ,+ i te nunaa o Iuda,

Ua faariro oia ia ratou mai ta ˈna puaahorofenua hanahana i roto i te tamaˈi.

 4 No ǒ mai ia ˈna te raatira,*

No ǒ mai ia ˈna te faatere o te paturu ia ˈna,*

No ǒ mai ia ˈna te fana tamaˈi.

No ǒ mai ia ˈna e haere mai ai te mau tiaau* atoa, ratou paatoa.

 5 E riro ratou mai te feia tamaˈi

O te taataahi ra i te vari o te mau aroâ i roto i te tamaˈi.

E aro ratou, tei ia ratou ra hoi Iehova.+

E e faahaamahia te feia faahoro puaahorofenua.+

 6 E haapuai au i te nunaa o Iuda,

E e faaora vau i te huaai o Iosepha.+

E faahoˈi mai au ia ratou,

E aroha hamani maitai hoi au ia ratou.+

E e riro ratou mai te mea e aita vau i faarue aˈenei ia ratou.+

O vau hoi o Iehova to ratou Atua e e pahono vau ia ratou.

 7 E riro to Epheraima mai te hoê aito puai,

E e oaoa to ratou aau mai te mea ra e ua inu ratou i te uaina.+

E ite ta ratou mau tamaiti i te reira e e oaoa ratou.

E oaoa to ratou aau ia Iehova.+

 8 ‘E hio vau ia ratou e e haaputuputu vau ia ratou,

E hoo mai hoi au ia ratou,+ e e haere ratou i te rahiraa,

A vai noa ˈtu ai mai tera i te rahi.

 9 Noa ˈtu e haapurara vau ia ratou mai te huero maa i rotopu i te mau nunaa,

E haamanaˈo ratou ia ˈu i te mau tuhaa fenua atea.

E oraora roa mai ratou e ta ratou mau tamaiti e e hoˈi mai ratou.

10 E faahoˈi mai au ia ratou mai Aiphiti mai,

E haaputuputu vau ia ratou mai Asura mai.+

E aratai au ia ratou i te tuhaa fenua o Gileada+ e i Lebanona,

E e iti roa te fenua no ratou.+

11 E haere au na roto i te miti ma te faaarepurepu ia ˈna,

E i roto i te miti, e tairi au i te mau are.+

E mǎrô te hohonuraa o Nile.

E tuuhia te teoteo o Asura i raro,

E e tae te faatereraa a Aiphiti i to ˈna hopea.+

12 E puaihia ratou maoti Iehova,+

E e haere ratou ma to ˈna iˈoa,’+ te na reira mai ra Iehova.”