Isaia
37 I te faarooraa iho â te arii Hezekia i te reira, hahae ihora oia i to ˈna ahu, tapoˈi ihora ia ˈna i te ahu oto e tomo atura i roto i te hiero* o Iehova.+ 2 Tono ihora oia ia Eliakima, o te tiaau ra i te aorai,* ia Sebena te papai parau e te mau matahiapo o te mau tahuˈa, ma te ahu oto, i te peropheta Isaia+ te tamaiti a Amoza. 3 Na ô atura ratou ia ˈna: “Teie ta Hezekia e parau ra: ‘E mahana teie no te ahoaho, no te faahapa,* e no te haama. Ua fatata hoi te mau tamarii i te fanauhia mai,* aita râ e puai no te fanau.+ 4 Peneiaˈe e faaroo Iehova to Atua i te mau parau a te Rabasake, ta te arii o Asura to ˈna fatu i tono no te faatihaehae i te Atua ora,+ e e faautua oia ia ˈna no te mau parau ta Iehova to Atua i faaroo. A pure+ ïa no te toea o tei ora mai.’”+
5 I muri aˈe i to te mau tavini a te arii Hezekia faaiteraa i te poroi ia Isaia,+ 6 na ô maira Isaia ia ratou: “Teie ta outou e parau i to outou fatu: ‘Teie ta Iehova e parau ra: “Eiaha e mǎtaˈu+ no te mau parau ta oe i faaroo, te mau parau i faaino ai te mau tavini a te arii o Asura+ ia ˈu. 7 E tuu vau i te hoê manaˈo i roto i to ˈna feruriraa.* E faaroo o ˈna i te hoê parau e e hoˈi o ˈna i to ˈna fenua.+ E e pohe o ˈna ia ˈu i te ˈoˈe i to ˈna iho fenua.”’”+
8 I muri aˈe i to te Rabasake faarooraa e ua faarue te arii o Asura ia Lakisa, hoˈi atura oia ia ˈna ra e ite ihora ia ˈna e aro ra ia Libena.+ 9 Faaroo ihora te arii i te parau o Tirahaka te arii o Etiopia: “Ua haere mai o ˈna e aro ia oe.” I to ˈna faarooraa i te reira, tono faahou ihora oia i te vea ia Hezekia ra+ no te parau atu: 10 “Teie ta outou e parau ia Hezekia te arii o Iuda: ‘Eiaha to Atua ta oe e tiaturi ra ia haavare ia oe a parau ai: “Eita Ierusalema e tuuhia i te rima o te arii o Asura.”+ 11 Inaha, ua faaroo oe eaha ta te mau arii o Asura i rave i te mau fenua atoa ma te haamou ia ratou.+ O oe anaˈe ïa te faaorahia? 12 Te mau nunaa ta to ˈu mau tupuna i haamou, ua faaora anei to ratou mau atua ia ratou?+ Teihea o Gozana, Harana,+ Rezepha, e te mau taata o Edene tei faaea i Teli-asara? 13 Teihea te arii o Hamata, te arii o Arapada, e te arii o te mau oire o Sepharavaima,+ o Henâ, e o Iva?’”
14 Rave maira Hezekia i te mau rata i te rima o te mau vea e taio ihora i te reira. Pauma ˈtura Hezekia i te hiero o Iehova e hohora ihora i te reira i mua ia Iehova.+ 15 Pure ihora Hezekia ia Iehova:+ 16 “E Iehova o te mau nuu,*+ te Atua o Iseraela, o te parahi ra i nia i te terono i nia ˈˈe* i te mau kerubi, o oe anaˈe te Atua mau o te mau faatereraa arii atoa o te fenua nei. Na oe i hamani i te raˈi e te fenua. 17 A fariu mai i to tariˈa, e Iehova, e a faaroo mai!+ Ia araara to mata, e Iehova, e ia ite oe!+ A faaroo mai i te mau parau atoa ta Senakeriba i faatae mai no te faatihaehae i te Atua ora.+ 18 E parau mau iho â, e Iehova, ua haamou te mau arii o Asura i te mau fenua atoa,+ oia atoa to ratou iho fenua. 19 E ua huri ratou i to ratou mau atua i roto i te auahi,+ no te mea e ere ratou i te atua, e ohipa râ a te rima taata,+ e raau e e ofai. No reira ratou i nehenehe ai e haamou i te reira. 20 I teie nei râ, e Iehova to matou Atua, a faaora mai ia matou i to ˈna rima, e ite ïa te mau faatereraa arii atoa o te fenua nei o oe anaˈe te Atua, e Iehova.”+
21 Faatae atura Isaia te tamaiti a Amoza i teie poroi ia Hezekia: “Teie ta Iehova te Atua o Iseraela e parau ra: ‘No te mea ua pure oe ia ˈu no nia ia Senakeriba te arii o Asura,+ 22 teie te parau ta Iehova i parau no ˈna:
“Te vahavaha ra te tamahine apî* o Ziona ia oe, te faaooo ra o ˈna ia oe.
Te tairiiri ra te tamahine o Ierusalema i to ˈna upoo ma te vahavaha ia oe.
23 O vai ta oe i faatihaehae+ e i faaino?
O vai ta oe i faateitei i to oe reo+
E ta oe i hiˈo atu ma to oe mata teoteo?
I Tei Moˈa o Iseraela!+
24 Na roto i ta oe mau tavini ua faatihaehae oe ia Iehova+ e ua parau oe:
‘I ta ˈu rahiraa pereoo tamaˈi
E pauma vau i nia i te mau vahi teitei o te mau mouˈa,+
Te mau vahi atea roa ˈˈe o Lebanona.
E tâpû vau i ta ˈna mau tumu arezi teitei, ta ˈna mau tumu berusi maitai roa.
E tomo vau i roto i to ˈna mau haapuraa teitei roa ˈˈe, to ˈna mau uru raau ruperupe roa ˈˈe.
25 E ô vau i te apoo pape a inu atu ai i te pape.
E haamǎrô vau i te mau taheraa pape* o Aiphiti i te tapuae o to ˈu avae.’
26 Aita anei oe i faaroo? Ua faaotihia* te reira mea maoro i teie nei.
Mai tahito mai â vau i faaineine ai* i te reira.+
I teie nei e faatupu vau i te reira.+
E faariro oe i te mau oire auahia i te patu ei pueraa huˈahuˈa.+
27 Eita to ratou mau taata e tauturuhia.
E mǎtaˈu ratou e e faahaamahia.
E riro ratou mai te raau tupu o te mau faaapu e te aihere,
Mai te aihere o te mau tapoˈi fare o te paapaa i te mataˈi no hitia o te râ.
28 Ua ite maitai râ vau ia parahi oe, ia haere oe i rapae, ia tomo oe i roto,+
E ia riri oe ia ˈu,+
29 No te mea ua tae roa to oe riri ia ˈu+ e ta oe uuru i to ˈu tariˈa.+
E tuu ïa vau i ta ˈu tarou i roto i to oe ihu e ta ˈu tavaha+ i ropu i to oe utu,
E e faahoˈi au ia oe na te eˈa i haere mai ai oe.”
30 “‘E teie te tapao no oe:* I teie matahiti, e amu outou i te huero maa o te tupu noa mai mai tera.* I te piti o te matahiti, e amu outou i te huero maa o te oteo noa mai mai tera. I te toru râ o te matahiti, e ueue e e ooti outou, e tanu outou i te vine a amu atu ai i to ˈna maa.+ 31 Te feia o te nunaa o Iuda o te ora mai, te feia o te toe mai,+ e toro to ratou aˈa i raro a faahotu mai ai i te maa i nia. 32 E haere hoi te tahi toea i rapae ia Ierusalema e tei ora mai mai te mouˈa Ziona ˈtu.+ Na te itoito rahi o Iehova o te mau nuu e rave i te reira.+
33 “‘No reira, teie ta Iehova e parau ra no nia i te arii o Asura:+
“Eita oia e tomo mai i teie oire,+
Eita oia e teˈa i ǒ nei,
Eita oia e aro ia ˈna e te paruru
E eita oia e hamani i te tahi eˈa paumaraa no te aro mai.”’+
34 ‘Na te eˈa i haere mai ai oia e hoˈi ai oia.
Eita oia e tomo mai i teie oire,’ te parau ra Iehova.
35 ‘E paruru vau i teie oire+ a faaora ˈtu ai i te reira no to ˈu iˈoa+
E no ta ˈu tavini ra o Davida.’”+
36 Haere maira te melahi a Iehova e tairi ihora 185 000 faehau i roto i te puhapa a to Asura. I te tiaraa mai te taata i te poipoi roa, ite aˈera ratou i te mau tino pohe atoa.+ 37 Reva ˈtura ïa Senakeriba te arii o Asura, hoˈi atura i Nineve+ e faaea ihora i reira.+ 38 A tipapa ˈi oia i roto i te hiero o to ˈna atua o Niseroka, tairi aˈera ta ˈna iho na tamaiti o Adarameleka raua Sarezera ia ˈna i te ˈoˈe+ e horo atura i te fenua o Ararata.+ E riro maira ta ˈna tamaiti o Esarahadona+ ei arii ei mono ia ˈna.