Nea Eye Sen Biara a Yɛde Bɛma Yehowa
1 Yehowa kae wɔ mmara a ɔde maa Israelfo no mu sɛ ɛsɛ sɛ mmoa a wɔde wɔn bɛbɔ afɔre no ‘di mũ.’ Ná aboa a wadi dɛm rensɔ ani. (Lev. 22:18-20; Mal. 1:6-9) Bio nso, sɛ wɔbɔ afɔre a, na srade no nyinaa—aboa no fã a ɛyɛ akɔnnɔ no—yɛ Yehowa de. (Lev. 3:14-16) Esiane sɛ Yehowa yɛ Israelfo Agya ne wɔn Wura nti, na ɛfata sɛ wɔde nea eye sen biara ma no.
2 Nyankopɔn ani kũ adepa a ɛnnɛ yɛde ma no no ho sɛnea na ɛte wɔ tete mmere mu no. Ɛsɛ sɛ ɔsom a yɛde ma Yehowa no da no adi sɛ yɛwɔ obu kɛse ma no. Nokwarem no, ɛsono obiara ne ne tebea. Nanso yɛwɔ nea nti a ɛsɛ sɛ yɛhwehwɛ yɛn ho mu hu sɛ yɛde nea eye sen biara rema no.—Efe. 5:10.
3 Ɔsom a Efi Komam: Nea ɛbɛyɛ na yɛn som adwuma no asɔ Yehowa ani na aka yɛn atiefo koma no, ɛnsɛ sɛ yɛyɛ no bi-ne-bi. Mmom ɛsɛ sɛ yefi koma a anigye ahyɛ no ma mu ka yɛn Nyankopɔn ne n’atirimpɔw ho asɛm kyerɛ. (Dw. 145:7) Eyi si hia a kokoam Bible akenkan ne adesua ho nhyehyɛe pa hia no so dua.—Mmeb. 15:28.
4 Nea eye sen biara a yɛde bɛma Yehowa no nso hwehwɛ sɛ yesuasua ɔdɔ a ɔwɔ ma nnipa no. (Efe. 5:1, 2) Saa ɔdɔ no bɛkanyan yɛn ma yɛaka nokwasɛm a ɛma nkwa no akyerɛ nnipa dodow biara a yebetumi. (Marko 6:34) Ɛbɛkanyan yɛn ma yɛakyerɛ nnipa a yɛka asɛm kyerɛ wɔn no ho anigye. Ɛbɛma yɛadwennwen nnipa a yɛkɔ wɔn hɔ no ho na aka yɛn ma yɛasan akɔ hɔ bio. Ɛbɛhyɛ yɛn ma yɛayɛ nea yebetumi biara de aboa wɔn ma wɔanya nkɔso wɔ honhom mu.—Aso. 20:24; 26:28, 29.
5 “Ayeyi Afɔre”: Nsi a yɛde yɛ asɛnka adwuma no yɛ ɔkwan foforo a yɛfa so de nea eye ɛsen biara ma Yehowa. Sɛ yɛyɛ nhyehyɛe pa na yɛde yɛn adwene si asɛnka adwuma no so a, yebetumi de bere a yɛwɔ no ayɛ pii. (1 Tim. 4:10) Ahosiesie a edi mũ boa yɛn ma yɛde ahotoso ka asɛm no ma emu da hɔ, na yɛnam saayɛ so nya nnipa ma wotie asɛm no yiye. (Mmeb. 16:21) Bere a yɛka asɛmpa no kyerɛ afoforo no, yebetumi aka koma pa a yɛde ka no ho asɛm sɛ ɛyɛ “ayeyi afɔre.”—Heb. 13:15.