‘Onyankopɔn Nte Asɔrefie A Wɔde Nsa Asi mu’

AKYINNYE biara nni ho sɛ na ɔsomafo Paulo nim Athena asɔrefie ahorow no, efisɛ na wotumi hu eyi wɔ nkurow a ɔkɔsrasraa hɔ wɔ n’asɛmpatrɛw akwantu mu no pii mu. Sɛnea The Encyclopædia Britannica kyerɛ no, na wonnim Athena sɛ ɔko ne nyansa nyamewa nko, na mmom “adwinni ne biribiara a wɔyɛ wɔ asomdwoe bere mu” nyamewa nso.

Ná Athena asɔrefie a agye din sen biara ne Parthenon, a ɛwɔ Atene, kurow a wɔde too nyamewa no. Wobuu Parthenon sɛ asɔrefie a na ɛsosõ sen biara wɔ tete bere mu no mu biako, na na emu na Atena nyamewa a wɔde sika kɔkɔɔ ne asonse ayɛ a ne tenten yɛ mita 12 no si. Bere a Paulo kɔsraa Atene no, na asɔrefie a wɔde abo fitaa asi yi agye din yiye wɔ kurow no mu bɛyɛ mfirihyia 500 dedaw.

Bere a na obiara ani tua Parthenon no, Paulo kaa ‘Onyankopɔn a ɔnte asɔrefie a wɔde nsa asi mu’ no ho asɛm kyerɛɛ Atenefo kuw bi. (Asomafo no Nnwuma 17:23, 24) Ebia na sõ a Athena asɔrefie ahorow no sosõ ne anuonyam a n’ahoni wɔ no maa Paulo atiefo no ani gyee Athena ho sen Onyankopɔn a aniwa nhu no na wonnim no no. Nanso, sɛnea Paulo daa no adi no, ɛnsɛ sɛ yesusuw sɛ adesamma Bɔfo no ‘te sɛ sika anaa dwetɛ anaa ɔbo, anaa biribi a onipa de ne nsa ayɛ.’—Asomafo no Nnwuma 17:29.

Anyame ne anyamewa te sɛ Athena—a na wɔn anuonyam gyina asɔrefie ne ahoni so no—aba, atwam kɔ. Athena honi yera fii Parthenon wɔ afeha a ɛto so anum wɔ Y.B. mu, na n’asɔrefie ahorow no kakraa bi pɛ na wohwehwɛ n’amamfõ a wubehu. Hena na ɔdan kɔ Athena nkyɛn kɔhwehwɛ nyansa ne akwankyerɛ nnɛ?

Hwɛ sɛnea ɛyɛ soronko wɔ Yehowa, “daa Nyankopɔn” a onipa biara nhuu no da no ho. (Romafo 16:26; 1 Yohane 4:12) Kora mma no kyerɛwee sɛ: “Saa Onyankopɔn yi yɛ yɛn Nyankopɔn daa daa, ɔbɛyɛ yɛn kwankyerɛfo de akosi owu mu.” (Dwom 48:14) Ɔkwan biako a yɛbɛfa so anya Yehowa Nyankopɔn akwankyerɛ ne sɛ yebesua N’asɛm, Bible, no na yɛde emu afotu adi dwuma wɔ yɛn asetram.