Samueri Wokutanga
19 Nokuhamba ke nguwa, Sauri wakabvunza mwana wake Djonatani uye aseenzi ake ese ngezve urongwa wake we kuda kuuraya Dhavhidhi. 2 Sezvo Djonatani mwana wa Sauri waida maningi Dhavhidhi, Djonatani wakamubvunza kuti: “Baba angu Sauri ari kuda kuti iwewe uuraiwe. Ngwarira mangwana comacibesi; enda ku mbuto yakaigika uye findara ikona. 3 Ndicaenda na baba angu ku munda dhuze no paunonga uri. Ndicabhuya na baba angu nge zvako, uye kana ndikaziya ciro cipi haco, ndicakubvunza.”
4 Hino Djonatani wakareketa zvakanaka ngezva Dhavhidhi kuna Sauri baba ake. Iyena wakati: “Mambo amudikani kushaishira Dhavhidhi museenzi wenyu, ngokuti iyena aazi kumushaishirai. Pane kudaro, iyena wakamuitirai zvakanaka maningi. 5 Iyena wakakanda upenyu wake pa ngozi* kuti auraye Mufiristiya, zvekuti Djehovha akaita kuti Aisraeri awine* nge mushobo unoshamisa. Imwimwi makazviona, uye makapfara maningi. Hino, ngei mungashaishira ngazi isina ndaa nge kuita kuti Dhavhidhi auraiwe pasina cikonzero?” 6 Sauri wakapurutana Djonatani, uye wakati: “Ndinopika na Djehovha mupenyu, kuti iyena aazouraiwi.” 7 Mumasure mazvo, Djonatani wakadainza Dhavhidhi uye wakamupanganidzira zviro zvese izvi. Hino Djonatani wakatora Dhavhidhi oenda naye kuna Sauri, uye Dhavhidhi wakahwirirazve kuseenzera Sauri hingana zvaaiita kare.
8 Nokuhamba ke nguwa, kakaitikazve hondo imweni. Dhavhidhi wakaendawo ku hondo koorhwisana no Afiristiya, uye wakauraya Afiristiya akawanda; uye Afiristiya akatiza pamberi pake.
9 Uye mwiya wakashata waibva kuna Djehovha wakapinda muna Sauri. Iyena wainga akagara pa nyumba no mupasha mu nyara, pa nguwa yekuti Dhavhidhi wairidza rudimbwa. 10 Sauri wakaedza kubaira Dhavhidhi pa paredhi no mupasha, asi iyena wakanzvenga, zvekuti mupashewo wakabaya paredhiyo. Pa usiku uwona, Dhavhidhi wakatiza. 11 Mumasure mazvo, Sauri wakatuma anarume ku nyumba ya Dhavhidhi kuti arinde nyumba yake uye kuti amuuraye comacibesi, asi Mikari mukadzi wa Dhavhidhi, wakamubvunza kuti: “Kana ukatama kutiza* usiku uno, mangwana ucauraiwa.” 12 Nokukasika, Mikari wakabetsera Dhavhidhi kucita ngo pa janera kuti atize. 13 Mikari wakatora cidhori ce pa nyumba* uye wakacikanda pa kama, uye pa mbuto yaitsanzika Dhavhidhi musoro wake iyena wakakanda maricera e ukuse we mbudzi, uye wakafukidza cidhorico no macira.
14 Sauri wakatuma anhu kuti aende kootora Dhavhidhi, asi Mikari wakati: “Iyena ari kurhwara.” 15 Asi Sauri wakatuma anhu kuti ahwirirezve koona Dhavhidhi uye wakaabvunza kuti: “Muunzisei ari pa kama kuti auraiwe.” 16 Anarume ainga atumwa paakapinda, akaona pa kama pano cidhori ce pa nyumba* uye paitsamirhwa na Dhavhidhi painga pano maricera e ukuse we mbudzi. 17 Ngokudaro, Sauri wakabvunzisa Mikari kuti: “Ngei iwewe wandicengedza kudaro uye wabetsera muzondi wangu kupukunyuka?” Mikari wakadaira kuti: “Iyena wandibvunza kuti, kana ndikatama kumubetsera pa kutiza, waizondiuraya!’”
18 Pa nguwa iyona, Dhavhidhi wainga atiza uye wakasongana na Samueri ku Ramaa. Iyena wakamupanganidzira zvese zvaainga aizirhwa na Sauri. Hino iyena na Samueri akaenda ku Naioti, uye akagara ikona. 19 Nokuhamba ke nguwa, Sauri wakabvunzwa kuti: “Dhavhidhi ari ku Naioti, ku Ramaa.” 20 Sauri wakatuma nokukasika atumwa ake kuti aende koobata Dhavhidhi. Awona paakaona aphorofita akuru eciphorofita uye Samueri eciatungamirira, mwiya wa Mwari wakauya pa atumwa a Sauri, uye awona akatangawo kuita hinga aphorofita.
21 Sauri paakazviziya, wakatuma nokukasika atumwa amweni, asi awona akatangawo kuita hinga aphorofita. Hino Sauri wakatuma cikwata cocitatu ce atumwa, uye awona akatangawo kuita hinga aphorofita. 22 Pakupedzesera, wakazoenda iyena kamare ku Ramaa. Paakaguma ku cimbo cikuru ku Seku, iyena wakabvunzisa kuti: “Samueri na Dhavhidhi ari kupi?” Anhu akamudaira kuti: “Ari iyo ku Naioti, ku Ramaa.” 23 Sauri paainga ecibva ipona kuenda ku Naioti, ku Ramaa, mwiya wa Mwari wakauya paari, uye iyena wakarumbwa ecihamba uye eciita hinga muphorofita dakara aguma ku Naioti ku Ramaa. 24 Uye iyena wakakhumura macira uye wakatanga kuita hingana muphorofita pamberi pa Samueri, uye wakarumbwa akawata asikazi kupfeka* ke zuwa rese uye ke usiku wese. Ndiyo ndaa zvecizwi: “Kodi Sauri ndi umwe we aphorofita here?”