‘Ɔte Sɛ Aboɔden Abo Kɔkɔɔ’

ƆSOMAFO Yohane nyaa anuonyam ahengua bi a ɛwɔ soro ho anisoadehu. Na Nea ɔte ahengua no so no te sɛ “ahwehwɛbo.” Na ɔte sɛ “aboɔden abo kɔkɔɔ” nso. (Adiyisɛm 4:2, 3, NW) Na ɛyɛ abo bɛn?

Na saa abo no nyɛ abo a ɛhyerɛn nanso hann ntumi mfa mu. Wɔ tete mmere mu no, na wɔde Hela asɛmfua a wɔkyerɛ ase “ahwehwɛbo” di dwuma de kyerɛ abo a ne kɔla gu ahorow, a aboɔden abo a wotumi hwɛ anim hu akyiri ka ho. A. T. Robertson ka wɔ Word Pictures in the New Testament mu sɛ “ahwehwɛbo” a wɔka ho asɛm wɔ Adiyisɛm 4:3 no “nyɛ ahwehwɛbo a ɛwɔ hɔ nnɛ a ɛyɛ fow no bi.” Bio nso, akyiri yi, Yohane kaa ɔsoro kurow Yerusalem ho asɛm wɔ Adiyisɛm nhoma no mu sɛ: “Ne hyerɛn te sɛ ɔbo a ne bo yɛ denneennen, te sɛ ahwehwɛbo a emu tew sɛ ahwehwɛ.” (Adiyisɛm 21:10, 11) Ɛda adi sɛ abo a Yohane kaa ho asɛm no yɛ abo a hann tumi fa mu.

Onipa a Yohane huu no wɔ n’anisoadehu no mu sɛ ɔte ahengua so no ne Onii a ɔwɔ anuonyam sen obiara wɔ amansan yi mu no, Yehowa Nyankopɔn. Ɔyɛ kronkron a obiara ne no nsɛ. Nea ɛne no hyia no, ɔsomafo Yohane kyerɛwee sɛ: “Onyankopɔn yɛ hann, na esum biara nni ne mu.” (1 Yohane 1:5) Ne saa nti, Yohane hyɛɛ ne mfɛfo gyidifo nkuran sɛ ‘wɔn tew wɔn ho sɛnea Yehowa nso ho tew’ no.—1 Yohane 3:3.

Dɛn na ɛsɛ sɛ yɛyɛ na ama Onyankopɔn abu yɛn sɛ yɛn ho tew? Ade a ɛho hia paa ne sɛ yebenya Kristo mogya a ohwie gu maa yɛn bɔne fafiri no mu gyidi. Ɛsɛ sɛ yɛkɔ so nso ‘nantew hann’ no mu denam Bible no a yebesua no daa na yɛde nea ɛkyerɛkyerɛ no abɔ yɛn bra no so.—1 Yohane 1:7.