Salamo
Na te aratai o te feia himene, i nia “Eiaha e haamou.” Miketama* a Davida.
58 E nehenehe anei outou e paraparau no nia i te parau-tia a mamû noa ˈi?+
E nehenehe anei outou e haava ma te afaro, e te mau tamaiti a te taata nei?+
2 Te opua nei râ outou i te ohipa parau-tia ore i roto i to outou aau,+
E i to outou rima, te haavî ra outou i nia i teie nei fenua.+
3 Mea piˈo te feia ino mai to ratou fanauraahia* mai â.
Mea orure hau ratou, e feia haavare mai te taime mai â i fanauhia mai ai ratou.
4 E au to ratou taero i te taero o te ophi.+
E tariˈa turi to ratou mai to te asepi o te tapiri i to ˈna tariˈa.
5 Eita oia e faaroo i te reo o te feia faarata,
Noa ˈtu mea puai ta ratou faarataraa.
6 E te Atua e, a ofati i to ratou mau niho!
A ofati i te taa o taua mau liona ra, e Iehova!
7 Ia moˈe ratou mai te mau pape e pau ra.
Ia huti te Atua i ta ˈna fana a haapohe atu ai ia ratou i ta ˈna mau teˈa.
8 Ia riro ratou mai te hoê maˈoa fenua o te tahe a nee noa ˈi,
Mai te hoê tamarii fanau-pohe-hia o te ore roa e ite i te mahana.
9 Hou ta outou mau pani e mahanahana ˈi i te raau taratara,
E hopoi ê oia i te amaa apî e te amaa paapaa, mai te mea ra e na te mataˈi vero e hopoi ê i te reira.+
10 E oaoa te taata parau-tia no te mea ua ite oia i te tahooraa.+
E puru to ˈna avae i te toto o te feia ino.+
11 E parau te taata: “E haamaitairaa mau â ta te feia parau-tia.+
Te vai ra iho â te hoê Atua e haava ra i te fenua nei.”+