Paw Daa Nkwa

ƐMMAE da sɛ nnipa pii anya nneɛma pii a ɛsɛ sɛ wɔpaw mu bi sɛ nnɛ. Sɛ nhwɛso no, yɛtaa paw ntade a yɛhyɛ, aduan a yedi, ne baabi a yɛyɛ adwuma ne baabi a yɛte. Wɔ wiase no afã pii no, ɛyɛ ade a obi na ɔpaw ne hokafo. Nanso, Bible ma yɛn biribi a ne paw sen nneɛma foforo a yɛpaw nyinaa—ade a adesamma nyinaa wɔ hokwan sɛ wɔpaw.

Bible ka sɛ: “Nea otim trenee mu no kɔ nkwa mu, na nea otiw bɔne no nya owu.” (Mmebusɛm 11:19) Na Yesu Kristo kae sɛ: “Na eyi ne daa nkwa, sɛ wobehu wo, nokware Nyankopɔn koro no, ne nea wosomaa no, Yesu Kristo no.”—Yohane 17:3.

Yiw, yɛn Bɔfo no ama yɛanya hokwan sɛ yɛbɛpaw ɔkwan a ebetumi de yɛn akɔ daa nkwa mu! Dɛn na ɛsɛ sɛ yɛyɛ na ama yɛanya daa nkwa?

Sɛnea Bible kyerɛ no, “trenee kwan so na nkwa wɔ.” (Mmebusɛm 12:28) Yebetumi aka treneefo a wɔnam daa nkwa kwan so no ho. Ɔkwan bɛn so? Denam hwɛ a yɛbɛhwɛ ama yɛn asetra ne Onyankopɔn apɛde ne n’ahyɛde ahorow ahyia so. (Mateo 7:13, 14) Enti ɛmmra sɛ yɛbɛpaw ade pa na yɛanya Onyankopɔn akyɛde a ɛne daa nkwa no.—Romafo 6:23.