Esetera

9 I te 13 o te mahana i te 12 o te avaˈe, oia hoi te avaˈe o Adara,*+ ia tupu te parau a te arii e ta ˈna ture,+ i te mahana i manaˈo ai te mau enemi o te ati Iuda e haavî ia ratou, e ohipa ê roa tei tupu, o te ati Iuda tei upootia i nia i te feia e hae ra ia ratou.+ 2 Amui atura te ati Iuda i roto i to ratou mau oire i te mau fenua atoa o te arii Ahasueru+ no te aro i te feia e opua ra e rave ino ia ratou, e aita hoê aˈe taata i nehenehe e aro ia ratou, ua mǎtaˈu hoi te mau nunaa atoa ia ratou.+ 3 E pauroa te huiarii o te mau fenua, te tavana hau,+ te tavana, e te taata haapao i te mau ohipa a te arii, tei tauturu i te ati Iuda, no to ratou hoi mǎtaˈu ia Moredekai. 4 Ua riro hoi Moredekai ei taata mana+ i te aorai o te arii,* e ua atutu to ˈna roo na te mau fenua atoa, no te mea te rahi oioi noa ra to Moredekai mana.

5 Tairi aˈera te ati Iuda pauroa to ratou enemi i te ˈoˈe, a haapohe ai e a haamou ai ia ratou. Rave aˈera ratou mai ta ratou i hinaaro i te feia tei hae ia ratou.+ 6 Ua haapohe e ua haamou te ati Iuda e 500 tane i Susana*+ te pare.* 7 Ua haapohe atoa ratou ia Parasanadata, Dalaphona, Asaphata, 8 Porata, Adalia, Aridata, 9 Paramasata, Arisai, Aridai e Vaizata, 10 na ahuru tamaiti a Hamana te tamaiti a Hamedata, te enemi o te ati Iuda.+ I muri iho râ i to ratou haapoheraa ia ratou, aita ratou i haru i te tahi noa ˈˈe taoˈa.+

11 I taua mahana ra, faaitehia ˈtura i te arii te rahiraa taata tei pohe i Susana* te pare.*

12 Parau atura te arii ia Esetera te arii vahine: “I Susana* te pare,* ua haapohe e ua haamou te ati Iuda e 500 tane e na ahuru tamaiti a Hamana. Ua aha ratou i te toea o te mau fenua o te arii?+ Eaha ta oe e hinaaro ra i teie nei? E horoa ˈtu vau. E eaha ˈtu â ta oe aniraa? E horoa vau na oe.” 13 Pahono ihora Esetera: “Ia tia i te arii+ ia faatiahia te ati Iuda i Susana* ia rave ananahi atoa ia au i te ture no teie mahana,+ e ia tarîhia na ahuru tamaiti a Hamana i nia i te pou.”+ 14 Faaue atura ïa te arii ia na reirahia. Horoahia ihora hoê ture i Susana* ia tarîhia na ahuru tamaiti a Hamana.

15 Amui faahou atura te ati Iuda i Susana* i te 14 o te mahana o te avaˈe o Adara+ e haapohe aˈera e 300 tane i Susana,* aita râ ratou i haru i te tahi noa ˈˈe taoˈa.

16 Amui atoa ˈtura te toea o te ati Iuda i te mau fenua o te arii e paruru aˈera i to ratou ora.+ Haamou aˈera ratou i to ratou mau enemi,+ a haapohe ai e 75 000 o te feia tei hae ia ratou. Aita râ ratou i haru i te tahi noa ˈˈe taoˈa. 17 Ua tupu te reira i te 13 o te mahana o te avaˈe o Adara. Faafaaea aˈera ratou i te 14 o te mahana e faariro ihora i te reira ei mahana arearearaa e oaoaraa.

18 Area te ati Iuda i Susana,* amui aˈera ïa ratou i te 13 o te mahana+ e i te 14 o te mahana.+ Faafaaea aˈera ratou i te 15 o te mahana e faariro ihora i te reira ei mahana arearearaa e oaoaraa. 19 No reira te ati Iuda o te mataeinaa e faaea ra i te tahi atu mau oire i faariro ai i te 14 o te mahana o te avaˈe o Adara ei mahana oaoaraa e arearearaa, ei mahana oroa,+ e ei taime no te pûpû i te maa na te tahi e te tahi.+

20 Papai atura Moredekai+ i taua mau tupuraa ra e hapono atura i te mau rata haamanahia i te ati Iuda atoa i te mau fenua atoa o te arii Ahasueru, mea fatata e mea atea. 21 Faaue atura oia ia ratou ia faatupu pauroa te matahiti i te tahi oroa i te 14 e te 15 atoa o te mahana o te avaˈe o Adara, 22 i taua na mahana ra hoi i tiamâ mai ai te ati Iuda i to ratou mau enemi e i taua avaˈe ra i taui ai to ratou oto ei oaoa e to ratou autâ+ ei mahana oroa. I taua na mahana ra e faatupu ai ratou i te tamaaraa e te arearearaa, e e pûpû ai i te maa na te tahi e te tahi e te ô na te taata riirii.

23 Farii atura te ati Iuda e haapao noa i te oroa ta ratou i faatupu e e rave i ta Moredekai i papai ia ratou. 24 Ua opua hoi Hamana+ te tamaiti a Hamedata te ati Agaga+ te enemi o te ati Iuda atoa, e haamou i te ati Iuda,+ e ua tuu oia i te Pura,+ oia hoi te Kelero, ia tupu te tahi rapuraa i rotopu ia ratou e no te haamou ia ratou. 25 I to Esetera râ haereraa i mua i te arii, parau atura oia ia papaihia+ teie faaueraa: “Ia hoˈi i nia i to ˈna iho upoo ta ˈna opuaraa ino e aro i te ati Iuda.”+ E tarîhia ihora Hamana e ta ˈna mau tamaiti i nia i te pou.+ 26 Tera te tumu i parau ai ratou i taua mau mahana ra Purima,* na nia i te iˈoa o te Pura.+ No reira, no te mau mea atoa tei papaihia i roto i teie rata e te mau mea ta ratou i ite no nia i teie ohipa e no te mau mea ta ratou i faaruru, 27 faaoti aˈera te ati Iuda no ratou e to ratou huaai e te feia atoa e apiti ia ratou+ e haapao iho â i teie e piti mahana e e rave i tei papaihia no te reira i te taime faataahia pauroa te matahiti. 28 Ia haamanaˈo e ia haapao pauroa te utuafare, pauroa te fenua e pauroa te oire i taua mau mahana ra i te mau uˈi atoa. E eiaha taua mau mahana ra o te Purima ia faaea i te haamanaˈohia i rotopu i te ati Iuda, e eiaha ia hope te haamanaˈoraa o te reira i rotopu i to ratou huaai.

29 Papai atura Esetera te arii vahine, te tamahine a Abihaila, raua Moredekai te ati Iuda i te piti o te rata no nia i te Purima ma to raua mana atoa no te haapapu i te reira. 30 Haponohia ˈtura te mau rata haamanahia i te ati Iuda atoa i na 127 fenua,+ te faatereraa arii a Ahasueru,+ ma te mau parau hau e te parau mau 31 no te haapapu i te haapaoraa o te mau mahana o te Purima i te taime faataahia mai tei faauehia e Moredekai te ati Iuda raua Esetera te arii vahine ia rave+ e mai ta ratou i faaoti no ratou e to ratou huaai e haapao,+ oia atoa te haapaeraa maa+ e te taparuparuraa.+ 32 E haapapu atura te faaueraa a Esetera i teie mau titauraa no nia i te Purima,+ e tapaohia ˈtura te reira i roto i te hoê buka.