Sika Asonkaa a Wɔde Hyehyɛ

EFI tete na wɔakyerɛ obu kɛse wɔ sika agude ho esiane bo a ɛsom ne fɛ a ɛyɛ nti. Bere a Yosef bɛyɛɛ man soafo panyin wɔ Misraim no, Farao maa no sika ntweaban. (Genesis 41:42) Wɔmaa Rebeka sika hwene mu kaa ne sika nkapo abien a ano si bɛyɛ (U.S.) $1,400 wɔ ɛnnɛ sika mu. (Genesis 24:22) Akyinnye biara nni ho sɛ wɔde anisɔ gyee akyɛde a ɛsom bo yi, na wɔde anigye hyɛe.

Bible ka sɛnkyerɛnne kwan so agude bi a ɛsom bo sen nea Yosef ne Rebeka hyɛe no koraa ho asɛm. Mmebusɛm 25:12 ka sɛ: “Sɛ sika asonkaa ne amapa ahyehyɛde te no, sɛ onimkafo nyansafo te wɔ asõ a ɛte asɛm so ne no.” Sɛ ɔfotufo bi gyina Onyankopɔn Asɛm so de afotu ma sen sɛ obegyina n’ankasa nsusuwii so a, na ɔde akyɛde a ɛsom bo rema ampa. Dɛn ntia? Efisɛ nokwarem no, afotu a ɛte saa no fi Yehowa ankasa nkyɛn. Bible kyerɛ yɛn sɛ: “Me ba, mpo [Yehowa, NW] nteɛso, na mma n’animka mmfono wo. Na nea [Yehowa, NW] dɔ no na ɔka n’anim, sɛ agya yɛ ne ba a ɔdɔ no.” (Mmebusɛm 3:11, 12) Sɛ nea wɔretu no fo no de ahobrɛase gye afotu no tom de di dwuma a, ɛte sɛ nea ɔde sika asonkaa rehyehyɛ ne ho. Ɛte sɛ nea Bible abebusɛm a efi honhom mu ka no pɛpɛɛpɛ no: “[Anigye, NW] ne onipa a ohu nyansa, ne onipa a onya ntease. Na emu adenya ye sen dwetɛ de, na ne mfaso sen sika amapa.”—Mmebusɛm 3:13, 14.