Esetera

5 I te toru o te mahana,+ oomo ihora Esetera i to ˈna ahu arii e tia aˈera i te aua i roto mai o te aorai* o te arii, i te tahi atu pae o te aorai o te arii, a parahi ai te arii i nia i to ˈna terono* i te tahi atu pae o te tomoraa. 2 I te iteraa iho â te arii i te arii vahine Esetera e tia ra i roto i te aua, farii maitai ihora oia ia ˈna, e toro maira i te sepeta auro+ i roto i to ˈna rima ia Esetera. Tapiri atura Esetera e tapea ˈtura i te muaraa o te sepeta.

3 Ui maira te arii ia ˈna: “Eaha teie, arii vahine Esetera? Eaha ta oe aniraa? Tae roa i te afaraa o ta ˈu faatereraa arii, e horoa vau na oe!” 4 Pahono atura Esetera: “Ia tia i te arii, ia haere mai te arii raua Hamana+ i teie mahana i te tamaaraa ta ˈu i faaineine no ˈna.” 5 Parau ihora ïa te arii i to ˈna mau taata: “A parau ia Hamana ia haere oioi mai, mai ta Esetera e ani ra.” Haere aˈera ïa te arii raua Hamana i te tamaaraa ta Esetera i faaineine.

6 A inu ai ratou i te uaina, parau maira te arii ia Esetera: “Eaha ta oe e hinaaro ra? E horoa ˈtu vau! E eaha ta oe aniraa? Tae roa i te afaraa o ta ˈu faatereraa arii, e horoa vau na oe!”+ 7 Pahono atura Esetera: “Teie ta ˈu e hinaaro ra e ta ˈu aniraa: 8 ia farii-maitai-hia vau e te arii e ia tia i te arii ia horoa i ta ˈu e hinaaro ra e ia rave mai ta ˈu e ani, ia haere mai ïa te arii e Hamana i te tamaaraa ta ˈu e faatupu no raua ananahi. E ananahi au e faaite ai i ta ˈu e hinaaro i te arii.”

9 I taua mahana ra, reva ˈtura Hamana ma te oaoa. I to Hamana râ hiˈoraa ia Moredekai i te uputa o te aorai o te arii e to ˈna iteraa e aita oia i tia e i rûrû i mua i to ˈna aro, riri roa ihora Hamana ia Moredekai.+ 10 Tera râ, haavî ihora Hamana ia ˈna e hoˈi atura i to ˈna fare. Faaue atura oia e tii i to ˈna mau hoa e ia Zeresa+ ta ˈna vahine faaipoipo. 11 Faatietie ihora Hamana ia ˈna no te rahi o ta ˈna faufaa, no ta ˈna tamaiti e rave rahi,+ e mea nafea to te arii faateiteiraa ia ˈna e tuuraa ia ˈna i nia ˈˈe i te huiarii e te mau tavini a te arii.+

12 Na ô faahou ihora Hamana: “E ere tera anaˈe, aita ˈtu â taata ta te arii vahine Esetera i titau manihini o vau anaˈe râ no te apee i te arii i te tamaaraa ta ˈna i faaineine.+ Ua titau-manihini-atoa-hia vau ananahi ia tamaa e raua te arii.+ 13 Eita râ vau e mauruuru i teie mau mea atoa ia ite noa vau ia Moredekai te ati Iuda e parahi ra i te uputa o te aorai o te arii.” 14 Parau aˈera ïa Zeresa ta ˈna vahine faaipoipo e pauroa to ˈna hoa ia ˈna: “A faaue ia faatiahia hoê pou, e 50 kubiti* te teitei. E i te poipoi, a parau i te arii ia tarîhia Moredekai i nia iho.+ I muri iho, a haere na muri i te arii e a oaoa i te tamaaraa.” Au ihora Hamana i teie manaˈo, faaue atura ïa ia faatiahia te pou.