Afrikani Hobrɛasefo Bi a N’ani Gyee Onyankopɔn Asɛm Ho

ƐTAA yɛ ahɔho a wɔkɔ Afrika no nwonwa sɛ ɛyɛ mmerɛw koraa sɛ wɔne ɛhɔfo befi Bible mu nkɔmmɔbɔ ase. Nsɛmmisa bi te sɛ, “Dɛn ne Onyankopɔn Ahenni?” anaa “So aduan a ɛho yɛ na, yare, akodi, ne nsɛmmɔnedi befi hɔ koraa?” ma nkurɔfo taa tie asɛm no. Nnipa pii ani gye ho sɛ wɔbɛma ɔhɔho bi afi Bible mu akyerɛ wɔn nsɛmmisa yi ho mmuae. Eyi taa kowie Bible adesua a wɔyɛ no daa mu. Na bere a asuafo no nya nkɔso no, wɔbɛbɔ asu bɛyɛ Kristofo.

Wɔaka Afrikafo a wodii kan yɛɛ saa no mu baako ho asɛm wɔ Bible no mu wɔ Asomafo Nnwuma 8:26-40. Ná ɔyɛ Etiopiani bi a watu kwan akɔ Yerusalem rekɔsom nokware Nyankopɔn, Yehowa no.

Yehu wɔ mfonini a ɛwɔ ase ha no mu sɛ Etiopiani barima no te ne teaseɛnam mu resan akɔ ne kurom a wabue nhoma mmobɔwee bi mu rekenkan. Ɔhɔho bi bɛn no bisaa no sɛ: “So wote nea wokan yi ase anaa?” Etiopiani no fii ahobrɛase mu gye toom sɛ ohia mmoa, na ɔsrɛɛ ɔhɔho no, Kristoni ɔsɛmpakafo Filipo, sɛ ɔmforo mmra ne teaseɛnam no mu. Na afei ɔka kyerɛɛ Filipo sɛ ɔnkyerɛkyerɛ Kyerɛwsɛm a na ɔrekenkan no mu nkyerɛ no. Filipo kyerɛkyerɛɛ mu sɛ ɛyɛ nkɔmhyɛ bi a enyaa mmamu wɔ Mesia no, Yesu Kristo a na owui nkyɛe no so. Filipo kaa “Yesu ho asɛmpa” foforo nso kyerɛɛ no, a ɛda adi sɛ ɔkaa Yesu wusɔre ho asɛm nso.

Esiane sɛ Etiopiani no tee nokwasɛm a ɛyɛ anigye yi nti, na ɔpɛ sɛ ɔyɛ Yesu suani ma enti obisae sɛ: “Ɛdɛn na esiw me asubɔ ho kwan?” Wɔ saa Afrikani hobrɛasefo yi asubɔ akyi no, ɔsan toaa so kɔɔ ne kurom, na Bible no anka ne ho asɛm bio.

Ɛnnɛ, Yehowa Adansefo reboa nnipa ɔpepem pii wɔ wiase nyinaa ma wɔasua “asɛmpa” koro no ara. Mprempren wɔne afoforo yɛ Bible adesua ahorow bɛyɛ ɔpepem asia a wonnye hwee.