Ezera

7 I muri aˈe, a faatere ai te arii Aretehasaseta+ no Peresia, hoˈi atura Ezera.*+ E tamaiti oia na Seraia,+ te tamaiti a Azaria, te tamaiti a Hilikia,+ 2 te tamaiti a Saluma, te tamaiti a Zadoka, te tamaiti a Ahituba, 3 te tamaiti a Amaria, te tamaiti a Azaria,+ te tamaiti a Meraiota, 4 te tamaiti a Zerahia, te tamaiti a Uzi, te tamaiti a Buki, 5 te tamaiti a Abisua, te tamaiti a Phinehasa,+ te tamaiti a Eleazara,+ te tamaiti a Aarona+ te tahuˈa tiaau. 6 Ua pauma Ezera mai Babulonia mai. E papai parau oia tei ite maitai i* te Ture a Mose,+ ta Iehova te Atua o Iseraela i horoa. Ua horoa te arii pauroa ta ˈna i ani, tei ia ˈna ra hoi Iehova to ˈna Atua.

7 Pauma aˈera vetahi o te ati Iseraela, te tahuˈa, te ati Levi,+ te feia himene,+ te feia tiai uputa+ e te tavini o te hiero*+ i Ierusalema i te hitu o te matahiti faatereraa a te arii Aretehasaseta. 8 Tae maira Ezera i Ierusalema i te pae o te avaˈe, i te hitu o te matahiti faatereraa a te arii. 9 I te mahana matamua o te avaˈe matamua, haamata ihora oia i to ˈna tere mai Babulonia mai, e tae atura oia i Ierusalema i te mahana matamua o te pae o te avaˈe, tei ia ˈna ra hoi to ˈna Atua hamani maitai.+ 10 Ua faaineine Ezera* i to ˈna aau no te maimi i roto i te Ture a Iehova e no te faaohipa i te reira,+ e no te haapii atu i te mau faaueraa e haavaraa o te Ture i Iseraela.+

11 Teie te rata ta te arii Aretehasaseta i horoa ia Ezera te tahuˈa e papai parau, mea aravihi i roto i te haapiiraa i te mau ture a Iehova e ta ˈna mau faaueraa ia Iseraela:

12 * “Aretehasaseta,+ te arii o te mau arii, ia Ezera te tahuˈa, te papai parau o te Ture a te Atua o te raˈi: Ei ia oe na te hau tia roa. E teie nei, 13 ua horoa vau i teie faaueraa: te taata atoa, i te fenua ta ˈu e faatere ra, no te nunaa o Iseraela e to ratou mau tahuˈa e ati Levi o te hinaaro ra e haere na muri ia oe i Ierusalema, ia haere ratou.+ 14 Te tonohia nei oe e te arii e to ˈna e hitu taata aˈo no te titorotoro e te haapaohia ra anei te Ture a to Atua ia oe ra* i Iuda e i Ierusalema. 15 E hopoi atu oe i te ario e te auro ta te arii e to ˈna mau taata aˈo i horoa ma te aau tae na te Atua o Iseraela, to Ierusalema te fare, 16 e pauroa te ario e te auro te noaa ia oe* na te fenua taatoa o Babulonia, e te ô ta te nunaa e te mau tahuˈa e horoa ma te aau tae no te fare o to ratou Atua, tei Ierusalema.+ 17 E i teie mau ô,* e hoo oioi mai oe i te puaatoro oni,+ te mamoe oni,+ te fanauˈa mamoe,+ oia atoa te huero maa+ e te uaina+ e pûpûhia e tera mau tusia animara, e e hopoi oe i te reira i nia iho i te fata o te fare o to outou Atua i Ierusalema.

18 “E i te toea o te ario e te auro, e nehenehe outou e rave i te mea atoa e au ia oe e to mau taeae, ia au i te hinaaro o to outou Atua. 19 E pauroa te farii te horoahia ia oe no te taviniraa i te fare o to Atua, e hopoi ïa oe i mua i te Atua i Ierusalema.+ 20 E te toea o te mau mea hinaarohia no te fare o to Atua te titauhia ia oe ia horoa, e aufau ïa oe i te reira i te moni no roto i te pueraa taoˈa a te arii.+

21 “Na ˈu, te arii Aretehasaseta, i horoa i teie faaueraa i te mau taata haapao faufaa atoa i te tuhaa fenua o tera ˈtu pae o te Anavai:* ia rave-oioi-hia te mau mea atoa ta Ezera+ te tahuˈa, te papai parau o te Ture a te Atua o te raˈi, e ani ia outou, 22 tae atu 100 taleni* ario, 100 kora* sitona, 100 bato* uaina,+ 100 bato hinu,+ e te rahiraa miti papaa+ hinaarohia. 23 Ia ravehia ma te itoito rahi te mau mea atoa faauehia e te Atua o te raˈi no te fare o te Atua o te raˈi,+ ia ore to ˈna riri rahi tahoo ia tupu i nia i te fenua faaterehia e te arii e i nia i ta ˈna mau tamaiti.+ 24 Hau atu â, te faaitehia ˈtu nei outou eita e faatiahia ia titau i te tahi tute, ô titauhia+ aore ra tute ratere i te tahi tahuˈa e ati Levi, taata faataˈi upaupa,+ tiai opani, tavini o te hiero*+ e te rave ohipa o tera fare o te Atua.

25 “E oe Ezera, ia au i tera paari to oe no ǒ mai i to Atua,* a faatoroa i te tia mana e te haava no te haava i te nunaa taatoa i te tuhaa fenua o tera ˈtu pae o te Anavai, te feia atoa mea ite i te mau ture a to Atua, e ia haapii oe i te taata atoa aita i ite i te reira.+ 26 E te taata atoa o te ore e haapao i te Ture a to Atua e te ture a te arii, ia faautua-oioi-hia ïa i te pohe anei, te tiahiraa mai to ˈna fenua, te utua moni aore ra te tapearaa.”

27 Ia aruehia Iehova te Atua o to tatou mau tupuna, tei tuu i te manaˈo i roto i te aau o te arii e faanehenehe i te fare o Iehova i Ierusalema!+ 28 E ua faaite oia ia ˈu i te here taiva ore i mua i te arii+ e to ˈna mau taata aˈo+ e pauroa te huiarii puai o te arii. Faaitoito ihora ïa vau no te mea tei ia ˈu ra Iehova to ˈu Atua, e haaputuputu ihora vau i te mau tane aratai* o Iseraela no te pauma na muri ia ˈu.