So Nnipa Betumi Ayi Ohia Afi Hɔ?

NNIPA mpempem pii na wɔanyinyin a wonnii hia da. Ɛmmae da sɛ wobebua ada anaa wɔbɛda awɔw mu. Nanso, nnipa a wɔte saa no mu pii te nka ma ahiafo, na wɔbɔ mmɔden yɛ wɔn mmoa.

Nanso, nkurɔfo a ɔmanko, nsuyiri, ɔpɛ, ne ɔhaw afoforo haw wɔn no da so ara di hia buruburoo. Saa nneɛma yi bɔ Afrika akuafo a wɔyɛ mfuw nketewa no hu. Eyi ama ebinom atu afi wɔn nkurow mu kɔ nkurow akɛse mu anaa wɔakɔtra aman afoforo so sɛ aguanfo. Afoforo a wɔte nkuraase no tu kɔ nkurow akɛse mu efisɛ wonim sɛ, sɛ wɔkɔ hɔ a, wɔn asetra besi wɔn yiye.

Mpɛn pii no, nkurɔfo di hia wɔ nkurow akɛse a nnipa kyere so wom no mu. Asase a wonya de dua nnɔbae no sua koraa. Ɛnyɛ mmerɛw sɛ wobenya adwuma ayɛ. Esiane sɛ nnipa pii nni anidaso koraa nti, wɔdan nsɛmmɔnedifo. Nnipa a wɔtete nkurow akɛse mu no sũ hwehwɛ mmoa, nanso nnipa nniso horow no ntumi nyii ohia a ɛrekɔ so no mfii hɔ. Bere a The Independent atesɛm krataa a wotintim wɔ London no retwe adwene asi amanneɛbɔ bi a Amanaman Nkabom no de too gua wɔ November 2003 mu so no, ɛkae sɛ: “Nnipa a woredi kɔm no redɔɔso.” Ɛde kaa ho sɛ: “Wobu akontaa sɛ wɔ wiase nyinaa no, nnipa bɛyɛ ɔpepem 842 na nnɛ wonnya aduan pa nni—na nnipa a wɔte saa no dodow mpo rekɔ soro ma afe biara nnipa ɔpepem 5 a wodi kɔm bɛka ho.”

Ɛtɔ mmere bi a, Yehowa Adansefo baa dwumadibea a ɛwɔ South Africa no nsa ka nkrataa a efi nkurɔfo a wodi hia hɔ. Sɛ nhwɛso no, ɔbarima bi a ofi Bloemfontein kyerɛwee sɛ: “Minni adwuma yɛ, na bere biara a menya biribi wɔ kuropɔn no mu no miwia. Sɛ manyɛ saa a, ɔkɔm bɛde yɛn nna pii—na awɔw a ano yɛ den a ɛbɛde yɛn no de, menna nka. Adwuma nni hɔ koraa. Nnipa pii nenam mmɔnten so rehwehwɛ adwuma ne nea wobedi. Minim ebinom a wɔtasetase nnuan wɔ nnaka a wɔde nwura gu mu mu di. Ebinom di wɔn ho dɔm. Nnipa pii a wɔte sɛ me a wɔabotow na wonni anidaso. Ɛte sɛ nea anidaso biara nni hɔ ma daakye. So Onyankopɔn a ɔbɔɔ yɛn sɛ yennidi na yɛnhyɛ ntaade no nhu eyi?”

Mmuae a ɛma abotɔyam wɔ hɔ ma ɔbarima yi ahiasɛm no. Sɛnea asɛm a edi hɔ no bɛda no adi no, saa mmuae no wɔ Onyankopɔn Asɛm, Bible no mu.