Ezekiela
28 Tae faahou maira te parau a Iehova ia ˈu, a na ô ai: 2 “Tamaiti a te taata, a parau i te raatira o Turia: ‘Teie ta te Arii hau ê e Fatu ra o Iehova e parau ra:
“No te mea ua teoteohia to oe aau,+ te parau noa ra oe: ‘E atua vau.
Te parahi nei au i nia i te terono o te hoê atua i ropu i te moana.’+
E taata noa râ oe, e ere i te atua,
Noa ˈtu i roto i to oe aau te manaˈo ra oe e atua oe.
3 Inaha, e feruriraa paari aˈe ïa to oe i to Daniela?+
Aita atoa ïa e parau huna i hunahia ia oe?
4 Ua faarahi oe i ta oe faufaa i to oe paari e to oe haroˈaroˈa,
E te haapue noa ra oe i te auro e te ario i roto i ta oe mau vairaa taoˈa.+
5 No to oe aravihi i te ohipa tapihoo i rahi ai ta oe faufaa,+
E teoteohia ˈtura to oe aau no ta oe faufaa.”’
6 “‘No reira, teie ta te Arii hau ê e Fatu ra o Iehova e parau ra:
“No te mea te manaˈo ra oe i roto i to oe aau e atua oe,
7 Te faatae atu nei au i te feia ěê no te aro ia oe, te mea taehae roa ˈˈe o te mau nunaa,+
E huti ratou i ta ratou mau ˈoˈe no te tairi i te nehenehe o to oe paari,
E e haaviivii ratou i te unauna o to oe hanahana.+
9 E parau noa anei oe: ‘E atua vau,’ i te taata e haapohe ia oe?
E taata noa oe, e ere i te atua, i te rima o te feia e haaviivii ia oe.”’
10 ‘I te rima o te feia ěê, e pohe oe i te pohe o te feia peritome-ore-hia,
O vau hoi tei paraparau,’ te parau ra te Arii hau ê e Fatu ra o Iehova.”
11 E tae faahou maira te parau a Iehova ia ˈu, a na ô ai: 12 “Tamaiti a te taata, a himene i te tahi himene oto no te arii o Turia, e a parau ia ˈna: ‘Teie ta te Arii hau ê e Fatu ra o Iehova e parau ra:
13 I vai na oe i Edene, te ô a te Atua.
I faaunaunahia na oe i te mau ofai maitai roa atoa,
Te adama, te phetade e te ieloma. Te tarisisa, te sema e te isephe. Te saphira, te nepheka+ e te semaradino.
E ua hamanihia to ratou mau tamauraa e tapearaa i te auro.
Ua faaineinehia te reira i te mahana i poietehia ˈi oe.
14 I faatoroa na vau ia oe mai te kerubi faatavaihia o te paruru.
I tia na oe i nia i te mouˈa moˈa o te Atua,+ e i haere na oe na rotopu i te mau ofai ura.
15 Aita e hapa i to oe mau haerea mai te mahana mai â i poietehia ˈi oe
E ite-roa-hia ˈtu ai te parau-tia ore i roto ia oe.+
E tiavaru ïa vau ia oe mai nia i te mouˈa o te Atua mai te tahi mea viivii e e haamou vau ia oe,+
E kerubi o te paruru, i te atea ê o te mau ofai ura.
17 Ua teoteohia to oe aau no to oe haviti.+
Ua faaino oe i to oe paari no te unauna o to oe iho hanahana.+
E taora vau ia oe i raro i te fenua.+
E faariro vau ia oe ei mataitairaa na te mau arii.
18 No te rahi o ta oe hapa e ta oe tapihooraa tano ore, ua haaviivii oe i to oe mau vahi moˈa.
E tahu vau i te tahi auahi i roto ia oe, e e pau oe i te reira.+
E faariro vau ia oe ei rehu i nia i te fenua i mua i te feia atoa e mataitai ra ia oe.
19 Pauroa tei matau ia oe i rotopu i te mau nunaa te hiˈo ia oe ma te maere.+
Mea tupu taue noa e te riaria to oe hopea,
E e mou oe e a muri noa ˈtu.”’”+
20 E tae faahou maira te parau a Iehova ia ˈu, a na ô ai: 21 “Tamaiti a te taata, a fariu i Sidona,+ e a tohu i te mau ati ta ˈna e faaruru. 22 E parau oe: ‘Teie ta te Arii hau ê e Fatu ra o Iehova e parau ra:
“Teie au e aro nei ia oe, e Sidona, e e faahanahanahia vau i ǒ oe.
E ite te taata o vau o Iehova ua faautua anaˈe au ia ˈna e ua haamoˈahia anaˈe au i ǒ ˈna.
23 E faatae au i te maˈi pee i ǒ ˈna e e tahe te toto i roto i to ˈna mau aroâ.
E topa te feia tei haapohehia i ǒ ˈna ua tae anaˈe atu te ˈoˈe na te mau vahi atoa no te tairi ia ˈna.
E e ite ratou o vau o Iehova.+
24 “‘“I reira te nunaa o Iseraela e ore faahou ai e haaatihia e te raau taratara mauiui,+ te feia o te vahavaha ia ratou. E e ite te taata o vau te Arii hau ê e Fatu ra o Iehova.”’
25 “‘Teie ta te Arii hau ê e Fatu ra o Iehova e parau ra: “Ia haaputuputu faahou vau i te nunaa o Iseraela mai rotopu mai i te mau nunaa i haapurarahia ˈi ratou,+ e haamoˈahia vau i rotopu ia ratou i mua i te mata o te mau nunaa.+ E e parahi ratou i to ratou fenua+ ta ˈu i horoa no ta ˈu tavini o Iakoba.+ 26 E parahi ratou i reira ma te taiâ ore,+ e patu ratou i te fare, e tanu ratou i te vine,+ e e parahi ratou ma te taiâ ore ua faautua anaˈe au i te feia atoa ati aˈe ia ratou o te vahavaha ia ratou.+ E e ite ratou o vau o Iehova to ratou Atua.”’”