Paraleipomeno buka matamua

5 Teie te mau tamaiti a Reubena,+ ta Iseraela matahiapo. O ˈna te matahiapo, no te mea râ ua haaviivii oia i te roˈi o to ˈna metua tane,+ horoahia ˈtura to ˈna tiaraa ei matahiapo i na tamaiti a Iosepha+ te tamaiti a Iseraela, aita ïa oia i tapaohia i roto i te pǎpǎraa tupuna no te tiaraa matahiapo. 2 Noa ˈtu ua hau aˈe Iuda+ i to ˈna mau taeae e no roto mai te aratai ia ˈna,+ tei ia Iosepha te tiaraa ei matahiapo. 3 Na tamaiti a Reubena te matahiapo a Iseraela, o Hanoka, Palu, Hezerona e Karemi.+ 4 Na tamaiti a Ioela, o Semaia ta ˈna tamaiti, o Goga ta ˈna tamaiti, o Simei ta ˈna tamaiti, 5 o Mika ta ˈna tamaiti, o Reaia ta ˈna tamaiti, o Baala ta ˈna tamaiti, 6 e o Beeraha ta ˈna tamaiti. Ua hopoi ê Tilegata-pilenesera+ te arii o Asura ia Beeraha, e raatira no te ati Reubena. 7 To ˈna mau taeae ia au i to ratou mau utuafare i roto i te tapaoraa o te pǎpǎraa tupuna ia au i to ratou mau huaai, o Ieiela te upoo e o Zekaria, 8 e Bela te tamaiti a Azaza te tamaiti a Sêma te tamaiti a Ioela. Ua ora te utuafare o Bela mai te tuhaa fenua i Aroera+ e tae atu i Nebo e Baala-meona.+ 9 I te pae hitia o te râ ratou i te faaearaa e tae roa ˈtu i te otia o te medebara i te anavai Eupharate,+ ua rahi roa hoi ta ratou mau animara i te fenua o Gileada.+ 10 I te tau o Saula, ua aro ratou i te ati Hagiri e ua upootia. Mea na reira ratou i te parahiraa i roto i to ratou mau fare ie na te tuhaa fenua taatoa i te pae hitia o te râ o Gileada.

11 Ua parahi te huaai o Gada i pihai iho ia ratou i te fenua o Basana e tae roa ˈtu i Saleka.+ 12 I Basana, o Ioela te upoo, o Saphama te piti, e to reira atoa Ianai e Saphata. 13 E to ratou mau taeae no to ratou mau opu fetii, o Mihaela, Mesulama, Seba, Iorai, Iakana, Zia e Ebera, e hitu ratou. 14 Na tamaiti tera a Abihaila te tamaiti a Huri te tamaiti a Iaroa te tamaiti a Gileada te tamaiti a Mihaela te tamaiti a Iesisai te tamaiti a Iado te tamaiti a Buza. 15 E upoo Ahi te tamaiti a Abadiela te tamaiti a Guni no to ratou opu fetii. 16 I ora na ratou i Gileada,+ i Basana+ e to ˈna mau oire ati aˈe, e i te mau vahi aihere atoa o Sarona e tae roa ˈtu i to ratou mau otia. 17 Ua tapaohia ratou paatoa i roto i te pǎpǎraa tupuna i te tau o Iotama+ te arii o Iuda e i te tau o Ieroboama*+ te arii o Iseraela.

18 To te ati Reubena, te ati Gada e te afaraa o te opu o Manase, e 44 760 aito puai to roto i ta ratou nuu, o tei rave i te paruru e te ˈoˈe e o tei rave* i te fana, e mea faaineinehia ratou no te tamaˈi. 19 Ua aro ratou i te ati Hagiri,+ ia Ietura, Naphisa+ e Nodaba. 20 Ua tauturu te Atua ia ratou i ta ratou mau aroraa, e ua upootia i nia i te ati Hagiri e te feia atoa o tei na muri ia ratou. Ua ani ratou i ta te Atua tauturu i tera tamaˈi, e ua faaroo oia i ta ratou aniraa no te mea ua tiaturi ratou ia ˈna.+ 21 Ua haru mai ratou i ta ratou mau animara: 50 000 kamela, 250 000 mamoe e 2 000 asini. Oia atoa 100 000 taata. 22 Mea rahi te enemi i haapohehia, na te Atua mau hoi i aro no ratou.+ Ora noa ˈtura ratou i reira ei mono ia ratou e tae roa ˈtu i te taime o te hopoi-ê-raa.+

23 I ora na te huaai o te afaraa o te opu o Manase+ i te fenua mai Basana e tae roa ˈtu i Baala-heremona e Senira e te mouˈa Heremona.+ Mea rahi roa ratou. 24 Teie te mau upoo o to ratou mau opu fetii: Ephera, Isi, Eliela, Azeriela, Ieremia, Hodavia e Iadiela. E aito puai ratou, e feia tuiroo, e e upoo ratou no to ratou mau opu fetii. 25 Ua taiva râ ratou i te Atua o to ratou mau tupuna e ua taiata ratou i te mau atua o te mau nunaa o taua fenua ra,+ nunaa ta te Atua i haamou i mua ia ratou. 26 Turai ihora ïa te Atua o Iseraela ia* Pula te arii o Asura+ (oia hoi Tilegata-pilenesera+ te arii o Asura) ia hopoi ê i te ati Reubena, te ati Gada, e te afaraa o te opu o Manase e hopoi ihora oia ia ratou i Hala, Habora, Hara e i te anavai Gozana.+ Te ora noa ra ratou i reira i teie mahana.