Mfomso A Yɛayɛ Atwam A Yebesua Biribi Afi Mu

ABRABƆ ho mmara a yɛn Bɔfo no de ama yɛn no yɛ nea ɛwɔ hɔ daa na ɛnsakra. Ne saa nti, nnyinasosɛm a ɛwɔ Galatifo 6:7 no yɛ adwuma nnɛ nso: “Nea onipa gu no, ɛno ara na obetwa.” Ampa, obi besusuw sɛ ɔne Onyankopɔn nni akontaabu biara, nanso ɔsoro gyinapɛn no tim hɔ daa. Awiei koraa no, onipa biara nni hɔ a ɔbɛfa ne ho adi wɔ nea efi ne nneyɛe mu ba no ho.

Na obi a obu bra bɔne a akyiri yi, ɔsesa bɛyɛ Onyankopɔn somfo no nso ɛ? Ebia nea efi ne kan abrabɔ mu ba no bɛkɔ so ne no atra. Nanso, eyi nkyerɛ sɛ Onyankopɔn mfaa ne mfomso mfirii no. Ɔhene Dawid ne Bat-Seba awaresɛe no de ɔhaw pii baa Dawid asetra mu. Wantumi ankwati eyi. Nanso onuu ne ho, na onyaa Onyankopɔn hɔ fafiri.—2 Samuel 12:13-19; 13:1-31.

So w’aba mu abu pɛn bere a mfomso bi a woyɛe de ɔhaw abrɛ wo no? Sɛ yesusuw ho wɔ ɔkwampa so a, ɛyaw a yebedi no bɛkae yɛn ma ‘yɛannan yɛn ani ankɔ ahuhude so.’ (Hiob 36:21) Yiw, ɛyaw a yebedi no betumi aboa yɛn ma yɛakwati sɛ yɛbɛyɛ bɔne bi bio. Nea ɛsen saa mpo no, Dawid de osuahu a onya fii bɔne a ɔyɛe mu no boaa afoforo nso, na ɛnyɛ ne nkutoo. Ɔkae sɛ: “Mɛkyerɛ mmaratofo w’akwan, na nnebɔneyɛfo adan aba wo nkyɛn.”—Dwom 51:13.

[Kratafa 7 mfonini ahorow]

Dawid suaa biribi fii ɔne Bat-Seba bɔne no mu